Mýamar Kaddafıdiń bılikte qalý-qalmaýyn AQSh prezıdenti emes, tek Lıvııa halqy ǵana sheshýge quqyly, dep málimdedi Trıpolıde Lıvııa úkimetiniń resmı ókili Mýsa Ibragım.
Ibragım Amerıka prezıdentiniń 19 mamyrdaǵy AQSh memlekettik departamentinde sóılegen sózine osylaısha jaýap qaıtardy. Lıvııa úkimeti ókiliniń aıtýynsha, prezıdent Obama onyń óz úkimeti men buqaralyq aqparat quraldarynyń búkil álemge taratqan jalǵan aqparatyna senip, óziniń qate túsinikterin áli kúnge deıin ózgerte almaı keledi.
Kepildik somasy – 1 mıllıon dollar
Manhettenniń qylmystyq soty Halyqaralyq valıýta qorynyń burynǵy dırektory Domınık Stross-Kandy 1 mıllıon dollar kepildikpen túrmeden shyǵarýǵa kelisim berdi.
Ol budan bylaı únemi sot oryndaýshylarynyń baqylaýynda bolady. Álemdegi eń yqpaldy qarjy uıymdarynyń biriniń burynǵy dırektorynan Nıý-Iork qalasynan ketpeý jóninde qolhat alyndy. Sonymen birge Stross-Kannyń búkil qujattaryn sypyryp alyp, aıaǵyna arnaıy elektrondy bilezik kıgizgen. Ol onyń qaıda júrgenin kez kelgen ýaqytta kórsetip turatyn bolady.
Túrkııadaǵy jer silkinisi
Túrkııada bolǵan 5,7 balldyq jer silkinisi saldarynan zardap shekkender sany 120 adamnan asyp, sonyń ishinde 4 adam qaza tapqan.
Jerasty dúmpýleri jergilikti ýaqyt boıynsha 23.15 mınótte tirkelgen. Onyń oshaǵy Kıýtahıa provınsııasynyń Sımav ýezinde bolǵan kórinedi. Jerasty dúmpýleri Túrkııanyń batysy men ortalyǵyndaǵy birqatar aýdandarda, sonymen birge Ystambulda da sezilgen. Kýágerlerdiń aıtýynsha, zilzalanyń qatty bolǵany sondaı, alǵashqy sátterde adamdar oryndarynan qozǵala da almaı qalypty.
AQSh aqsha tóleýden bas tartty
AQSh úkimeti «Ál-Kaıda» kósemi Ýsama ben Ladendi ustaǵandarǵa tólenýge tıis 25 myń dollar syıaqynyń eshkimge berilmeıtindigin habarlaǵan.
Olar ony ben Ladenniń málimet berýshilerdiń habarlaýy boıynsha emes, ınternet arqyly baqylaý nátıjesinde qolǵa túskenimen túsindirýde. Shynymen de, ben Ladenniń qaıda ekendigi onyń jaqyn kómekshileriniń biriniń ınternette jibergen qateliginiń saldarynan ashylyp qalǵan. Sol sebepti de AQSh úkimeti óz ýádesinen aınyp ketip otyr.
Mıronovtyń pikiri ishinara rastaldy
Sergeı Mıronovty Federasııa Keńesinen keri shaqyryp alý jónindegi «Edınaıa Rossııa» partııasynyń bastamasyna bar bolǵany 20 paıyz reseılikter ǵana qoldaý kórsetken.
Al eger Federasııa Keńesiniń burynǵy spıkeriniń Sankt-Peterbýrg Reseıdegi eń korrýpsııaly qala degen sózine kelsek, ol ishinara rastalyp otyr. «Qoǵamdyq pikir» qory júrgizgen saýaldama boıynsha Sankt-Peterbýrg korrýpsııaly qalalar ishinde Kamchatkamen jáne Soltústik Osetııamen birlesip 2-4 oryndardy bólisken. Al Sankt-Peterbýrgte korrýpsııanyń bar ekendigin basqa da birqatar saıasatkerler de moıyndap otyr.
Ázirbaıjan «Evrovıdenıe-2012»-ge daıyndalýda
Ázirbaıjan prezıdenti Ilham Álıev óz jarlyǵymen «Evrovıdenıe» án baıqaýyn keń aýqymda ótkizýge daıyndyq jóninen uıymdastyrý komıtetin qurdy, dep habarlady memleket basshysynyń baspasóz qyzmeti.
Dıýsseldorf qalasynda 15 mamyrda aıaqtalǵan «Evrovıdenıe» án baıqaýynda ázirbaıjandyq dýet Ella men Nıkıdiń jeńiske jetkeni belgili. Osy baıqaýǵa 2008 jyldan beri turaqty qatysyp kele jatqan Ázirbaıjan bıyl 221 ball jınap, alǵash ret jeńimpaz atanyp otyr. «Evrovıdenıe» erejesine sáıkes kelesi baıqaý jeńimpaz elde, ıaǵnı Ázirbaıjanda ótetin bolady.
Leıderman Reseıden nelikten qýyldy?
Izraıldiń áskerı attashesi Vadım Leıdermandy jeke kompanııanyń múddesin qorǵaýǵa talpynys jasaǵany úshin Reseıden shyǵaryp jiberdi, dep jazady «Vedomostı» gazeti.
Reseı áskerı ónerkásibinen taraǵan aqparat boıynsha Leıdermen Elbit atty jeke fırmanyń ushqyshsyz ushatyn áskerı ushaqtaryn Reseı rynogyna shyǵarýǵa talpynys jasaǵan. Sonymen birge qazirgi ýaqytta Oral azamattyq avıasııa zaýytynda IAI memlekettik kompanııasynyń lısenzııasy boıynsha ushý apparatynyń qurastyrylyp jatqany belgili bolyp otyr. Izraıl qorǵanys mınıstrligi Leıdermandy Reseıden esh sebepsiz shyǵardy dep esepteıdi.
Ázil túbi – zil
Danııalyq rejısser jáne ssenarıst Lars fon Trıer Kann kınofestıvaliniń ózin «non grat personasy» dep málimdegenine tań qalǵanyn, sonymen birge festıvaldiń búkil tarıhynda mundaı oqıǵanyń eshqashan bolmaýy sebepti óz mártebesin maqtan tutatynyn habarlaǵan.
Ol bul janjaldyń ózine shyǵarmashylyq serpilis berip, onyń jumystaryn burynǵydan da góri revolıýsııashyl etýi múmkin ekenin atap kórsetken. Aıta ketý kerek, janjal rejısserdiń Gıtlerge búıregim burady jáne «azdap nasıst» bolyp tabylamyn degen «ázilinen» keıin týyndaǵan bolatyn.
Soltústikkoreıalyq zymyrandardan qater joq
Reseı bas shtaby Soltústik Koreıanyń zymyran baǵdarlamasynan týyndaıtyn shynaıy qaterdi kórip otyrǵan joq, dep málimdegen RF qarýly kúshteri bas shtaby bas basqarmasy bastyǵynyń orynbasary V.Kondrashov.
Bas shtabtyń málimeti boıynsha, Soltústik Koreıanyń zymyran baǵdarlamasy eleýli qaýip týǵyza almaıdy. О́ıtkeni, «Tephodon» zymyranynda úshinshi saty men ıadrolyq oqtumsyq joq. Al olardy tehnıkalyq turǵyda júzege asyrý Soltústik Koreıanyń qolynan kelmeıdi, dep habarlaǵan Kondrashov eýropalyq zymyranǵa qarsy qorǵanys máselesine oraı ótkizilgen baspasóz máslıhatynda.
Internet materıaldary negizinde ázirlendi.