Maqsat birligi – rýh birligi

ASTANA Astanadaǵy «Qazaq eli» monýmenti aldynda 1 mamyr – Qazaqstan halqynyń birligi kúni merekesine oraı saltanatty sherý ótti. El táýelsizdiginiń 20 jyldyǵyna arnalǵan bul sharaǵa Memleket basshysy Nursultan Nazarbaev qatysyp, sóz sóıledi. Qurmetti qazaqstandyqtar! – dedi Elbasy. – Bar­shańyzdy Qazaq­stan hal­qy­nyń birligi meıramymen shyn júrekten quttyqtaımyn. Biz bul merekeni erekshe atap ótip otyr­myz. Sebebi, bıyl elimiz táýel­siz­diginiń 20 jyldyǵy. Osy oraıda, búgingi merekeni birlik aıa­syn­da bastap otyrmyz. О́zderińiz de bilesizder, birlik degen sóz bizdiń ata-babalarymyzdan qalǵan óte uly, tereń maǵynaly uǵym. Biz táýelsizdigimizdiń 20 jyldyǵy ishinde birliktiń arqasynda irgeli el boldyq. Mereıimiz kóterilip, dúnıe júzine belgili boldyq. Eko­nomıkamyzdy kóterdik. Ha­lyq­tyń ál-aýqatyn jaqsarttyq. Elorda­myz­dy saldyq,  dedi Prezıdent. Keshe ǵana búkil dúnıeni dúr silkintken EQYU-nyń Sammıtin ótkizdik. Keshe ǵana biz Azııa oıyndarynda sport jarystaryn ótkizip, taǵy da dúnıe júzine keńinen tanyldyq, dep jalǵady sózin Elbasy. Qazaqstanda Azııa elderi Islam Konferensııasy Uıymynda bas qosqaly otyr. Osy­nyń barlyǵy Táýel­siz­di­gi­miz­di alǵaly bergi birliktiń arqa­syn­da júzege asty. Ekonomıka­myz­dyń turaqtylyǵynyń arqa­synda múmkin boldy. Halyqtyń ál-aýqatynyń jaqsarǵany men tynyshtyqtyń arqasynda iske asty. Bizge búkil dúnıe júzi kóz tigip otyr. Biz dinder sezin jáne túrli halyqaralyq jıyndardy uıymshyldyqpen ótkizdik. Son­dyq­tan da kúlli álem Qazaq­stanǵa iltıpatpen qaraıdy. Osylaı degen Memleket basshysy Qazaqstannyń barlyq aýmaǵynda, aýyldarda, aýdandarda, qalalarda merekelik is-sha­ra­lar ótip jatqanyn atap óte kelip, merekege jıylǵan halyqtyń bar­lyǵyn da quttyqtap, bereke-birlik tiledi. Bizdiń aldymyzda ja­saıtyn jumystar men asýlar áli de kóp. Myna shyr aınalǵan dú­nıede túrli qıynshylyqtardy bas­tan ótkerip jatqan kezde, biz­diń elde baǵdarlamalar men ón­dirister iske asyrylýda. Osynyń barlyǵy Qazaqstandaǵy birliktiń arqasynda. «Tórteý túgel bolsa, tóbedegi keledi,  altaý ala bolsa, aýyzdaǵy ketedi», degen ata-baba­larymyzda sóz bar. Son­dyq­tan da, birligimiz nyǵaıa bersin, elimizdiń irgesi berik bolsyn, jas­tar baqytty bolsyn, bolasha­ǵy­myz baıandy bolsyn, dedi Prezıdent. Memleket basshysy qazaq­stan­­dyq­tardyń bul merekeni bı­yl jańasha atap ótip jatqanyna nazar aýdardy. Sondaı-aq taıaýda bolyp ótken kezekten tys prezıdenttik saılaý halqymyzdyń birligin kórsetkenin atap ótti. Bul jáıt barlyq otandastary­myz­dyń bir jaǵadan bas, bir jeńnen qol shyǵarǵanyn aıǵaqtap berdi, dedi Nursultan Nazarbaev. Bizdiń Konstıtýsııamyz «Biz, Qazaq­stan halqy» degen sózder­den kezdeısoq bas­talmaıdy. Bir­liktiń, senimniń, kóp­ultty Qazaq­stannyń osyndaı tutas­tyǵy­nyń arqasynda biz táýelsiz el quryp, azamattarymyzdyń bolashaǵyn se­nimdi ete tústik. Qalalar, aýyl­dar sa­lyp, ónerkásipti, aýyl shar­ýashylyǵyn kóterýdemiz, ýnı­versıtetter turǵyzyp, bala­larymyzdy sheteldermen qatar, solarda oqytýdamyz. Osynyń bar­lyǵyna birliktiń, elimizdiń ju­dyryqtaı jumy­lýynyń arqa­syn­da qol jetkizip otyr­myz. Al álemde ózderińiz kórip otyr­ǵan­daı, zaýyttar toqtap, adamdar ju­mys­syz qalýda. Biz bolsaq, jańa ká­siporyndar quryp, jańa jumys oryn­daryn jasaqtaýda­myz. Dúnıe jú­zinde  dinı jáne ultaralyq túsinispeý­shilik sal­da­rynan qaqtyǵystar oryn alyp, qan tógilýde. Biz tutastyqtyń úl­gi­sin kórsetip otyrmyz. Búginde Qazaqstanda turyp, ómir súrý kim-kim úshin de már­te­be. Árbir qazaqstandyq óziniń bo­lashaǵyn bekem sanasa, bala­la­ry­nyń bolashaǵyna senimmen qaraı­dy. Biz qazaqstan­dyq­tar­dyń ju­mysy, úıi bolýy úshin, maman­dyq ıelenýi úshin, óziniń balalaryn jańa kásipterge oqytýy úshin jumys­tanýdamyz. Balalary­myz­dyń ozyq medısına mekemelerinde, ozyq mektepterde oqyǵanyn qalaımyz jáne solardy qurý ústindemiz. Bárin jasap bolǵan joqpyz, biraq jasap jatyrmyz. Bizdiń baǵdarlamalarymyz, meniń Joldaýym, 2020 baǵdarlamasy biz jaqsyraq, tynyshyraq ómir súrýge baǵyttalǵan, dedi Nur­sultan Ábishuly. Jasampazdyq isteri úshin ta­ǵy da birlik, baýyrlastyq, bar­lyq halyqtyń súıispenshiligi qa­jet ekenine ekpin túsirildi. Ke­lińizder, osy merekelerde bir-bi­rimizge degen osy súıis­pen­shi­lik­ti, qurmetti kórseteıik. Búkil álemge