Sondaı-aq, Elbasy óz maqalasynda: «Ekinshi, basqa aımaqtarǵa kóship ketse de týǵan jerlerin umytpaı, oǵan qamqorlyq jasaǵysy kelgen kásipkerlerdi, sheneýnikterdi, zııaly qaýym ókilderi men jastardy uıymdastyryp, qoldaý kerek. Bul - qalypty jáne shynaıy patrıottyq sezim, ol árkimde bolýy múmkin. Oǵan tyıym salmaı, kerisinshe, yntalandyrý kerek» dep aıta ketti.
Osyǵan oraı, fılantrop Oralbek Botbaı 50 jyldyq mereıtoıyna oraı, «50 jyldyqqa 50 ıgi is» aksııasyn bastap, 2017 jyly elimizde ótetin EKSPO 2017 kórmesine qoldaý kórsetý maqsatynda, mektepte úzdik oqyǵan Báıdibek aýdanynyń 30 oqýshysyna óz qarjysynan tegin bılet taratyp otyr. Shalǵaıdan keletin oqýshylardyń jol-shyǵyny men jatyn ornyn kásipker óz moınyna alyp, Halyqaralyq kórme jumysyna úles qospaq.
Ol odan bólek, jeke qarajatyna elimizdiń JOO-da gýmanıtarlyq jáne tehnıkalyq salada úzdik kórsetkishterge qol jetkizgen stýdentterge shákirtaqy taǵaıyndady. 2016-2017 oqý jyldarynda qoǵamdyq jáne akademııalyq ortada úzdik nátıje kórsetken bakalavrıattyń 10 stýdentine jańa oqý jylynan bastap, 6 aı boıyna qarjylaı kómek kórsetiledi. Mundaı shákirtaqylar jyl saıyn turaqty túrde uıymdastyrylady. Tolyq aqparatty www.oralbek.kz saıtynan bilýge bolady. Sondaı-aq, «Turan» kolledjiniń áleýmetttik jaǵdaıy tómen 5 talapkerine jańa oqý jylynan bastap, tolyq oqý grantyn bermek.