Úzdik maman ataný úlken jaýapkershilik júkteıdi

– Jyl saıyn ótkizilip kele jatqan dástúrli «Úzdik maman» konkýrsy byltyr el Táýelsizdiginiń 25 jyl­dy­­ǵyna arnalǵan bolatyn. Al, bıyl Qazaqstandy gaz­­ben jabdyqtaıtyn eń iri «QazTransGaz» aksıonerlik qoǵa­mynyń enshiles kompanııasy «Intergaz Ortalyq Azııanyń» 20 jyldyǵyna oraılastyrylyp uıymdastyryldy. Osy 20 jyldyń ishinde elimizdegi magıstraldy gaz qubyrlary júıeleriniń uzyndyǵy 18 myń shaqyrymǵa jetti. Jańa gaz qubyrlarynyń qurylystary júr­gizilip, gaz tasymaldaý júıe­leriniń ózge de nysan­dary salyndy. Áleýmettik ınfra­qurylym damydy. Kom­panııa qalyptasý jáne damý kezeńderinen ótti. 20 jylda «Intergaz Ortalyq Azııa» tasymaldaǵan gazdyń jalpy kó­lemi 2 trln tekshe metrden asady. Osy jetistikter – bilikti ma­mandardan quralǵan úlken ujymnyń eńbeginiń nátıjesi. Bul baıqaýǵa óz kásibin jaqsy meńgergender jınalǵan. Osyn­da kelgen árqaısylaryńyz kom­panııanyń maqtanyshysyzdar, ujymnyń tabysty damýynyń negizi de sizdersizder. Sizder óz sheberlikterińizdi tanytýǵa, úz­dikterdiń úzdigi atanýǵa laıyq­­syzdar. Mundaı ataqty eli­miz­diń eń iri gaz tasymaldaý kom­panııasynan alý úlken már­tebe ári zor jaýapkershilik, – dedi jarystyń ashylý salta­natynda «Intergaz Ortalyq Azııa» AQ Bas dırektorynyń birinshi orynbasary Muqataı Shańbatyrov.

Shańbatyrov myrzanyń aıtýynsha, elimizde iri gaz qubyrlary salynyp jatyr. Batystan ońtústikke baǵyttalǵan Beıneý – Bozoı – Shymkent gaz qubyry iske qosyldy. Halyqaralyq tranzıt sheńberinde 4 myń shaqyrymnan astam magıstraldy gaz qubyry, óte joǵary qysymdy 13 kompressor salyndy. Sońǵy tehnologııamen Anglııa, Fransııada jasalǵan qondyrǵylardy ıgerý úshin kóp oqyp izdenýmen qatar óndiristik tájirıbe de jınaý kerek. Onyń boıyna kóptegen joǵary tehnologııalyq agregattar ornatylǵan. Solardy ıgerý úshin mamandarymyz sol dárejede bolýy kerek. Mundaıda joǵary tehnologııalardy qol­dana otyryp mamandardyń ká­sibı sheberlikterin shyńdaıtyn «Úzdik maman» baıqaýynyń be­reri mol. Eńbek jáne óndiris qaýipsizdigi erejelerin saqtaýdy nasıhattaıtyn jarys 2002 jyldan beri ótkizilip keledi. Jyl saıyn uıymdastyrylatyn bul baıqaýǵa búginge deıin 3 myńdaı maman qatysyp, baqtaryn sy­naǵan. Qanshamasy úzdikter atandy deseńizshi...

Eki kezeńnen turatyn jarys­ta negizgi tórt baǵyttaǵy – gaz syǵymdaý stansalary, magıs­traldy gaz qubyrlary, gaz ta­ratý qubyrlary jáne jer asty gaz saqtaý qoımalarynyń qyz­metkerleri 15 atalym boıynsha kásıbı biliktilikterin ortaǵa saldy.

Baıqaýǵa qatysýǵa nıet bil­dirýshiler óz betinshe teorııa­lyq bilimderin jetildirýi tıis eken. О́ıtkeni, olar tapsyratyn teorııalyq test eki bloktan turdy. Alǵashqysynda jalpyǵa ortaq eńbek jáne óndiris qaýip­sizdigi erejelerin saqtaý suralsa, ekinshisinde ózderiniń mamandyqtary boıynsha teorııalyq bilimderi synaldy.

Ekinshi kezeńde qatysýshylar eńbek qaýipsizdikterin bile­tinderin praktıkalyq turǵyda dáleldeýge umtyldy. Munda gazdan ýlaný, tokqa túsip qalý, esin joǵaltý, joǵarydan qulaý, jaraqat alý jaǵdaılarynda alǵashqy medısınalyq kómek kórsetý sekildi tapsyrmalardy oryndaý mindetteldi.

Úshinshi kezeńde jumys­shylardy óz mamandyǵy boıynsha óndiristik synaqtar kútip turdy. Olar qazylar alqasynyń uıǵarymyna qaraı keshendi jumystardy júzege asyrýmen aınalysty.

Qazylar alqasy atalǵan úsh kezeńniń nátıjelerin úsh kún otyryp shyǵardy. Baǵalaýdyń jıyntyq kórsekishteri boıynsha úzdikterdi anyqtady. Qazy­lar alqasynyń quramynda bas dı­rektordyń orynbasary – komıssııa tóraǵasy, kásip­odaq tór­aǵasy, óndiristik qaýip­sizdik já­ne eńbekti qorǵaý depar­tamen­tiniń dırektory – komıssııa tór­aǵasynyń orynbasary, magıstraldy qubyrlarda gaz sy­ǵymdaý stansalaryn eksplýatasııalaý departamentiniń dırektory jáne barlyq mamandyqtar bo­ıynsha kásibı mamandar boldy.

Baıqaý qorytyndysynda 15 atalym boıynsha jeńim­pazdardyń alǵashqy úshtikteri arnaıy dımlomdarmen marapattaldy. Jalpy sany 45 adamǵa baǵaly syılyqtar men jyl boıy beriletin qarjylaı ústemaqylar tapsyryldy. Al birinshi oryndy ıelengen úzdikterdiń omyraý­larynda «Úzdik maman-2017» tósbelgileri jarqyrady.

– Meniń Shymkentke ke­lýimniń ózi úlken qýanyshpen bas­taldy. Alǵashqy kúni Aq­taýdan otbasym habarlasyp, súıinshi surady. Kelinim ekinshi perzentin ómirge ákeldi, – deıdi qos qýanyshyn jasyra almaǵan, «Tehnologııalyq kompressorlar mashınısi» atalymy boıynsha úzdik maman atanǵan Nurbergen Jaqashev tolqyp turyp. – Buǵan deıin de gramotalarmen marapattalǵanmyn. Biraq men úshin bul jeńistiń jóni bir bólek. Úzdik maman ataný zor mártebe bolǵanymen, mundaı ataqtyń jaýapkershiligi de úlken.

27 jyldan beri osy salada eńbek etip kele jatqan úzdik ma­man ras aıtady. Úzdik maman ataný úlken jaýapkershilik júkteıdi.

Ǵalymjan ELShIBAI,

«Egemen Qazaqstan»