Birinshi jekpe-jekte Qazaqstan quramasynyń birinshi nómiri Qaırat Eralıev (56 kelige deıingi salmaq dárejesi) fılıppın Marıo Baýtıstamen judyryqtasyp, tóreshilerdiń sheshimi boıynsha jeńiske jetti. Ekinshi aınalymda qazaqstandyq Asror Vohıdov (Tájikstan) pen Rıomeı Tanakanyń (Japonııa) jeńgenimen jekpe-jekke shyǵady. Olardyń jekpe-jegi 3 mamyrǵa belgilengen.
Al 64 kelige deıingi salmaq dárejesinde qazaqstandyq boksshy Bekdáýlet Ibragımov Koreıanyń Inchhon qalasynda ótken Azııa oıyndarynyń júldegeri ıordanııalyq Obada Alkasbehpen judyryqtasty. Ibragımovtyń qarsylasy birinshi mınýttardan bastap alǵa bet aldy. Alaıda qazaqstandyq kontrshabýyldaryn sátti jasap, 3:0 esebimen jeńdi. Shırek fınalda qazaqstandyq Shrı-Lanka boksshysy Dýshan Saparamadýdy nokaýtqa túsirgen Irak sportshysy Karrar Aal-Ezırejben kezdesedi.
Qazaqstandyq boksshy Erjan Jomart 49 kelige deıingi salmaq dárejesindegi alǵashqy kezeńde taıpeılik Hon-Da Lınmen judyryqtasyp, 3:0 esebimen jeńdi. 1/4 fınalda qazaqstandyq Olımpıada chempıony ózbek Hasanboı Dýsmatovpen kezdesedi.
75 keli salmaq kategorııasynda judyryqtasatyn qazaqstandyq Amanqul Ábilhan Azııa chempıonatyn jeńispen bastady. Birinshi jekpe-jeginde 19 jastaǵy Amanqul qytaı boksshysy Iýn Han Venmen kezdesip, 3:0 esebimen aıqyn basymdyqpen jeńdi. Birinshi raýndta otandasymyz qarsylasyn sol qolymen soqqy jasap, nokdaýnǵa túsirdi.
Qazaqstan atynan shırek fınalǵan shyqqan qazaqstandyq - 91 kelide judyryqtasatyn Vasılıı Levıt. Ol joǵary reıtıngi arqyly aldyn ala jekpe-jekten bosatylǵan.