Keshe Qazaqstan Respýblıkasy Parlamenti Májilisi Halyqaralyq ister, qorǵanys jáne qaýipsizdik komıtetiniń hatshysy Vıktor Rogalev Lıtva Respýblıkasynyń Qazaqstan Respýblıkasyndaǵy Tótenshe jáne ókiletti elshisi Rokas Bernotaspen kezdesti.
Meımandy Parlament qabyrǵasynda qarsy alǵan V.Rogalev elshiniń Qazaqstandaǵy qyzmetine tabys tiledi. Eýropadaǵy qaýipsizdik jáne yntymaqtastyq uıymy tóraǵalyǵynyń tizginin alǵan Lıtva elimizdiń Baltyq aımaǵyndaǵy saıası seriktesi bolyp, ekonomıkalyq baılanys óris alǵan. Ekijaqty kelisimder júzege asyrylýda.
Lıtva Seımi men Parlament Májilisi arasynda joǵary deńgeıde dostyq pen yntymaqtastyq baılanystarǵa toqtalǵan komıtet hatshysy V.Rogalev eki el jemisti jumystar atqaryp otyrǵanynan habardar etti. «Lıtva 2014-2015 jyldarǵa BUU Qaýipsizdik Keńesiniń turaqty emes músheligine óz kandıdatýrasyn usynyp otyrǵanyna Qazaqstan qoldaý bildiredi. Aldaǵy jyldarda tarıh eki eldi halyqaralyq bedeldi uıymdarǵa qatarlasa tóraǵalyq jasaýdy jazǵan eken, sol jolda ózara demeý tanytaıyq», – dedi.
Sońǵy ekonomıkalyq álemdik daǵdarysqa qarsy otandyq ekonomıkany turaqtandyrý jolynda Lıtvanyń jasap otyrǵan sharalaryn Qazaqstan joǵary baǵalaıtynyn da málimdedi.
140 ult pen ulystan turatyn memlekettegi el birligi men yntymaǵy jáne Qazaqstan halqy Assambleıasy jaıyna toqtaldy.
Elshi áńgimeni ózine Almatydan Astanaǵa Lıtva Respýblıkasynyń elshiligin kóshirý jaýapkershiligi júktelgeninen bastady. Eki el Memleket basshylary Astana Sammıtinde kezdeskeni, EQYU-ǵa tóraǵalyq tizgini ózderine ótkeni, aldaǵy kúzde de osyndaı kezdesýler kútip turǵany jóninde aıtyp ótti. «Ortalyq Azııadaǵy eń negizgi seriktesimiz bolyp tabylatyn Qazaqstan men Lıtva arasyndaǵy ekonomıkalyq qarym-qatynas qaryshtap damyp keledi», – degen elshi ózderi Nursultan Nazarbaevtyń «Eýropaǵa jol baǵdarlamasyn» qoldaıtyndyqtaryn jetkizdi.
Sáýle DOSJANOVA, jýrnalıst.