Atyraý oblysynda ótken jyly syrtqy taýar aınalymy 13 mlrd AQSh dollaryna jetti. О́nerkásiptik óndiris 4,4 trln teńgege baǵalandy. Investısııa tartýda munaıly óńir kósh bastap keledi. Jalpy, óńirlik ónim men ortasha eńbekaqy mólsheri boıynsha da oblys aldyńǵy qatarda. «ATYRAU INVEST-2017» halyqaralyq forýmynda qazynaly mekenniń búginge deıin qol jetkizgen tabystary men jetistikteri kópshilik nazaryna usynyldy. Shara aıasynda oblys ákimdigi 3,3 mlrd AQSh dollaryn quraıtyn 9 memorandýmǵa qol qoıdy. Bul – áleýmettiń áleýetin kóterip, el ekonomıkasyn damytýǵa baǵyttalǵan taǵy bir qadam.
– «ATYRAU INVEST-2017» halyqaralyq forýmynyń maqsaty – oblystyń ınvestısııalyq múmkindigimen tanystyrý, ınvestısııalardy oblys ekonomıkasyna jáne naqty ınvestısııalarǵa tartý, − deıdi óńir basshysy Nurlan Noǵaev. – 20 memlekettiń ókili, júzden astam kompanııanyń basshylary men qyzmetkerleri keldi. Ortalyq jáne jergilikti memlekettik mekemeler, ulttyq kompanııalar men damý ınstıtýttarynyń, elimizdegi dıplomatııalyq ókildikterdiń ókilderi jáne sheteldik, otandyq ınvestorlar da sharaǵa kýá boldy. Kórmege qatysýshylar óz ónimderi men kórsetetin qyzmetterin kópshilikke usyndy. Bul jańa joba bastaýǵa nıetti atyraýlyq kásipkerler úshin de jaqsy múmkindik. Al ınvestorlar munaı-gaz salasynda, ekonomıkany ártaraptandyrý baǵytynda júzege asyp jatqan sharalardan habardar boldy.
Atyraý oblysyndaǵy ınvestısııalyq ahýaldyń turaqtylyǵy iri kompanııalar tarapynan qyzyǵýshylyqqa ıe. Olar qarajat salyp, qaıtarymyn kórýge yntaly. Osy ınvestısııalyq forýmda munaı-hımııa parkiniń aıasynda júzege asyrylatyn 620 mln teńgeniń jobasyn atqarýǵa memorandýmǵa qol qoıyldy. Jergilikti jerde agressıvti ortadaǵy metaldy tot baspaý tehnologııasy boıynsha jumystar qolǵa alynyp jatyr. Oblys ákiminiń aıtýynsha, ınvestorlar tek munaı-gaz salasy ǵana emes, ónim óndirý, aýyl sharýashylyǵy baǵyttaryna da qyzyǵýshylyq tanytqan. Sheteldik jáne otandyq ınvestorlardyń basqosýy ózara tıimdi kelisimderge jol ashady, birlesken kásiporyn qurýǵa múmkindik beredi. Qazir oblysta osyndaı myńnan astam kompanııa tabysty eńbek etip jatyr.
Forýmǵa qatysqan «QazEnerdjı» qaýymdastyǵy tóraǵasynyń orynbasary Uzaqbaı Qarabalın ozyq tehnologııalar men ınnovasııalar arqyly ǵana bıikten kórinemiz degen oıyn aıtty. Al Germanııanyń Qazaqstandaǵy konsýly Iorn Rozenberg «Bıyl eki el arasyndaǵy dıplomatııalyq qarym-qatynastyń ornaǵanyna 25 jyl. Germanııa úshin Qazaqstan Ortalyq Azııadaǵy basty ekonomıkalyq áriptes sanalady. Kómirsýtegi shıkizatyna baı Atyraý oblysynyń da orny bólek. Jergilikti basshylyqtyń qoldaýymen iskerlik baılanystar ornatýǵa yńǵaıly ortalyq qalyptasqanyna qýanamyz», dedi. Belgııa Koroldiginiń Qazaqstandaǵy tótenshe jáne ókiletti elshisi Mıshel Petermans eki el arasyndaǵy baılanystyń jyldan-jylǵa nyǵaıyp kele jatqanyn atap aıtty.
16-shy Soltústik-Kaspıı qurylys jáne ınterer kórmesine arnaıy kelgenderdiń qatarynda Túrkııanyń «KyvanchGrýp» kompanııasy da bar. Buǵan deıin Aqtaý qalasyna ónimderin usynyp kele jatqan kásiporyn endi Atyraýda bólimshesin ashýǵa nıetti. «1980 jyly negizi qalanǵan shaǵyn bıznes búginde úlken kompanııalar tobyna aınaldy, − deıdi «KyvanchGrýptyń» Azııa elderindegi satý boıynsha menedjeri Serkan Iyldyrym. – Bizdiń kıimderimiz óte yńǵaıly, sándi. Tigin ındýstrııasynda ózindik orny bar kásiporyn óndiris aýqymyn keńeıtýdi josparlap otyr».
Jalpy, Atyraý oblysynda ındýstrııalandyrý baǵdarlamasy aıasynda ótken jyly 7 joba júzege asty. «Bıyl tórt jobanyń jumysy bastalady. Olar: robotty dánekerleý tásili arqyly metalqurastyrmalar daıyndaý óndirisi, farmasevtıka zaýyty, balyq ósiretin toǵan sharýashylyǵy, makaron óndirý sehy. Budan bólek quny 14 trln teńge bolatyn, 20 myńnan astam jumys ornyna eseptelgen 20 ınvestısııalyq joba júzege asyrylady. Teńiz kenishin keńeıtý jobasy sheńberinde atqarylar jumystardyń nátıjesinde munaı óndirisiniń kólemin 27-den 39 mln tonnaǵa ulǵaıtýǵa jol ashylady», dep atap ótti oblys ákimi N.Noǵaev.
О́tken jyldyń qorytyndy kórsetkishterine zer salsaq, oblystaǵy shaǵyn jáne orta bıznespen aınalysatyn turǵyndar sany 7,9 paıyzǵa artyp, 128,7 myń adamdy quraǵan. Bul óńirde ekonomıkalyq belsendi halyqtyń 41 paıyzy osy salaǵa jumyldyrylǵanyn kórsetedi. Al halyqaralyq ınvestısııalyq forým syndy sharalar el ıgiligine eleýli úles qosatynymen erekshe.
Baqytgúl BABASh,
«Egemen Qazaqstan»
ATYRAÝ