tu­tastyǵymyzdy aıǵaq­taı­yq. Osylaı degen Elbasy bú­ginde bizdiń tolerant­ty­lyǵy­myz­dy, birligimizdi, barlyǵymyz­dy tutastyryp otyrǵan Qazaqstan halqy Assambleıasy sııaqty tamasha organnyń jumysyn syrt­ta­ǵylar oqyp, úırenip jatqanyn atap kórsetti. «Birlik bar jerde tirlik bar» degen ata-babamyzdan qalǵan qa­ǵı­datty us­tansaq, bolashaǵymyz baıandy bolady. Jastarymyz ba­qytty bolady. Elimiz myqty bo­lady. Budan ári de Qazaq­stannyń dárejesi men mereıi arta beredi. Elimiz aman, jurtymyz tynysh bolsyn, Táýelsizdigimiz máńgilik bol­syn, barlyqtaryńyzǵa jaq­sy­lyq tileımin, dep aıaqtady sózin Nursultan Nazarbaev. Budan keıin «Qazaq eli» monýmenti aldyndaǵy alańǵa jınal­ǵan myńdaǵan qazaqstandyq merekelik sharalardy tamashalady. Iаǵnı, bul kúni eldiń ekono­mı­ka­lyq jáne saıası áleýetin da­my­týǵa, Qazaqstannyń ósip-órken­deýine kúsh jumsap júrgen qa­zaqstandyqtar, atap aıtqanda, qu­rylysshylar, kásip­kerler, jol-qurylys, kólik, bilim berý, den­saýlyq saqtaý, mádenıet sala­larynyń ókilderi, sportshylar men stýdentter merekelik sı­pat­qa saı bezendirilgen alań jáne Táýelsizdik dańǵyly boıymen júrip ótti. Máselen, «Bola­shaq­tyń irgesin birge qalaımyz» degen transparantpen merekelik sherýdiń shymyldyǵyn ashqan qurylysshylar kolonnasynyń qatarynda «Báıterek -2007», «Nord Dıalog», «Sembol Inshaat», «Shar-Qurylys», «Astana-Al­kor», «ASI», «G max company», «VEN», «Abinukas», «Altyn HHI» kompanııa­larynyń qyzmetkerleri boldy. Saltanatty shara elordadaǵy túrli etnomádenı birlestikterdiń shyǵar­mashylyq ujymdary men qazaqstandyq estrada juldyz­da­ry­nyń qatysýymen ótken konserttik baǵdarlamaǵa ulasty. Láıla EDILQYZY. ----------------------------------------- Sýretterdi túsirgender S.BONDARENKO, B.OTARBAEV.   ALMATY Alataý mamyrdyń ystyq demine bal­qyp manaýraǵandaı. Abyz taýdyń ete­gindegi Almaty keýdesine qyzyl-jasyl gúl tolyp, san túrli bulbul qus qonyp alaý­laǵandaı. Munda Qazaqstan halqy­nyń birligin merekeleý salta­nat­ty sherýmen bas­taldy. Sherý tolqyny «Astana» ala­ńyna quıylyp, onda ótip jatqan  negizgi merekelik jıyndarǵa ulasty. Sherý joryǵyna 500 baıker, velosıpedshiler men sport­shy­lar, úrmeli orkestr, etno­má­denı birlestikter ókil­deri, aýdandardyń ákimderi men qalanyń qurmetti turǵyn­dary – barlyǵy 30 myńnan astam adam qatysty. Qala ákimi Ahmetjan Esimov alma­ty­lyqtardy Birlik kúnimen quttyqtaı kele, Qazaqstanda 120-dan astam ult pen 40 konfessııa ókilderi tatý-tátti ómir keship jatqandyǵyn atap kórsetti. Ońtústik Astananyń ózinde 27 respýb­lıkalyq jáne 35 qalalyq etnomádenı birlestikter jumys isteıdi. Olardyń ja­nynda qazaq tilin oqyp-úırený jó­nin­degi 18 jeksenbilik mektep, etnostyq úsh orta mektep bar. Basqa ulttar tilderinde 9 gazet jáne 2 jýrnal shyǵady, teledıdar 5 tilde, radıo 7 tilde habar taratady. – «Biz búgin izgilik pen beıbitshilikti, halyqtyń birligin, mádenıetterdiń sa­n­alýandyǵyn jáne ózara ushtasa baıýyn pash etetin mereke – Qazaqstan halqy­nyń birligi kúnin atap ótýdemiz. Barly­ǵy­ńyz­dy osy jarqyn kúnmen shyn júrekten quttyqtaımyn. El Prezıdenti Nursul­tan Nazarbaev aıtqandaı, 1 mamyr – 20 jylda qurǵan bizdiń ortaq úıimiz, týǵan Qazaqstanymyzdyń eń basty mereke­leri­niń biri»,– dedi A.Esimov. Halyqtyń saltanatty sherýi aıaqtal­ǵannan keıin qalanyń barlyq etno­mádenı birlestikteri ókilderiniń qaty­sýy­men dos­tyq festıvali bastaldy. Merekege jınalǵandar quıqyljyǵan bı men qa­lyq­taǵan ánge keneldi. So­nymen qatar, «Astana» alańynda ult­tyq taǵamdar festıvali de tańdaı qaq­tyryp, onda tań­daýly ulttyq meıramhanalar kóz tartar ǵajaptaryn usyndy. Sondaı-aq jurt etnomádenı birlikter­diń qoldanbaly óner kórmesin qyzyǵa tamashalady. Qorǵanbek AMANJOL. * * * AQTAÝ Qazaqstan halqynyń birligi kúni qurmetindegi is-sharalar Mańǵystaý jerinde sáýirdiń 23-inen bastaý aldy. Bul jylǵy, ıaǵnı Táýelsizdigimizdiń 20 jyldyǵy qarsańyndaǵy birlik merekesi ulttar men ulystardy burynǵydan da jaqyndastyra túsetindeı sharalarmen aıshyqtaldy. Oblys ortalyǵyndaǵy etnomádenı birlestikterdiń músheleri aýdan, qalalarǵa arnaıy baryp, konserttik baǵdarlamalar kórsetti. Bul rette daǵystan, ýkraın, tatar, grýzın, qyr­ǵyz  etnomádenı birlestikteri kóp­shi­liktiń kóńilinen shyǵa bildi. Oblys ortalyǵyn ǵana emes, eldi mekenderdi kógaldandyrý, abattandyrý jumystary