Din jáne azamattyq qoǵam isteri mınıstri Nurlan Ermekbaev qujattyń Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty halyqqa Joldaýynyń baǵyttaryna jáne «Bolashaqqa baǵdar: rýhanı jańǵyrý» baǵdarlamalyq maqalasyna tolyǵymen sáıkes keletinin baıandady.
Qujat jobasynda atalǵan saladaǵy memleket saıasatynyń basymdyqtary naqtylanǵan. Máselen, dinı birlestikterdiń qarjylyq-sharýashylyq jáne úgit-nasıhattyq qyzmetiniń ashyqtyǵyn qamtamasyz etý boıynsha talaptar naqty belgilengen. Sonymen qatar zaıyrly damý qaǵıdattaryn nyǵaıtý jumystary jalǵastyrylýda. Atap aıtqanda, zaıyrly memleket dinı birlestikterdiń ishki isteri men erejeleri máselelerine aralaspaıtyny, ar-ojdan bostandyǵy úshin jaǵdaılar týdyratyny aıtylǵan. Áıtse de, memleket dinı birlestikterdiń mazmundyq jáne qoǵamdyq qyzmetin rettep jáne baqylap otyrady, zańdar men memlekettiń múddelerin saqtaýyn talap etedi.
Sonymen qatar, usynylǵan qujatta dinı urandardy jamylǵan keıbir dinı aǵymdardyń ekstremıstik ıdeologııasyna qarsy turý jáne búlik salý qyzmetin beıtaraptandyrý boıynsha jalpy memlekettik júıesin qalyptastyrý týraly aıtylǵan. Barlyq salalarda – bilim, mádenıet, sport, BAQ, densaýlyq saqtaý, otbasy jáne neke ınstıtýttarynda keshendi jumystar júrgizý usynylady.
Tujyrymdamanyń júzege asyrylýy jańa geosaıası shynaıylyqtar, ishki jáne syrtqy qaterler aıasynda Qazaqstanda turaqtylyq pen qaýipsizdikti nyǵaıtýdy qamtamasyz etýge baǵyttalǵan. Bul jumystar resmı túrde tirkelgen dinı birlestikter men azamattyq qaýymdastyqty tartýmen barlyq múddeli memlekettik organdardyń tyǵyz árekettestigi arqyly júzege asyrylady.