Qostanaılyqtar kómegi

Qarǵyn  men Jaıyqtyń ta­sýy­nan bolǵan  apattan zardap shekken batysqazaq­stan­dyq­tar­dyń  jaǵdaıyn Qostanaı jurty  kúndelikti  aqparattardan qadaǵa­lap otyrdy. Tabıǵı apattyń qaı­sy­syna bolsa da qarsy turýǵa  adamnyń qolynan keler kúsh az eken. Qanshama otbasy kóktemniń  salqyn kúnderinde  bar jıǵan-tergeni men baspanasyn sýda qal­dyryp zardap shekti. Mektepter jaramsyz bolyp, sýda qalǵan­dyq­tan balalardyń oqýyna da  keri áseri bar ekeni anyq.  Osynyń barlyǵyn oılaǵan qostanaı­lyq­tar qarap otyra almady.  Oblys­tyq máslıhat depýtattary bas qosyp, oblys bıýdjetinen 100 mıllıon teńgeni Batys Qazaq­stan­daǵy  sý tasqynynan bolǵan apattyń zardaptaryn joıýǵa bólýge bátýalasty.  Onyń syr­tynda  irili-ýaqty  kásiporyndar, kásipkerler jáne jalpy Qosta­naı jurtshylyǵy aqshalaı qar­jy­laryn ekinshi dárejeli bank fılıaldary men «Kazposhta»  ar­qyly aýdaryp jatyr. Búginge deıin jınalǵan qarjy 5 mıllıon 300 myń teńgeden asty. Tasqyn sýdan  zardap shekkenderge qostanaılyqtar kórsetken kómek  munymen shektelmeıdi. «Sa­do­vod» jáne «Terro» JShS 34 tonna kartop, «DEP» fırmasy 8 tonna sút ónimderin, «Stofarm» dári-dár­mek, ózge de saýda oryn­dary, ká­sip­oryndar  tósek-jab­dyq­tar, kıimder artqan kerýen Batys Qazaq­stan­ǵa attandy. Osy  azyq-túlik pen kıim-keshektiń ózi on bir mıllıon  teńge shamasynda bolady. Apatty aımaqqa  kómek retinde qarjy jınaý isi  oblysta  áli de jalǵasady. Názıra JÁRIMBETOVA. Qostanaı.