da qarqyndy júrgizildi. Aqtaýdaǵy 1 mamyr kúngi merekelik sherý sán-saltanatymen bastaldy. Prezıdent dańǵyly boıymen sap túzep, Astana alańynda qurylǵan sándi sahnaǵa deıin júrip ótetin sherýshilerde shek bolmady. Ony barabanshylar men úr­mel­i aspaptar orkestri bastady. Atar­ba­nyń ústindegi bıik shańyraqtyń as­tyn­da 5 sáýirde «Egemende» Elbasyna aq batasyn bergen 105 jastaǵy Názıhan Bekejanova anamyz ul-qyz, nemere, shóberelerimen jaıǵasypty. Al sha­ńy­raqtan shýaq shashyp turǵandaı alqyzyl lentalardy oblystaǵy 20 etno­mádenı birlestik ókilderi ustap keledi. Minber janyna toqtaǵan tusta ǵasyr ja­sa­ǵan ana kóp ultty halqymyz ben ke­meń­ger kóshbasshymyzǵa aq batasyn berdi. Bıshiler «Yntymaǵy jarasqan» at­ty teatrlandyrylǵan kórinisti kór­setip, 100 dombyrashy kúı atasy Qurman­ǵazy­nyń «Saryarqa» jáne «Adaı» kúılerin tart­qan soń sherý odan ári jalǵasty. Sherýshiler qatarynda aımaqtyń áıgili ardagerleri, ónerpazdary, sportshylary júrdi. Saltanatty sherýge belsene qatys­qan stýdent jastar da, orta mektep oqýshylary da alańnyń sánin keltirip, shalyqtady. Merekelik sherý aıaqtaly­sy­men «Astana» alańyndaǵy sahna tóri­ne oblys, qala men «Nur Otan» HDP MOF basshylary, eńbek ardagerleri kóterildi. Oblys ákimi Qyrymbek Kósherbaev, «Halyq kelisimi» qoǵamdyq birlestiginiń tóraǵasy Iýsýp Shahshaev jınalǵandardy merekemen quttyqtap, sahna tórinen Otan, týǵan jer, dostyq týraly ánder shalqydy. Bul kúni alańǵa jınalǵan halyqtyń kóńilderi kóterińki, júzderi jarqyn boldy. Aqtaý aspanynda án qalyqtap, merekelik saltanat qyzyǵy tún orta­syna deıin aıaqtalǵan joq. Jolaman BOShALAQ. * * * AQTО́BE Kún sanap kórkeıip, jasaryp, jań­ǵyryp kele jatqan Aqtóbe qalasy  Qazaqstan halqynyń birligi kúni merekesi qarsańynda burynǵydan góri de kóriktenip ketkendeı. Qalanyń ortalyq kósheleri men alańdary ózgeshe bir túrge enip, kóktemniń shýaǵyna maly­nyp,  jasara túsken.  Qyzyldy-jasyl­dy týlar jelbirep, ár túrli úrme sharlarmen bezendirilgen qala kósheleri on­syz da kórkem qalanyń  ajaryn ashyp, aınalaǵa ózgeshe bir ádemiliktiń, sal­tanattyń reńkin beredi. Qashanda merekelik saltanattyń  saıabaǵy ispetti qala­n­yń Ábilqaıyr  han dańǵyly boıy  qol­dary­na transparanttar men ja­laý­lar, qyzyl­dy-jasyldy sharlar ustaǵan, ulttyq kıimder kıgen  halyqqa toldy. Jan-jaqtan aǵylǵan jurt «Mır» saýda ortalyǵy mańyna jınaldy. Úsh myńnan astam adam bas qosqan sherý osy aradan bastalyp, Qazaqstan Res­pýblıkasynyń Tuńǵysh Prezıdenti atyn­daǵy saıabaqta aıaqtaldy. Saıabaqtaǵy konserttik  sahna aldyn­da segiz etno-mádenı birlestiktiń bıshileri óz halqynyń bıimen shyǵa kelgende dostyq pen birliktiń lebi esip júre bergendeı boldy. Myń buralǵan qazaq bıi orys, ýkraın, belarýs, polıak, tatar-bashqurt, qyzý qandy taý halyq­tarynyń  bılerimen jalǵasyp, jara­sym taýyp jatty. Saıabaqqa jınalǵan halyq aldyn­da qala ákimi Arhımed Mu­hambetov sóz sóılep, merekelik sal­tanatqa jınalǵan­dardy quttyqtady. Ol elimizdiń táýel­sizdiginiń 20 jyldyǵyna aqtóbelikterdiń barsha qazaqstandyqtar sııaqty erekshe daıyndyqpen, tamasha tabyspen baraty­nyn jetkizdi. Merelik saltanatqa jınal­ǵan halyq ár ulttyń áni men bıin, qazaqtyń kúıin tamashalady. San alýan túrge bólengen saıabaqta oblysty mekendegen ulttardyń ókilderi  osylaısha tilek toǵystyryp, nıet biriktirdi. Jalpy, Qazaqstan halqynyń birligi kúni merekesi burynǵydan ózgeshe ótti. Satybaldy SÁÝIRBAI. * * * ATYRAÝ Atyraý jurtshylyǵy bul merekeni jyl saıyn asyǵa tosady. О́ıtkeni, bul –dostyqtyń, birliktiń merekesi. Dál osy merekede ár ulttyń ókilderi erekshe bir tolqynyspen, erekshe shabytpen bar ónerin ortaǵa salýǵa tyrysady. Bul joly dál osylaı boldy. Aıtqandaı, Atyraý­daǵy merekelik sharanyń aldyn­da jurt­shy­l­yq sherýdi tamashalady. Sherýge qaty­sý­shylar Beıbarys sultan eskertkishi al­dyna jınaldy. Dál osy jerden Sátbaev dańǵylyn boılap, sherýshiler Isataı-Mahambet alańyna   bet al­dy. Memlekettik qyzmetkerler, depýtattar, 17 etnomádenı ortalyq ókil­deri, ár saladaǵy kásiporyn-mekemeler ujym­dary, oqý oryndarynyń oqytýshylary men stýdentteri-barlyǵy 17 kolonnany quraǵan sherýshiler aýa raıynyń qolaısyzdyǵyn elegen joq. Aýa raıy demekshi, bul kúni Atyraý­da jańbyr jaýyp turdy. Biraq merekelik sharany tamashalaýǵa jınalǵan jurt­shy­lyq ony jaqsy yrymǵa balady. «Jań­byr­dyń jaýǵany kedergi emes. Kókten jaýyp turǵan nur ǵoı bul», deıdi jara­symdy ulttyq kıimi tal boıyn sulýlan­dyryp, alaburt­qan júzi burynǵydan nur­lana túsken ýkraın qyzy Svetlana Vahnen. Ol bú­gin erekshe qýanyshty.  