«Myń ólip, myń tirilgen», talaı náýbetti bastan keship, búginge aman-esen jetken halyqtyń joǵaltqandary da kóp. Tilimizdi umytýǵa shaq qaldyq. Qazaq bolǵanymyz úshin uıalatyn halge tústik. Sodan bolsa kerek, shırek ǵasyr táýelsizdik jaǵdaıynda ómir súrsek te, óz qarakózderimizdiń óziniń ana tilinde saırap kete almaı otyrǵandyǵy.
Tarıhymyz burmalandy, tipti, túptamyrymyzdy bilmes úshin bir kezderde álipbıimizdi kúshtep ózgertti. Mine, Elbasymyzdyń aıtyp otyrǵany da osy joǵaltqandarymyzdy, endi qaıtaraıyq, jaǵdaı túzeldi degenge saıady. О́ıtkeni, ulttyq kod degenimiz, eń aldymen jahandaný zamanynda qazaqtyń qulpyn ashatyn – kilt, onyń erekshelikteri – tili, dili, dástúri, tarıhy, mádenıeti, jazýy. Onsyz memlekettiń damýy múmkin emes, máńgilik el bolýymyz da ekitalaı.
Árıne, bul baǵytta qyrýar ister de tyndyrylar-aý, osy oraıda kókeıde júrgen bir oı keledi. Latyn álipbıine kóshkeli otyrǵan ýaqytta, ulttyq kodymyzdyń basty bir belgisi – qazaqtyń aty-jónin jazýdy sozbalaqtaı bermeı birizdendirip, túzetip alsaq. Dolıdze dese – grýzın, Sarkısıan dese – armıan dep biletinimiz sııaqty. Uly, qyzy nemese jalǵaýsyz jazý arqyly tegimizdiń ózinen ultymyz qazaq ekeni ańǵarylyp turýy kerek qoı. Áli kúnge deıin kóbimiz aty-jónimizdi orysshalap qate jazamyz, eń aldymen, týý týraly kýálikte, tólqujatta, jeke bas kýáliginde qazaqtardyń aty-jóni aldymen qazaqsha durys jazylatyn bir tártip aýadaı qajet.Uly isterdi júzege asyrýda usaq-túıek másele bolmaıdy. Osy bir ońtaıly tusta, ult máselesine Elbasymyzdyń ózi aıryqsha nazar aýdaryp, serpilis berip otyrǵanda osy joǵaltqandarymyzdy da izdep taýyp, túzetip alyp jatsaq nesi aıyp.
Bekádil SEMQUL,
jýrnalıst
QARAǴANDY