Kezdesýde Memleket basshysyna «Qazaqstannyń úshinshi jańǵyrýy: jahandyq básekege qabilettilik» atty joldaýda elimizdiń qarjy jáne fıskaldyq júıesiniń aldyna qoıylǵan mindetterdiń iske asyrylý barysy týraly málimdeldi.
Nursultan Nazarbaev eldiń ekonomıkalyq damý deńgeıin arttyrýdyń mańyzdylyǵyn atap ótip, negizgi úsh mindettiń oryndalýyna basa nazar aýdardy.
– Birinshiden, tıisti tetikter qalyptastyrý arqyly bıýdjet kirisin arttyrý kerek. Qajet bolǵan jaǵdaıda, sheteldik tájirıbe zerttelýge tıis. Ekinshiden, memlekettik shyǵystardy azaıtý kerek. Úshinshiden, bólingen bıýdjetti tıimdi paıdalanǵan jón. Memleket úshin Qarjy mınıstri qyzmetiniń tıimdiligi onyń osy fýnksııalardy qalaı atqaratynyna tikeleı baılanysty, – dedi Qazaqstan Prezıdenti.
Memleket basshysy ekonomıkalyq ósimniń tómendeýi men kiristerdiń azaıýy baıqalǵan jaǵdaıda Qarjy mınıstrliginiń bıýdjetti tolyqtyrýdyń qosymsha tetikterin qalyptastyryp, memlekettik qaryzdyń qaýipsiz parametrlerin qamtamasyz etýge tıistigin atap ótti.
– Negizinen, ekonomıkadaǵy ósim Ulttyq qordyń qarjysy esebinen qamtamasyz etilýde. Kóptegen uıymdar odan ári ıgerý úshin qashan qarjy bóledi eken dep, qol jaıyp qarap otyrady. Qarjy mınıstrligi bul úderisti shektep, baqylaýda ustaýǵa tıis. Biz Ulttyq qordy ulǵaıtýymyz qajet, – dep tapsyrma berdi Nursultan Nazarbaev.
Sondaı-aq, B.Sultanov Memleket basshysyna qarjylyq turaqtylyqty saqtaý, áleýmettik mindettemelerdi oryndaý, tekseristerdi qysqartý jáne kásipkerlik sektorǵa túsetin aýyrtpalyqty azaıtý, memlekettik satyp alýlar júıesin jetildirý, memlekettik aýdıt júıesine aldyn alý sharalaryn engizý jóninde vedomstvo tarapynan jasalyp jatqan qadamdar týraly baıandady.