Jurt­shy­lyq al­dyn­da «Dovira» ýkraın etno­má­denı birlestigindegi zamandas-qurby­lary­men birge óz tilinde án shyrqady. Án aıta júrip, dóńgelene bıledi. Bul jolǵy merekelik sharanyń orny bólektigine ekpin túsirdi. О́ńir jurtshylyǵyn merekemen ob­lys ákiminiń birinshi orynbasary, «Nur Otan» HDP Atyraý oblystyq fılıa­ly­nyń tóraǵasy Bolat Dáýkenov qut­tyq­tady. Osydan keıin merekelik shara­nyń kórigin ár ulttyń ókilderi qyzdy­ryp ala jóneldi. Biri áýelete án shyr­qa­sa, endi bireýleri, ásirese, taý halqy­nyń jas órenderi ulttyq bıimen jurt­shy­lyq kóńiline jyly áser qaldyrdy. О́ńirdegi 17 etnomádenı birlestiktiń ókil­deri bir-birinen qalys qalmaı, ulttyq ónerlerin birinen biri asyra kórsetti. Joldasbek ShО́PEǴUL. * * * KО́KShETAÝ Memleketimizdiń, ár oshaqtyń eń ulyq merekelerin Táýelsizdik alańynan bastaıtyn kókshelikter Qazaqstan hal­qynyń birligi kúnin kádýilgi qut sharalardan ózgesheleý atap ótti. Ortalyq Abaı kóshesi bastan-aıaq jabylyp, bar jasaýyn taǵynyp jarqyrap tur. Búgin erterek shyqqan Kúnniń altyn shapaq­taryna malynǵan qala jurtshylyǵy jarasymdy sherý quryp, Abylaı eskertkishine basyn ıip, «Táýelsizdiktiń» tórine ozdy. Kók týlarmen qatar, «Birligi jarasqan Qazaqstan!», «Uranymyz – dostyq, Týymyz – birlik!» uranyn kótergen kóp transparanttar kóńildi kókke órletedi. – Osy rýhtandyrýshy urandarda memleketimizdiń basty maqsaty aıqyn­dalyp, bolashaǵy beınelenip turǵan­daı, – deıdi qýanysh tolqynynda qatar kele jatqan «Nur Otan» HDP oblystyq fı­lıaly tóraǵasynyń orynbasary, saıasattanýshy Ǵalym Shoıkın. Oblysymyzda 9 saıası partııa, 300-diń ústinde dinı birlestik, 161 etno­mádenı birlestik tirkelgen. Elbasy – Ult kóshbasshysy N.Nazarbaev jetis­tik­terimizdiń barlyǵyn ulttar men ulys­tardyń myzǵymas dostyǵymen, tatý-tátti tirshiligimen baılanystyratyny ǵanıbet. Bizde qaı ult bolsyn erkin damıtyny, salt-dástúrin saqtap, baıy­ta beretini konstıtýsııalyq turǵyda bekitilgen. Áıtkenmen, Táýelsizdigimizdiń talaby, ýaqyt úni sol dostyǵymyzdyń moınyna ortaq bolashaqqa qyzmet etý qundylyǵyn júktep otyrǵandyǵy kele­shektiń kemel saıasaty deýimiz kerek. Orys, ýkraın, belarýs, koreı, ázir­baıjan, tatar, nemis, túrik, polıak, armıan, taǵy basqa ulystardyń shańyraq­taryna baqyt tileı «Qazaq aýylyna» jetkenimizde shańqaı tús boldy. Birjan áni bıiktep, «Qarajorǵa» byl­qyldap, qara qazan qaınap jatyr... «Dostyq» etnoqalashyǵynyń sán-saltanatyn ta­ma­sha­laǵan qaýym «Maq­saty birdiń – rýhy bir» atty Qazaqstan halqynyń dostyq festıvalin ótkizdi. Myń san halyqty Aqmola oblysynyń ákimi, kishi assambleıa tóraǵasy Sergeı Dıachenko, Parlament Senatynyń de­pýtaty Serik Aıaǵanov, Qazaqstan halqy Assamb­leıa­synyń múshesi Gerıhan Iаndıev, aqyn Almas Temirbaı quttyqtady. Alańdaǵy shańyraqtan záýlim sharlar ushyp, halqymyzdyń arman-tilegi men aq nıetin áýeletip bara jatty. Baqbergen  AMALBEK. * * * QARAǴANDY Elimiz ómirindegi eleýli oqıǵa­lardyń saltanaty ádette qalanyń bas kóshesi Buqar jyraý dańǵyly boıynda ótedi. Ondaıǵy sátterde ol árdaıym barshanyń shalqyǵan kóńiline bólenip, nur oınaǵan júzdermen jarqyrap ásem kúıge enedi. Al jyldyń eń bir tamasha merekeleriniń  biri – Qazaqstan halqy­nyń birligi kúngi jappaı shattyq sáni tipti de jarasyp, jaınap,  ortaq qýa­nysh biriktirgen myń­daǵan júrekter lúpili búkil shahardy  jańǵyryq­tyryp áketti. «Shahter» stadıony jaǵynan bas­tal­ǵan buqaralyq sherýde óńirdegi 20 oblys­tyq   jáne aımaqtyq  36 etnomá­denı birlestik ókil­deri, qalyń qaýym qatar qadam basty. San ulttar men ulystar azamat­tarynyń bir áke men sheshe balasyndaı tós túıistirgen qu­sh­aqtary, baýyrmaldyq peıilderi týys­qan­dyqty, syılastyqty taǵy bir pash etkendeı edi. Shyndyq solaı. Alyp óndiris­tiń irgeta­sy qalanǵan shaqta, soǵys jyl­da­ryn­da synalǵan, Qazaqstan Magnıt­ka­sy­nyń domna peshteri aldynda shyńdalǵan, táýelsizdik arqasynda berikken dostyq­tyń tamyry tereńde, máni árkimge ystyq. – Men Qaraǵandy memlekettik teh­nı­kalyq ýnıversıtetinde oqımyn. Ken ınjeneri bolmaq talabym bar. О́mi­rimdegi úlken qýanyshym – memlekettik tildi