Qorytyndysynda «Astana-A» komandasy chempıon atansa, aqtyq synda osy komandaǵa 0:1 esebimen jeńilgen «Astana-B» ujymy ekinshi oryn aldy. Al úshinshi oryn eki komandaǵa birildi. Iаǵnı, Astana fýtbol federasııasy men «Dınamo» komandalary úzdik úshtikti qorytyndylady. Degenmen, qos komanda ózara kúsh synasyp, Astana fýtbol federasııasy basym tústi.
Sonymen qatar, «úzdik qaqpashy» ataǵyna «Astana-V» komandasynyń golkıperi Bých Danılo ıe bolsa, «Astana-A» komandasy sapynda erekshe oıynymen kózge túsken Nurǵalı Aldııar «úzdik oıynshy» atandy.
Marapattaý rásimine Qazaqstan ulttyq quramasy men «Astana» fýtbol klýbynyń eks-kapıtany, búginde Qazaqstan Ulttyq quramasy bas bapkeriniń asıstenti qyzmetin atqaratyn Qaırat Nurdáýletov arnaıy qatysty.
«Bári keremet ótti. Balalar úshin «Astana» komandasy jaqsy týrnır uıymdastyrdy. Búldirshinderdiń emosııasy... Jeńisterine qýanyp, jeńilisterine ókinip jatqandaryn kórdim. Úshinshi oryn úshin ótken match asa tartysty ótti. Bul fýtboldyń damyp jatqanynyń kórinisi. Alǵashqy eki orynǵa ıe bolǵan komandalardyń deńgeıi de, tehnıkalary da joǵary ekeni, birin-biri lezde túsinetinin baıqadym. Oǵan fınaldyq oıynda anyq kózim jetti», – dedi Qaırat Nurdáýletov.
Uıymdastyrýshylar tek fýtbolmen shektelip qoımaı, ata-analar arasynda da arnaıy jarystar uıymdastyrdy. Áıelder dop tebý boıynsha, al erler alań ortasynan qaqpany dál kózdeý boıynsha ózara synǵa tústi. Bir qyzyǵy, bul synda bir otbasynyń músheleri jeńis tuǵyrynan kórindi.
«Balam alty jasynan fýtbolǵa qatysady. Mine, eki jyldan asa ýaqyt ótti. Qazir Ánýar Qaıyrbekuly esimdi bapkerdiń qol astynda daıyndalyp júr. «Elorda kóktemi» týrnıriniń ótetini bir aı buryn belgili boldy. Kúndelikti jattyǵýlardan qalmady. Bul ulymnyń alǵashqy jeńisi. Aldaǵy ýaqytta bıik belesterdi baǵyndyryp, elimizdiń, álemniń jaryq juldyzdarynyń biri bolady dep úmittenemin», – dedi «Astana-A» komandasynyń oıynshysy Amangeldi Erboldyń anasy Janat Aǵytaeva.