Marapatqa ıe bolǵan sportshylardyń qatarynda úsh birdeı Olımpıadanyń júldegeri Olga Rypakova, HHVIII dúnıe júzilik qysqy ýnıversıadanyń altyn jáne kúmis júlde ıegeri, bıatlonshy Galına Vıshnevskaıa, frıstaılshy, Ispanııada ótken álem chempıonatynyń kúmis júldegeri Iýlııa Galysheva, eki jyl qatarynan el chempıony atanǵan «Altaı» voleıbol klýbynyń qyzdar quramasynyń músheleri Sana Anarqulova, Robles Batısta, Inna Matveeva bar. «Bratıno» hokkeı kýbogynyń aqtyq synyna deıin jetken О́skemenniń «Torpedo» hokkeı klýbynyń barlyq oıynshylaryna Joǵary hokkeı lıgasynyń medaldary tapsyryldy. Atalǵan klýbtyń prezıdenti Nıkolaı Proskýrın, dırektory Sergeı Nemchınov, bas jattyqtyrýshy Alekseı Jdahın, aǵa jattyqtyrýshy Erlan Saǵymbaev pen sporttyq dırektor Dosjan Ýalhanovqa oblys ákiminiń qurmet gramotalary tabys etildi. Erekshe atap óterligi, bul kúni klýbtyń barlyq qyzmetkerlerine, dárigerine de, hokkeıshilerdiń massaj jasaýshylaryna da qurmet kórsetildi.
Jyl basynda Almatyda jalaýy jelbiregen HHVIII dúnıe júzilik ýnıversıada men Japonııada ótken Azııa oıyndarynda atoı salǵan Vasılıı Podkorytov, Ivan Lıýft, Pavel Kolmakov, Dmıtrıı Reıhard, Iаn Savıskıı, Elena Kolomına, Sergeı Cherepanov, Erdos Ahmadıev, Sergeı Tkachenko, Marat Japarov pen aýyr atletıkadan jastar arasynda ótken álem chempıonatynda kúmis júlde alǵan Darıa Pavlova men osy sportshylardyń barlyǵynyń jattyqtyrýshylary da marapattan tys qalǵan joq.
«Kezinde bir jýrnalıst burynǵy AQSh Prezıdentinen «elimizdiń atyn qalaı shyǵarýǵa bolady?» dep suraǵanda ol: «Memlekettiń atyn álemge tanytýdyń eki joly bar: birinshisi – aıǵa ushý, ekinshisi – Olımpıada chempıony ataný» dep jaýap bergen eken. Osyǵan qarap-aq, sportshylardyń jeńisteri eli úshin qanshalyqty mańyzdy ekenin baǵamdaı berýge bolady. Shúkir, bizdiń el de, bizdiń oblys ta mundaı sańlaqtardan kende emes. Shyǵys Qazaqstannan respýblıkaǵa ǵana emes, búkil álemge tanymal sportshylar shyqqan jáne áli de shyǵa bereri anyq. Sportshy bolý ońaı dúnıe emes. Syńǵyrlaǵan medaldardyń ar jaǵynda qanshama tógilgen ter, mazasyz kúnder men uıqysyz túnderdiń jatqanyn umytpaıyq. Barlyqtaryńyzdy quttyqtaımyn. Elimizdiń mártebesin asqaqtata berińizder», - dedi sportshylarǵa sertıfıkattar men alǵys hattardy tapsyrǵan oblys basshysy Danıal Ahmetov.
Marapat alyp, qurmetke bólengen sportshylar óz kezeginde umyt qaldyrmaı, elep-eskerip, tıisti jaǵdaılaryn jasap jatqan oblys ákimdigine alǵystaryn bildirip, lebizderin jetkizdi. «Torpedo» hokkeı klýbynyń kapıtany Maksım Belıaev aımaq basshysyna hokkeı taıaqshasyn, «Altaı» qyzdar voleıbol komandasynyń kapıtany Inna Matveeva ózderine jeńis syılaǵan matchta oınaǵan dopty syıǵa tartty.
Azamat QASYM,
«Egemen Qazaqstan»
О́SKEMEN
Sýretterdi túsirgen – Mánap MURZATAEV