jetik biletindigim. Sonyń arqa­synda qazaqy ortaǵa syılymyn. Maǵan qarap qyzyǵýshylar kóp. Qazaqsha sóı­leı bilýge qushtar. Shamam kelgenshe qataryma tartýǵa  tyrysamyn. Birligi­mizdiń tiregi retinde qadir tutýǵa úndeımin,  – dedi Nıkolaı Smolın. Kóńilderi kóktem shýaǵyndaı nurly ortada sheteldik meımandar da az  emestigi baıqaldy. Kezinde Germanııaǵa qo­nys aýdaryp, endi qaıta oralý oıyn­daǵy Pavel Feldeniń:  «Mine, shynaıy syılastyq dep osyny aıt. Sony sa­ǵynyp qalyppyz»,  deýi  júrekjardy jalǵyz syr emes-ti. Aıqyn NESIPBAI. * * * QOSTANAI «...Sendegi semse myń júrek, kelgende qaıta kóktemiń, búr jarar taǵy dúrkirep!» Qostanaıda aqyn óleń oqyp turǵandaı! Sáýirdiń   ara-tura soǵyp turǵan  ókpek je­li sap tyıylyp, kók zeńgir aspan shaıdaı ashylǵan. Tal-qaıyń kók torǵyn sháli jamylǵandaı,  jerdiń kógi de  dúrkireı kó­te­­rilgen. Tabıǵattyń jylda qaıtala­nyp, jyl­da tabyndyratyn  ǵajap sulýlyǵy  adam­­dar­dyń kóńil-kúıimen astasqan sekildi. Qostanaı kóshelerinde  halyq birligi  merekesi saltanat qurdy. Qoldaryna shar, jalaýsha ustap shyqqan qostanaı­lyqtar qalanyń ortalyq alańyna jı­nal­dy.  Údetkishten shartarapty shar­la­ǵan án  men áýen de  merekelik kóńil-kúıdi as­pandatty.  «Qazaqstannyń birligi jasa­syn!», «Beıbitshilik, Dostyq, Eńbek!»  degen, taǵy basqa da  transparanttar,  «Nur Otan» HDP  jalaýy halyqtyń birligin pash etip turǵandaı. Kópshilik jurt ulttyq kıimder  kıip kelipti.  Ár ulttyń kıimi ózinshe sándi, erekshe. –Qazaqstandyqtardy búgingi mereke olardyń ultyna, túrine, dili men dinine qaramaı bir shańyraq astyna biriktiredi.  Elimizde  san ulttyń ókilderi bir ata­nyń balalaryndaı tatý-tátti  ómir súrip otyr.  Sonymen qatar, bizdiń elimizde olardyń óz tilin, dástúrin, sal­tyn, mádenıetin umytpaı damytýǵa bar­lyq jaǵdaı jasalǵan. Osyndaı múm­kin­diktiń baǵasyn bilý, dostyqty  qas­ter­leý – árqaısymyzdyń  paryzy­myz, – dedi  aımaq basshysy Sergeı Kýlagın. – Bizdiń  Keńes odaǵy kezinde joǵalt­qanymyz kóp boldy. Tilimizdi, dástúrimizdi maqurym ettik. Biraq eń mańyzdysyn saqtap qaldyq, ol – bizdiń birligimiz. Sardar saıasat júrgizip otyrǵan Prezıdentimizge rahmet, – deıdi ýkraın halqynyń óki­li, qurmetti konsýl Anatolıı Tarasenko. Mereke kúni qostanaılyqtar túrli ult  ókil­deriniń  kúshimen qoıylǵan konsertti ta­mashalady. Án de  dostyq elshisi emes pe? Názıra JÁRIMBETOVA. * * * QYZYLORDA «Dástúrdiń ozyǵy bar, tozyǵy bar» deıdi bizdiń jurt. Eldikke, birlikke, yntymaq pen tatýlyqqa shaqyratyn, halyqty uıystyratyn, bir týdyń astyna jıystyratyn dástúrden qashý­dyń qajeti joq. Keńes zamanyndaǵy sondaı mereıli merekeniń biri – 1 mamyr bolatyn. Jurt taıly-tuıaǵy qalmaı alańǵa shyǵatyn edi. Bar ásem kıimderin kıip, jalaýshalaryn alyp, máz-meıram kúı keshetin. Degenmen, bul salt sol zamanmen birge tarıh qoınaýyna ketkendeı-tin. Biraq Elbasy Nursultan Nazarbaevtyń arnaıy tapsyr­ma­sy­men bıyldan bastap, úzilgen dástúr jalǵasyn tapty. Solaısha, Qazaqstan hal­qynyń birligi kúni merekesi búkil oblys kóleminde keń saltanatpen atalyp ótti. Kún arqan boıy kóterilgende saltanat­ty sherý bastaldy. Talaı zulmatty kózben kórgen, eli úshin etigimen qan keshken ardagerler bastady sherýdi. Árdaıym aldyńǵy shepten kórinetin Uly Otan soǵysy ardagerlerin «Eńbek Qyzyl Tý» jáne «Qurmet» ordenderiniń ıegeri Ydyrys Qalıev aqsaqal bastap shyqty. Onan keıin «Qyzylorda qalasynyń qurmetti» azamat­tary sap túzedi. Osylaısha saltanatty sherý bastalyp ketti. Qazaqstan – túrli ult pen ulystyń ba­la­sy meken etken qut qonǵan ólke. Alaýyz­dyqtan ada, birligi bekem, yntym­aǵy ja­ras­qan jurtymyz búginde bir úıdiń bala­syndaı, bes saýsaqtyń salasyndaı bolyp kún keship jatyr. Sherýdi oblystaǵy 11 etnomádenı birlestiktiń ókilderi jalǵas­tyrdy. Ulttyq kıimderin kıip, «Qazaqstan – dostyq shańyraǵy» dep urandaǵan ult ókilderi merekeniń mereıin asyrdy. Jal­py, sherýge 4 myńnan asa adam qatysty. Aýqymdy is-sharaǵa oblys sheńberindegi eńbek ujymdarynyń barlyǵy derlik at­salysty. Al saltanatty sherýdi aımaq basshylary qabyldap aldy. Qyzylorda jerindegi saltanatty is-sha­ra onan soń merekelik konsertke ulas­ty. 80-jyldardaǵy ánge bılegen halyq estra­da juldyzdarynyń ánderin tyńdap, tarqasty. Erjan BAITILES. * * * ORAL   Oral óńirinde 1 mamyr qarsa­ńyn­daǵy kúnder de, birlik merekesiniń ózi de