Aqyn professor atandy

A.Baıtursynov atyndaǵy Qostanaı memlekettik ýnıversıtetinde belgili aqyn Aqylbek Shaıahmettiń jyr keshi ótti. Bilim ordasynyń  úlken akt zaly aqyn óleńderin tyńdaýǵa kelgen stýdent jastarǵa jáne  qala turǵyn­daryna toldy.  Aqylbek qazaq óleńin ómirine balaǵan aqyn ǵana emes, jastardy bilimge sýsyn­da­tý­ǵa  úlken úlesin qosyp júr­gen ustaz da.  Sóziniń sońyn «Aqyl­bekti maqtaımyz da, Aqyl­bekpen maqtanamyz da» dep aıaq­taǵan ýnıversıtet rektory Asqar Nametov oǵan  «A.Baıtursynov atyndaǵy Qostanaı memlekettik ýnıver­sıtetiniń akademııalyq pro­fes­sory» ataǵynyń kýáligin tap­syrdy. Aqylbek Shaıahmettiń alpys asý ýaqyt ishinde 30 kitaby jaryq kóripti.  Aqyn balalar poe­zııasyna da atsalysty.  Sonymen qatar, onyń dramatýrgııalyq jáne zertteý  shyǵarmalary da oqyr­manynyń jyly iltıpatyna ıe bolǵan edi. Ybyraı Altynsarın, Ahmet Baıtursynov týraly jaz­ǵan  shyǵarmalary oblystyq qa­zaq drama teatrynyń  reper­týa­rynan oryn alǵan. Arqanyń taq-taq aqyny atanǵan Nurjan Naý­shabaevtyń shyǵarmalarynan ǵy­lymı eńbek te qorǵady.  Qos­tanaı óńirindegi  aýyz ádebıeti  marjandaryn mysqaldap jınaýda da Aqylbek Qojaulynyń eńbegi zor. Aqylbek Shaıahmet óleńderin  orys tildi oqyrmanǵa jetkizýde aqyn Abdrahman Dos kóp eńbek sińirdi. Bıyl negizinen onyń  aýdarmasynan turatyn  aqynnyń óleńder kitaby orys tilinde ja­ryq kórmek. Keshke jınalǵan ózge ult ókilderi aqynnyń óleńin Abdrahman Dostyń jáne óziniń oqýynda tyńdady. Sonymen qa­tar, keshte  orys bala baqsha­lary­nyń búldirshinderi, kolledj­der­diń, ýnıversıtettiń ulty qazaq emes stýdentteri  aqyn óleńderin qazaq tilinde oqydy.  Tobyl óńi­rinde ana tilimizdiń qanatyn erkin jaıýy úshin kúreskerlik ustany­mynan taımaǵan aqynnyń  ar­many  da osy edi. Názıra JÁRIMBETOVA, Qostanaı.