Sóz saıysyna «Aıtys aqyndary men jyrshy-termeshiler odaǵynyń» basqarma tóraǵasy Júrsin Erman tóraǵalyq etip, fılologııa ǵylymdarynyń doktory, professor Amanjol Áltaı, belgili aıtysker aqyn Dáýletkereı Kápuly, aqyn Qalqaman Sarın, kásipker Oralbek Botbaı qazylyq jasady. Aıtysty uıymdastyryp, júrgizgen – aıtysker aqyn, EUÝ qazaq ádebıeti kafedrasynyń dosenti Serikzat Dúısenǵazy. Uıymdastyrý jumystaryn úılestirgen ýnıversıtettiń Áleýmettik jáne azamattyq damý departamenti ekenin de aıta ketsek deımiz.
Tórt saǵatqa sozylǵan jyr jarysyndaǵy júırikterdiń aıaq alysy da ártúrli boldy. Kósilip shapqandary da, tosylyp jatqandary da kezdesti. Degenmen, elge endi kórinip kele jatqan jastardyń qarym-qabileti alysqa jeterine osy aıtystyń kóshin otyz jylǵa jýyq súırep kele jatqan Júrsin Erman senim bildirdi.
«Elbasynyń «Bolashaqqa baǵdar: rýhanı jańǵyrý» atty maqalasynda ulttyq sanamyzdy oıatý máselesi kóterilse, sonyń bir jarqyn mysalyn bizdiń qanymyzǵa sińgen aıtysymyzdan aıqyn ańǵarýǵa bolady. Aıtysqa qumartatyn, qazaq tiliniń dámin talǵaıtyn balalardyń qaýlap ósip kele jatqany qýantady», dedi ol.
Alaman aıtystyń qorytyndysy boıynsha bas báıgeni Q.Jubanov atyndaǵy Aqtóbe óńirlik memlekettik ýnıversıtetiniń stýdenti Álıhan Jaqsylyq jeńip aldy. Birinshi oryn EUÝ-diń stýdenti Nurǵanat Qaıratqa buıyrsa, ekinshi oryndy Qyzylordadaǵy «Bolashaq» ýnıversıtetiniń stýdenti Begjan Erjigit pen Qazaq gýmanıtarlyq zań ýnıversıtetiniń magıstranty Danııar Aldabergen ózara bólisti. Al júldeli úshinshi orynǵa Qazaq ulttyq óner ýnıversıtetiniń stýdenti Arýna Kerimbek pen Táttimbet atyndaǵy О́ner kolledjiniń stýdenti Nurmuxamed Baısúgirov laıyq dep tanyldy.
Báıgege qatysqan aqyndardyń barlyǵyna da Alǵys hattar men aqshalaı syılyqtar tabys etildi.
Raýan QAIDAR,
«Egemen Qazaqstan»