alýan túr men tereń mazmunǵa toly boldy. Dál osy tusta oblystyq assambleıanyń kezekti keńesi men dos­tyq festıvali ótkizilip, onda táýe­l­sizdiktiń jıyrma jylynda qol jetken qundylyqtardy qadirleý jáne ony odan ári baıytý týraly oı-pikirler qozǵaldy. Al 1 mamyr kúni Oral qalasynda eńbek ujymdarynyń úlken sherýi ót­kizildi. Ol birlik pen kelisimniń barlyq kórinisteri Aqjaıyqta saltanat qur­ǵanyn pash etkendeı áser qaldyrdy. – Qazaqstandyqtardy alǵa bastaı­tyn, jeńisterge jeteleıtin, ári olardy ortaq maqsatqa toptastyra alatyn qudiret asqaq rýh pen qazaqstandyq patrıotızm dep túsinemin. Osy ekeýiniń shoǵyn úrlep otyrý qaı kezde de qajet. Bul turǵyda dál búgingideı sáni men saltanaty, máni men mazmuny kelisim tapqan sherýler ótkizý óte qajet dep sanaımyn, – deıdi 87 jastaǵy soǵys jáne eńbek ardageri Qadyr Ǵaısın. – Táýelsizdiktiń 20 jyly ishinde Qazaqstan halqynyń birligi men tatý-tátti qarym-qatynastary nyǵaıa tústi. Bul faktorlar el ekonomıkasy men mádenıetiniń órkendeýine jol ashty. Mu­nyń ózi táýelsizdiktiń eń basty jetistigi dep túsinýimiz kerek. О́ıtkeni, Qazaqstandy óz Otanym dep sanaıtyn ár túrli ult ókilderiniń birligi men kelisimi bolmaǵan jerde, alǵa basý da bolmaıdy, – deıdi Qazaqstan halqy assambleıasynyń múshesi Anatolıı Avılov. Osyndaı birligi bar eldiń bolashaǵy da tuǵyrly, baıandy bolmaq. Mine, yntymaǵy jarasqan Oral óńi­rinde keńinen atalyp ótken 1 mamyr merekesi jóninde batysqazaqstandyqtar osylaı tolǵanady. Shyn júrekten aı­tyl­ǵan osynaý aq-adal pikirler túsinik berý men qandaı da bir bolmasyn jýrnalıstik túıin jasaýdy qajet etpeıdi. Temir QUSAIYN. * * * О́SKEMEN О́zender órnektegen О́skemen erekshe túrlenip, Respýblıka alańyna jurt syımaı ketken. Kenet merekelik sherýdi júrgizýshi Qaırat Luqpanovtyń daýysy jańǵyrtyp jiberdi. «Alty Alashtyń balasy, Qaýymdasqan kúni – bul. Bir-birimen jarasyp, Baýyrlasqan kúni – bul! Kók aspanda týlardyń, Jelbireıtin kúni – bul. Elim degen uldardyń. Eljireıtin kúni – bul!». Sol-aq eken, qala turǵyndarynyń qatysýymen «Men – Qazaqstan pat­rıo­tymyn» atty merekelik sherý bas­ta­lyp  ketti. Ol el Táýelsizdiginiń 20 jyldyq mereıtoıyna arnaldy. Respýblıka ala­ńyna kópten beri halyqtyń osynshama mol jınalǵanyn kórmegen edik. Onyń ústine bıylǵy mereke sherýi jańa úlgide, jańasha sıpatta ótti. Ár ujym, mekeme, kásiporyndar men uıym­dar ózderi shyǵa­ratyn ónimder jaıly plakattar men sýretterdi kóterip alǵan, «Kazsınk», tıtan-magnıı, «Úlbi metallýrgııa» zaýyttary­nyń eńbekkerleri jyl basynan jemisti eńbek etip keledi. Dıktor ár ujym men mekemeler jaıly daýys kúsheıtkish qural arqyly habardar etip turdy. Sherý aıaqtalǵan soń oblys ákimi B.Saparbaev jınalǵandardy Qazaqstan halqynyń birligi kúni merekesimen quttyqtap, óńirde atqarylyp jatqan ońdy istermen tanystyrdy. Dostyq úıleri men ónerpazdar sahna tórine shyǵyp, án men bıden shashý shash­ty. Bir myńnan astam jas «Qara­jorǵany» bıledi. Ońdasyn ELÝBAI. * * * PAVLODAR Qaı ult ókili bolsyn jerdiń, eldiń birligin jarastyrǵan,  árıne, dostyq, tatýlyq dep jaýap bereri sózsiz.  Jalpy, áýelden orys pen qazaǵy aralas turyp kele jatqan Pavlodar oblysy dostyqtyń, tatýlyqtyń qadirin jaqsy biledi. Bir búgin ǵana emes, burynnan beri qalyptasqan dostyq, qazaq hal­qynyń baýyrmaldyǵy  búginde, mine, osyndaı úlken merekege arqaý bolǵandaı. Al  oblys ortalyǵyndaǵy barlyq merekeler qasıetti Ertis ózeniniń jaǵalaýyndaǵy  ortalyq alańnan bastaý alady. Qazaqstan halqynyń birligi kúni de osylaı  shymyldyǵyn ashty.  Erteń­gilik tup-tynyq bolyp jatqan aǵyp ózen jaǵalaýymen jeńil atletter «Densaýlyq jolynda» atty merekelik sherý – sport­tyq jarysqa shyqty. Jalpy, ártúrli taqyrypty qamtyǵan sharalar aýqym­dylyǵymen erekshelendi. Aınala ásem bezendirilgen.  