Mádenı yqpaldastyq aıasyndaǵy aptalyq

Keshe Astanada «Koreıa Respýblıkasynyń Qazaqstandaǵy jy­ly­nyń» ashylýyna oraılastyrylǵan baspasóz konferensııasy ótti. Bul sharaǵa Koreıa Respýblıkasynyń Qazaqstandaǵy elshiligi uıyt­qy boldy. Baspasóz máslıhatyna Koreıa Respýblıkasynyń Mádenıet, sport jáne týrızm birinshi vıse-mınıstri Mo Chhol-mın, Koreıanyń ulttyq brendıng jónindegi prezıdenttik keńesiniń tóraıymy Lı Be-eng, kópshilik qaýymǵa «Hanzada Jýmong» serıaly arqyly tanys belgili ońtústikkoreıalyq akter Son Il-gýk, ánshi So-Eng-yn, koreıdiń dástúrli «Chongdong» teatrynyń ak­terleri, sondaı-aq, «T-MAX» jáne «JQT» mýzykalyq top­ta­ry­nyń ánshileri qatysty. Qazaqstan men Koreıa Res­pýb­lı­kasynyń dıplomatııalyq yn­ty­maqtastyǵy 1992 jyldan bastaý alǵan. Osy ýaqyt aralyǵynda qos memleket arasynda túrli salada jan-jaqty baılanys orna­ǵan. Iаǵnı, eki el áriptestigi eko­no­mıka jáne saıasat salalarymen ǵana shektelmeıdi. Búginde máde­nı saladaǵy áriptestik te belgili deńgeıde jandanyp keledi. Má­selen, 2010 jyly «Qazaqstan­nyń Koreıadaǵy jyly» sheńbe­rinde túrli mádenı sharalar uıymdastyrylyp, koreı halqy Qazaqstan tarıhy men mádenıe­tiniń ózine tán ereksheligi jó­ninde keńirek málimet alǵan edi. Bıylǵy jylǵy «Koreıanyń Qa­zaq­standaǵy jylynyń» kózdegen maqsaty da áriptestiktiń osy bir tinin nyǵaıtý bolyp tabylady. «Men «Koreıanyń Qazaq­standaǵy jylyna» arnalǵan sha­ralarǵa qatysýǵa Qazaqstanǵa arnaıy keldim. Osy oraıda, sizdiń elderińizde ótetin «Koreıa Respýblıkasynyń Qazaqstandaǵy aptalyǵy» festıvali  qazaqstan­dyqtardyń koreı halqynyń má­denıetimen, ónerimen jaqynyraq tanysýyna múmkindik berip qana qoımaı, eki eldiń bolashaqtaǵy yqpaldastyǵyna da óz áserin tıgizedi dep oılaımyn», – dedi Koreıanyń ulttyq brendıng jó­nindegi prezıdenttik keńesiniń tóraıymy Lı Be-eng óz sózinde. Al Koreıanyń Mádenıet, sport jáne týrızm birinshi vıse-mınıstri Mo Chhol-mın ótken jyly «Qazaqstannyń Koreıa Respýblı­ka­syndaǵy jyly» ótkenine, bul shara Qazaqstan týraly tereńirek málimet alýǵa múmkindik bergenine toqtalyp ótti. «Al bıyl biz óz elimizdiń mádenıetimen, tarıhy­men  jaqynyraq tanystyrý maq­satymen Qazaqstanǵa keldik. Osy oraıda, 30-ǵa tarta shara ótpek», – dedi  Mo Chhol-mın. Bul kúni keshke elordadaǵy «Qazaqstan» ortalyq konsert za­lynda «Koreıa Respýblıkasynyń Qazaqstandaǵy jylynyń»  ashy­lý saltanaty ótti. Ashylý rá­simine Koreıanyń Qazaqstandaǵy elshisi Lı Ben Hva, Koreıanyń Mádenıet, sport jáne týrızm birinshi vıse-mınıstri Mo Chhol-mın, elimizdiń Mádenıet vıse-mınıstri Asqar Bóribaev, son­daı-aq, óner jáne mádenıet ókil­deri qatysty.  Konsertke jıyl­ǵan qaýym belgili ońtústik­koreıalyq ártistermen júzbe-júz kezdesip, dástúrli «Chongdong» teatry akterleriniń, «T-MAX», «JQT» toptary ánshileriniń óne­rin tamashalaýǵa múmkindik aldy. Bir aıta keterligi, «Koreıa Respýblıkasynyń Qazaqstandaǵy aptalyǵy» mamyrdyń 6-synan 9-yna deıin jalǵasady. Iаǵnı, dál osy kúnderi qala turǵyndary men qonaqtary «Han Shatyr» oıyn-saýyq ortalyǵynda koreı­diń kınolaryn kórýge, sondaı-aq, osy eldiń týrızmin, onyń ishinde tabıǵat jaýharlaryn nasıhat­taıtyn fotokórmeni tamashalaýǵa múmkindik alady. Láıla EDILQYZY.