Yqpaldastyqty arttyrý baǵytyndaǵy qadamdar

Qazaqstan Respýblıkasynyń Premer-Mınıstri Kárim Másimov keshe Belarýs Respýblıkasynyń astanasy Mınsk qalasyna ushyp keldi. Munda ol osy kúni TMD-ǵa múshe memleketter Úkimet bas­shy­lary keńesiniń shaǵyn jáne ke­ńeıtilgen quramda ótken oty­rys­taryna qatysty. Sol sııaqty K.Másimov EýrAzEQ Memleket­ara­lyq keńesiniń úkimetter bas­shy­lary deńgeıinde ótken keńeı­tilgen otyrysynyń jumysyna da qatysty. Kún tártibine 19 másele engizilip otyr. Onda TMD-ǵa múshe memleketterdiń ekonomıkalyq sa­la­daǵy qyzmettestigi taqy­ryby basymdyqqa ıe bolmaq. Áńgime TMD keńistiginde saýdany keń aýqymdy beıtaraptandyrý úshin qajetti qazirgi zamanǵy talaptarǵa jaýap beretin biregeı kelisim-shart­tyq baza qalyptastyrýǵa, ózara saýda­daǵy kóptegen kedergilerdi joıýǵa baǵyt­tal­ǵan Erkin saýda aımaǵy týraly kelisim-shartqa qol qoıý, sol sııaqty TMD-ǵa múshe memleket­terdiń 2020 jylǵa deıingi kezeńge arnalǵan ınnovasııalyq qyzmettestiginiń memleketara­lyq baǵdarlamasynyń aldyn-ala ázirlengen jobasy jóninde bolyp otyr. Sonymen birge, ónegelilik qundylyqtar men mádenı muralar negizinde mádenıettiń, bilim berýdiń jáne ǵylymnyń aıryqsha ınte­gra­sııalyq áleýetin paıdalana otyryp júr­gi­zile­tin mádenıetaralyq únqatysý salasyn­da­ǵy gýmanı­tarlyq qyzmet baǵyty da mańyzdy bolyp tabylady. Basqosýda azyq-túlik qaýip­sizdigi, TMD-nyń sala­ara­lyq qyzmettestik organdaryn qurý, buryn qabyldanǵan qujattarǵa ózgerister engizý jáne ózara yqpaldastyqtyń basqa da ba­ǵyttary áńgime ózegine aınaldy. «Egemen-aqparat».