Mereke dep osyny aıt degendeı áser beretin kórinister. Mine, naǵyz dýman, mereke túske qaraı bastaldy. «Armysyzdar, ardaqty aǵaıyn! Birlik pen bereke merekesi qutty bolsyn! Táýelsiz elimizdiń shańyraǵy berik bolsyn!» degen kókke áýelegen júrgizýshiniń daýysy mynaý eldiń, jerdiń ıesi kókten sóılep turǵandaı sańq-sańq estiledi. Keń ekrandy monıtordan ulttar dostyǵyn pash etken kórinister berilip jatyr. Dostyq merekesiniń sherýin Táýel­sizdiktiń qurdastary – oqýshylar, stýdentter bastady. «Men osy sherýge qatysqanyma qýanyshtymyn, óıtkeni, bizder, 1991 jyly týǵan jastar ózimizdi elimizge egemendik alyp kelgendeı sezinemiz», – deıdi stýdent Saltanat Ny­san­­bekova. Úlken sherýdiń sáni men máni bolyp,  dál ortasynda etnomádenı bir­lestikterdiń ókilderi kele jatyr. Bul kúnde oblysta 19 osyndaı etno­mádenı birlestik bar. «Bul merekeniń jóni bólek. Prezıdent Nursultan Nazarbaev bizge osyndaı qurmet kórsetip, dostyq rýhyn kóterdi, – deıdi chývash Galına Egerovna. Men jasym 80-ge kelse de osy merekeni kórýge arnaıy keldim». Farıda BYQAI. * * * PETROPAVL Birlik merekesi bıyl Petropavlda erekshe sán-saltanatpen, keńinen  atap ótildi. Meıram qarsańynda qaladaǵy Dostyq úıinde Qazaqstan halqy oblys­tyq assambleıasynyń músheleri bas qo­syp, olarǵa óńir basshysy Serik Bi­lálov jyldaǵy dástúrmen syı-qurmet kórsetti. Sodan keıin etnomádenı bir­les­tikterdiń basshylary oblys ákiminiń «20 ıgi is» bastamasyna qoldaý bildirip, Qazaqstan Konstıtýsııasy kóshesi bo­ıyna aǵash kóshetterin otyrǵyzdy. Me­rekelik saltanat N.Pogodın atyn­daǵy oblystyq orys drama teatry ǵımara­tynd­a jalǵasyn taýyp, oblystyq assambleıanyń keńeıtilgen HVI ses­sııasy bolyp ótti. Onda Qyzyljar óńi­rinde ultaralyq kelisim men turaqty­lyq­ty saqtaýǵa súbeli úles qosyp júr­gen zııaly qaýym ókilderi, etnomádenı birlestikterdiń jetekshileri marapat­ta­lyp, sońy merekelik konsertke ulasty. 1 mamyr kúni Petropavldyń orta­lyq alańyna myńdaǵan qalalyqtar men meımandar  jınalyp, merekelik úlken baǵ­darlamany tamashalady. Oblys ákimi men etnomádenı birlestikterdiń basshy­lary­nyń quttyqtaý lebizderinen keıin ártúrli ulttardyń mádenıeti men ónerin, salt-dástúrlerin belsendi nasıhattaýshy óner­paz­dar men osy kúni ulty men dini basqa bolsa da mahabbat qudiretimen qosylyp, nekeleri qıylǵan jas jubaılardyń birneshe jubyna baǵaly syılyqtar tabys etildi. Sodan soń Qyzyljar óńirinde tatý-tátti ómir súrip jatqan 100-den astam ult pen ulys ókilderi ózderiniń ásem ánderin áýeletip, myń buralǵan bılerin oryndap, dýmandy qyzdyra tústi. Ási­rese, alǵash ret 200-den astam órimdeı jas qyz-jigitter bılegen «Qarajorǵa» bıi ulttyq ónerimizdiń shoqtyǵyn bir bıiktetip tastady. О́mir ESQALI. * * * SEMEI Yntymaq pen birlik merekesi ulylar elinde de óz máninde saltanatty túrde atalyp ótti. Ortalyq alańda bastalǵan sherý qalanyń ortalyq bóligin tutastaı derlik qamtydy. Oǵan 2,5 myńnan astam adam qatysty. Ulttyq kıimderin kıip, shyrqata án salǵan etnomádenı  birlestik­terdiń ókilderi qalany sánge bóledi. Sherýge qala jastarynyń da kóptep qatysýy mereke ajaryn asha tústi. Solaısha yntymaq pen birlik merekesi kóktem, jastyq merekesine de aınaldy. Odan keıin mereıli mereke erke Ertis jaǵasynda óz jalǵasyn tapty. Munda da túrli tilde ánder molynan shyrqalyp, ulttyq oıyndar kórsetildi. Kitap kórmeleri men merekelik saýda da jurtshylyq kóńilinen shyqty. «Ertis boıyndaǵy, jalpy Qazaqstandaǵy ulttardyń bereke-birligine dos súıinip, dushpan kúıingendeı. Qashanda osy jarastyqtan aıyrmasyn», deıdi tatar etnomádenı birlestiginiń jetekshisi Ǵabdýlhaq Ahýnjanov. Qala ortalyǵy men Ertis jaǵasynda ótken dostyq merekesin shamamen 30 myńǵa jýyq semeılikter qyzyǵa tamashalady. Dáýlet SEISENULY. * * * TARAZ Qazaqtyń «Bir kún urys bolǵan úıden qyryq kún yrys ketedi» degen sózi ot basy, oshaq qasyndaǵylardy ǵana tatýlyqqa shaqyrmaıdy, sonymen birge, irgeli el, mártebeli memleketti mekendegen halyqty da beıbitshilik pen birlikke úndeıdi. Qudaıǵa shúkir, halyq danalyǵyna negizdelgen sarabdal saıasat qazaq elinde, mine, jıyrma jyl boıy saltanat quryp keledi. Al 1 mamyr – Qazaqstan halqynyń birligi kúni merekesi qazaqstandyq osy uly dostyqtyń ulaǵatty úrdisin jer-jahanǵa taǵy jarııa etti. Dostyq demekshi, oblys ortalyǵyndaǵy alańnyń «Dostyq» atanyp, al onyń tórinde alys-jaqynmen andalasyp ótken saqy minez Báıdibek eskertkishiniń turýy birlik pen tirliktiń úlgisindeı seziledi eken. Kóp uzamaı berekeli eldiń merekesin ulyqtaǵan beıbit sherý de bastalǵan. Ma­myr merekesine saı totydaı ta­ran­ǵan alańǵa «Birlik», «Dostyq», «Yn­tymaq», «Mır», «Drýjba» degen jaqsy sózdermen kómkerilgen 20 motosıklshi shyqty. Olardan keıin 20 velosıpedshi sap túzedi Kompozıtor A.Jubanovtyń «Aq kóger­shin» áni áldılegen aq kóılekti 20 qyz myń buralyp «Kóger­shinder» bıine kirisken. Áne, ánniń qaıyrmasy shyrqaý bıikke