AQSh álemdegi №1 terrorshy dep aıdar taqqan Saýd Arabııasynyń azamaty Ýsama ben Ladenniń Qurama Shtattar tarapynan júrgizilgen arnaıy operasııa barysynda qaza tapqany belgili. Oǵan qatysty operasııany AQSh Pákstan bıligine aıtpaı, qupııa túrde júzege asyrǵan. Bul jóninde keshe Qurama Shtattar prezıdentiniń terrorızmmen kúres jónindegi keńesshisi Djon Brennan málimdedi.
D.Brennan ben Ladenniń Pákstan bıliginen resmı qoldaý kórip kelýi yqtımal ekenin de joqqa shyǵarmaıdy. «Biz búginde onyń Pákstanda osynshama uzaq ýaqyt turyp kelgenin tekserý ústindemiz. Bizdińshe, ben Ladenniń Pákstan tarapynan qandaı da bir qoldaý kórgeni anyq», deıdi ol. Ben Ladenniń ústimizdegi jyldyń 2 mamyryna qaraǵan túni Pákstannyń Abbottabad qalasynda óltirilgenin eske sala keteıik.
ULTTYQ BIRLIK TÝRALY KELISIMGE KELDI
Palestınanyń básekeles FATH jáne HAMAS qozǵalystary Egıpettiń astanasy Kaır qalasynda ulttyq tatýlasý jáne bıliktiń ortaq organyn qurý týraly kelisimge qol qoıdy. Kelisim bir jyl ishinde parlament saılaýyn jáne Palestına avtonomııasynyń basshysyn saılaýdy ótkizip, partııada joq kásipqoılar arasynan birtutas «tehnokrattar úkimetin» jasaqtaýdy qarastyrady.
Saılaý naýqany men daýys berý úderisterin atalǵan eki uıym qurǵan jáne 12 adamnan turatyn táýelsiz trıbýnal baıqaıtyn bolady. Kelisim boıynsha, sonymen qatar, qaýipsizdik salasynda FATH bólimsheleri Batys jaǵalaýdy, al HAMAS Gaza sektoryn baqylaýdy júzege asyrady. Ýaǵdalastyqqa Egıpettiń jańa bıliginiń araaǵaıyndyǵy nátıjesinde qol jetken.
KADDAFIDI BILIKTEN KETÝGE ShAQYRDY
Túrkııa premer-mınıstri Redjep Taıyp Erdoǵan Lıvııa basshysy Mýammar Kaddafı bılikten dereý ketýi tıis, dep málimdedi. Túrik premeriniń sózinshe, Kaddafı elde reformalar júrgizýge shaqyrýlarǵa qaramastan, óz halqyna qarsy repressııaǵa baryp, halyqtyń kóz jasyna qalyp qana qoımaı, qanyn da júktep otyr.
Erdoǵan sóziniń túıini mynadaı: «Lıvııa kósemi – Lıvııanyń bolashaǵy, eldegi beıbitshilik pen órkendeý úshin bılik basynan ketip, tarıhı qadam jasaýy qajet». Buǵan deıin resmı Ankara M.Kaddafıge qatysty jumsaǵyraq ustanym tanytyp kelgen bolatyn. Alaıda, Túrkııa daıyndaǵan beıbit jospar Trıpolı tarapynan eshqandaı qyzyǵýshylyq týǵyzbaǵan edi.
ESEP-ShOTTARDAǴY AQShADA ESEP JOQ
Shveısarııa basshylyǵy Mýammar Kaddafı, Hosnı Múbárak jáne Zın ál-Abıdın ben Alıge qatysy bolýy yqtımal 830 mıllıon franktiń (960 mıllıon dollar) esep-shottaryn jaýyp tastady. Bul aqshanyń kóp bóligi, ıaǵnı 410 mıllıon franki burynǵy Mysyr basshysy H.Múbárakqa tıesili bolýy múmkin.
M.Kaddafıge qatystysy 360 mıllıon delinse, Týnıstiń burynǵy prezıdenti ben Alıge qatystysy 60 mıllıon frank delinip otyr. Qazir Egıpet pen Týnıs úkimeti Shveısarııa basshylyǵymen «qulyp salynǵan» aqshany qaıtaryp alý jóninde kelissóz júrgizýde. Al Lıvııaǵa qatysty qarjy týraly ázirshe áńgime joq kórinedi.
RADIOAKTIVTILIK DEŃGEII JASYRYLǴAN
Japonııa úkimeti «Fýkýsıma-1» AES-inen shyqqan radıoaktıvtilik deńgeıi týraly aqparatty jasyryp kelgenin moıyndady. Japonııa premer-mınıstriniń keńesshisi Gosı Hosono 5 myńnan astam málimet jurtshylyq tanysý úshin jarııa etilmegenin kóldeneń tartty.
«Fýkýsıma-1» AES-indegi apat ústimizdegi jyldyń 11 naýryzyndaǵy surapyl jer silkinisi jáne ol týyndatqan sýnamı saldarynan oryn alǵany belgili. Alaıda, AES-ke úlken zııan tabıǵı apattan emes, odan keıingi kúnderi, ıaǵnı energobloktar ornalasqan oryndarda sýteginiń birneshe jarylysy bolǵannan keıin kelgenin bireý bilse, bireý bilmeýi yqtımal.
QYRǴYZSTANDAǴY OIRAN ESEBI JARIIаLANDY
Qyrǵyzstannyń ońtústiginde byltyr bolǵan etnosaralyq qaqtyǵystardy teksergen halyqaralyq komıssııa óziniń esebin jarııalady. Komıssııa tóraǵasy Kımmo Kılıýnen esepti usyna kele, oırannan bárinen de ózbek qaýymynyń ókilderi kóp zardap shekkenin kóldeneń tartty.
Onyń derekteri boıynsha, qaza tapqandar arasyndaǵy ózbekterdiń úlesi 74 paıyzdy quraıdy. Dúnıe-múlikke kelgen shyǵynǵa qatysty da osyny aıtýǵa bolady. Eseptiń jarııa etilýinde sóılegen komıssııa basshysy byltyrǵy maýsym oqıǵalaryn, keıbir BAQ-tarda sol turǵydaǵy paıymdaýlar paıda bolǵanyna qaramastan, genosıd nemese áskerı qylmys dep baǵalaýǵa eshqandaı negiz joq ekenin atap kórsetti.
QYSQA QAIYRYP AITQANDA:
Kanadada 2 mamyrda parlamenttik saılaý bolyp ótti. Aldyn ala nátıjelerge sáıkes, saılaýda premer-mınıstr Stıven Harperdiń bıleýshi Konservatıvtik partııasy jeńiske jetken.
AQSh pen Rýmynııa Rýmynııa aýmaǵynda Amerıkanyń áýe shabýylynan qorǵanys júıesi elementterin ornalastyrý týraly kelisimge qol qoıǵan. Muny Rýmynııa prezıdenti Traıan Beseský málimdedi.
Reseı prezıdenti D.Medvedev eldiń terrorızmge qatysty zańyna túzetý engizý týraly jarlyqqa qol qoıdy. Ol boıynsha terrorlyq qaýipti eskertýdiń úsh deńgeıli júıesi engiziletin bolady.
Internet materıaldary negizinde ázirlendi.