Búginde aıshylyq jerlerge qolma-qol daýys jalǵastyrǵan telefon baılanysy qyzmetiniń qaı túri bolsyn eshkimge tańsyq emes. Ushy-qıyrsyz ólkemizdiń qııan túkpirindegi aýyl turǵyndary áp-sátte qalaǵan mekenderdegi týǵan-týysqandarymen, tamyr-tanystarymen tildesip jatady. Muny bylaı qoıǵanda bul baılanystyń jyldan-jylǵa jetildirilip, jaqsara túsýi sandyq ta, sapalyq jaǵynan da tanyǵysyz ózgeristerge órken jaıdyryp kele jatqandyǵy jáne málim.Sonyń jarqyn aıǵaǵy Qaraǵandy aımaǵynan aıqyn ańǵarylyp keledi. Jaqynda oblystyq telekommýnıkasııa dıreksııasy tanystyrýynan bilgenimizdeı, óz býyndarynda atqarylyp otyrǵan ister aýyz toltyryp aıtarlyqtaı eken. Osy oraıda Aqtoǵaı, Shet aýdandaryndaǵy aýyldyq eldi mekenderde radıoqoljetkizý tehnologııasy boıynsha telefondandyrýdyń 3 kezeńdi jobasyn iske asyrýdyń shyǵarylǵan qorytyndysy biraz jaıdy alǵa tartady.
Aldymen Aqtoǵaı óńirinde barlyq 36 shaǵyn eldi meken tolyq telefondandyrylǵanyna toqtalyp ótýge bolady.Aýdan aýmaǵynda 15 avtomatty telefon stansasy ornatylǵan, onyń 6-ýy sandyq jáne 9-y analogtyq sanalady. Aýdan ortalyǵynda bıylǵy jyl basynda 660 nómirlik WLL CDMA bir bazalyq stansa jumys isteýge kiristi. 1 sáýirden bastap oǵan 475 abonent qosyldy.
Al onymen kórshiles Shet aýdanyndaǵy 61 eldi mekenniń bári telefon baılanysy qyzmetimen qamtamasyz etilgen. Atalǵan aımaqtaǵy 19 avtomatty telefon stansasynyń 13-i sandyq, 6-ýy analogtyq bolyp tabylady. Jaqynda Aqsý-Aıýly kentinde 660 nómirge eseptelgen WLL CDMA bazalyq stansa ornatylyp, oǵan 592 abonent jalǵastyryldy.
Jalpy alǵanda «2008 jyldan WLL CDMA – 450 tehnologııasyn qoldaný arqyly telekommýnıkasııanyń aýyldyq baılanysy júıesin damytý jáne modernızasııalaý» serpindi jobasyn iske asyrý aıasynda osy ýaqytqa sheıin Qaraǵandy oblysynda quramaly syıymdylyǵy 11.163 nómirli, sonyń ishinde qalalyq telekommýnıkasııa júıesinde 800, seloda 10.363 nómirli 16 bazalyq stansa ornatyldy.
Mundaı ister aldaǵy ýaqytta jalǵasa beredi. Qaraǵandy oblystyq telekommýnıkasııalar dıreksııasynyń bas dırektory Boranbaı Amanov «Joǵaryda atalǵan jobany iske asyrýdyń bıyl 3 kezeńdigin oryndap shyǵý josparlanyp otyr. Dıreksııa jumysyn damytý baǵdarlamasyna sáıkes symsyz radıoqoljetkizý tehnologııasyn qoldaný arqyly aýyldyq telefon júıelerin damytý men modernızasııalaý 2013 jylǵa deıin jalǵastyrylady. Atap aıtqanda, Abaı, Aqtoǵaı, Qarqaraly, Shet, Jańaarqa aýdandarynda sonymen birge Shahtınsk, Saran jáne Jezqazǵan qalalarynda WLL CDMA 450 12 bazalyq stansasyn ornatý josparlanǵan. Aýyldyq telekommýnıkasııalar júıesi syıymdylyǵyn 7133 nómirge ulǵaıtý kózdelýde, – dep ortaǵa salǵandaı bul baǵyttaǵy jumys aýqymy keń.Jergilikti baılanysshylardyń tutynýshylarǵa ýaqyt talap-talǵamyna saı qyzmet kórsetý jolynda is-izdenisterdi tereńdetip, alǵa tartýy árdaıymǵy maqsaty.
Aıta ketý kerek, CDMA (Code Division Multiple Access) standartynyń ereksheligi sol, sandyq bolyp tabylady, 450 MGs dıapazonyndaǵy jıilik tolqynyn qoldanady. CDMA 450 bazalyq stansalarynyń aýyldyq jerlerdegi kómkerý aımaǵy 25-35 shaqyrymdy quraıdy. Jalǵyz stansa 1000 abonentke qyzmet ete alady.
Jobanyń serpindi sıpatty sebebi, WLL CDMA-450 jobasy shyǵyndyq, oryndalý , sondaı-aq paıdalaný keleshegi jaǵyn eskergende aýyl úshin anaǵurlym tıimdi sanalady.
Al elimiz boıynsha jobanyń iske asyrylýy kezinen bastap 420-dan astam bazalyq stansa ornatyldy. Búginde CDMA-450 júıesi Qazaqstannyń barlyq aýmaǵynda ornyqqan jáne 4750 aýyldyq eldi mekendi qamtıdy.
Telefon baılanysy qyzmetindegi jańa úrdisterdiń el ishi ortasyna qandaı ózgerister engizip jatýymen Aqtoǵaı, Shet aýdandaryndaǵy alys aýyldarda bolý arqyly tanysqan buqaralyq aqparat ókilderi turǵylyqty jurttan bul iske degen rızashylyq pikirlerdi jıi estidi. Solardyń biri qyrdaǵy qyrattar etegindegi qystaqta turatyn fermer ári belgili saıatshy Tileýqabyl Esenbekovtiń ózimizdi bylaı qoıǵanda syrt jerlermen de erkin sóılese berýge múmkindik keńdigine alǵysy sheksiz. Onyń paıdasy ásirese, isker adamdarǵa asa úlken ekenin aıtady ol.
Qashanda úlgili isterge bastamashy, óz jumys salasynda tutynýshylarǵa barsha jaqsylyqty syılaýǵa qushtar «Qazaqtelekomnyń» aımaqtaǵy bólimshesindegi isterdiń bul bir parasy ǵana. El tarıhyndaǵy aıtýly merekege súbeli úles qosýdy murat etken qaraǵandylyq baılanysshylar Táýelsizdiktiń 20 jyldyǵyna deıin áli talaı jetistiktermen qýanta bermek.
Aıqyn NESIPBAI.
Qaraǵandy.