kóteriler sát­te gúlge toly sebetten aq kóger­shin­der aspanǵa samǵady. Qus qanat­tarynyń astynda «Jasasyn  jasampaz  Qa­zaq­stan!», «Aspanda beıbitshilik kóger­shin­­deri samǵaı bersin!», «Gúldene ber, kór­keıe ber, keń baıtaq – Qazaqstanym!» degen urandar sańqyldady... Beıbitshilik, birlik sherýin tamasha­laýǵa kelgen halyqty merekesimen quttyqtaǵan Jambyl oblysynyń ákimi  Qanat  Bozymbaev táýelsizdiktiń jıyr­ma jyly ishinde tigisi sógilmegen, tini ajyramaǵan osy halyq dostyǵyn tamasha jetkize bildi. ...Sherýden soń shól basý úshin Qaırat Rysqulbekov atyndaǵy saıabaq­tyń qasyndaǵy qymyzhanaǵa bas suq­qanbyz. Qazaqstandaǵy, onyń bir aımaǵy Jambyl jerindegi dos­tyqty jarııa etkisi kelgendeı, Sveta atty sary shashty qyz «Qymyz ishesiz be, álde shubat ákeleıin be?» dep qazaqsha til qatty. Buryn qandaı edi!?. Budan keıin Eldi – El dep emirenbeý, sol eldi Birlik pen Tirlikke uıym­dastyrǵan Erdi – Er dep tebirenbeý, áı, múmkin emes-aý!.. Kósemáli SÁTTIBAIULY. * * * TALDYQORǴAN Almaty oblysy. Yntymaq pen birlik merekesi Taldyqorǵan qalasynda joǵary deńgeıde, ózgeshe sán-saltanatymen ótti.  Jetisýdyń  jaýhar qalasyn mekendegen júzdegen ult ókilderi  ulttyq kıimderin kıip, án men jyr tógip, shahardy gúl jaınatyp jiberdi. Táýelsizdik kóshesimen alańǵa bettegenderdi ásem gúl kómkergen kókoraı shalǵyndy saıyn dalamen ǵana salystyrýǵa bolatyn edi. Mereke Qazaqstan halqy Assambleıa­sy quramyndaǵy etnomádenı birlestikter ókilderi, halyqtyq óner ujymdary, «Ula­ǵat» aqsaqaldar alqasy músheleri men jer jánnaty Jetisý óńirinde bir jaǵadan bas, bir jeńnen qol shyǵarǵan ulttar ókil­deriniń birlikti tý etip jatqandyǵyn taǵy bir aıǵaqtap, kóńil­derde oryndy maqta­nysh sezimin oıatty deýge bolady. Ortalyq alań kóz tartarlyqtaı bezendirilgen. Ásirese, qazaqtyń qasıetti shańyraǵyn beıneleıtin kórinis erekshe nazar aýdararlyq. Qasıetti shańyraq Qazaqstan bolsa, merekege bar sán-saltanatymen qatysqan ulttar ókilderi oǵan tirek bolǵan ýyq ispetti. Úı bos­a­ǵa­synyń beriktigi tatýlyqqa baılanys­ty ekeni daýsyz. Tujyrymdy dálel­de­gen­deı, ár ulttyń tilindegi quttyq­taýlar shadyman shattyqty shalqytty. Jınalǵan halyqty oblys ákimi Ansar Musahanov quttyqtap,  shynaıy tatýlyq pen birlikti, ultaralyq syıla­sym men jarasymdy ardaq tutqan kópultty memleketimiz úshin bul meıramnyń máni zor ekenine ekpin berdi. Elbasy Nursultan Nazarbaevtyń syndarly saıasaty nátıje­sinde el ekonomıkasy serpindi damý ús­tinde ekendigine, elimizdiń mundaı úlken jetistikke halyqtyń birligi arqasynda qol jetkizilgenine toqtaldy. Quttyqtaýdan soń shara «Maqsattar birligi – rýh birligi» atty merekelik sherýmen  jalǵassa, ol qyzyqty konsertke ulasyp, keshkisin jastardyń bı keshimen támamdaldy. Kúmisjan BAIJAN. * * * ShYMKENT Qazaqstan halqynyń birligi kúni merekesine oraı oblys ákimdigi men oblys­tyq assambleıa hatshylyǵy uıymdas­tyrǵan aksııa “Qazaqstanǵa ystyq y­qylaspen” dep ataldy. Birlik kúnine oraı­lasty­rylǵan sharaǵa shaqy­rylǵan burynǵy ońtústikqazaqstandyqtardyń qy­ryqqa jýyǵy keldi. О́z tarıhı otanyna, ózge jerlerge qonys aýdarǵan azamattardyń júreginiń bir túkpirinde Qazaqstanǵa degen uly saǵynysh jatyr eken. Búginde Máskeý qalasynda turatyn jazýshy Anatolıı Kımniń týǵan jeri – Túlkibas aýdanyndaǵy Sergeevka aýy­ly. “Meniń dúnıeniń tórt bury­shyna jolym tústi. Kedendik rásimdeýde tól­qujatymdy ejiktep oqyp, Qazaqstan jaıly surar edi. Men Túlkibasta týdym. Keıin, eki jasqa tolǵanymda Úsh­tóbe qalasynda turatyn aǵaıyn­darymyzǵa kóshippiz. Koreıler – eńbek­qor halyq. Qıyr Shyǵysta baý-baqsha­syn, egisti alqabynyń ónimin endi jınap alyp jatqan koreılerdi 1937 jyly eshqandaı júksiz, mal artatyn eshe­londarǵa tıep, Qazaqstanǵa jer aýdarypty. Ata-anamyz: “Bizdiń tiri qalýymyzǵa qazaqtar sebepker boldy. Qolyndaǵy dámin bólisti. Janynan jaı berdi. Osyny umytpańdar”, dep otyra­tyn. Biz muny umyta almaımyz. Oń­tústikten shaqyrtý kelgende, sha­rýam­nyń bárin jınap tastap, osynda asyqtym», deıdi ol.    Osyndaı lebizderdi ynty­maq kúni ár ult ókilderinen estidik. Ál-Farabı atyndaǵy alańǵa 1 mamyr kúni halyq kóp jınaldy. Oblystaǵy 21 etnomádenı birlestik ókilderi, joǵary oqý oryndary men kolledj stýdentteri sán-saltanatymen kópshilik aldynan sherý jasap ótti. Sońy konserttik baǵdarlamaǵa ulasty. Baqtııar TAIJAN.