Kezdesýdiń basynda Memlekettik hatshy Qazaqstan tereń ári júıeli jańarýlar kezeńin bastan ótkerip jatqanyn atap ótti. Memleket basshysy myqty ári jaýapkershiligi joǵary ult bolý úshin bolashaqqa qalaı qadam basyp, buqaralyq sanany qalaı ózgertý kerektigi jóninde mindet qoıdy. Muny oryndaý úshin qajetti basty shart tól mádenıetti, derbes ulttyq kodty saqtaý bolyp sanalady.
G.Ábdiqalyqova Qazaqstan Prezıdentiniń tapsyrmasy boıynsha «Jahandaǵy zamanaýı qazaqstandyq mádenıet» atty jobanyń iske asyrylatynyn aıtty. Memlekettik hatshy Elbasymyz bizdi álemniń qara altynmen jáne syrtqy saıasattaǵy jobalarymyzben ǵana emes, mańyzdy mádenı jetistikterimizben de tanýǵa tıistigi jóninde mindet qoıǵanyna nazar aýdardy.
Sondaı-aq, kezdesýde opera jáne balet óneri salasyndaǵy yntymaqtastyqty damytý, «La Skala» teatrynyń Qazaqstandaǵy jáne «Astana Opera» memlekettik opera jáne balet teatrynyń Italııadaǵy gastrolderin ótkizý tájirıbesin óristetý máseleleri talqylandy.
Gúlshara Ábdiqalyqova halyqaralyq EKSPO-2017 mamandandyrylǵan kórmesi aıasynda Qazaqstan elordasynda 1-10 qyrkúıek aralyǵynda tuńǵysh ret Mılandaǵy áıgili «La Skala» teatrynyń tolyq quramdaǵy gastroli ótkiziletinin aıtty.
Mádenı baǵdarlama aıasynda ıtalııalyq ujym «Astana Opera» sahnasynda Djýzeppe Verdıdiń «Falstaf» operasyn usynady, sondaı-aq, maestro Zýbın Metanyń jetekshiligimen Lıýdvıg van Bethovenniń áıgili shyǵarmasy – №9 sımfonııa oryndalady.
Memlekettik hatshy G.Ábdiqalyqova kezdesý sońynda A.Pereıraǵa myqty densaýlyq, mol ıgilik jáne zor shyǵarmashylyq tabys tiledi.