Torqaly toıǵa toǵyz syı

Elordaǵa 22-30 mamyr ara­ly­ǵynda gastróldik saparmen kelgen Qazaq memlekettik akademııalyq Abaı atyndaǵy opera jáne balet teatry el Táýelsizdiginiń 20 jyldyǵyna tartý retinde segiz tańdaýly opera jáne balet qoıylymyn usynyp otyr. Al merekelik shara negizgi partııalardan ázirlengen gala-konsertpen qorytyndylanbaq. Jetpis bes jyldan astam tarı­hy bar elimizdiń bas teatry óziniń negizgi spektaklderin torqaly toıǵa shashý retinde usynýda. Gastróldik sa­par­dyń shymyldyǵy A.Jubanov pen L.Ha­mıdıdiń «Abaı» operasy­men ashy­­lyp, A.Serkebaevtyń «Tilep já­ne Saryqyz» baletimen jal­ǵasty. Re­pertýardaǵy munan basqa da sah­na­lyq týyndylar álem klas­sıka­sy­nyń kil injý-marjandary – Dj.Ver­dıdiń «Travıata», R.Vag­ner­diń «Tan­geızer», G.Donısettıdiń «Mahabbat sýsyny» operalyq shy­ǵar­malary men A.Hachatýrıannyń «Spar­tak», P.Chaı­kov­skııdiń «Serenada», S.Pro­ko­fev­­tiń «Romeo men Djýletta» baletteri. Otandyq opera men balet ónerin órge súırep júrgen QR halyq ártisi Nur­jamal Úsenbaeva, QR eń­bek sińirgen ár­tisi, Memlekettik syı­lyqtyń laý­reaty Shahımardan Ábilev, QR eń­bek sińirgen qaıratkeri Jámıla Bas­paqova, Bolat Bókenov, Beıimbet Qo­ja­baev, halyqaralyq baı­qaý­lardyń laýreat­tary Dına Hamzına, Dına Dútmaǵam­betova, Jánel Túkeeva, Nurlan Qonaq­baev, Ámir Jeksenbek, Gúlvıra Qur­banova, Farhad Bórıev sııaqty t.b. sańlaq­tar sahnada toǵyz kún toqtaý­syz óner kórsetkende, kó­kirek kere mól­dir aýamen bir ty­nys­taǵandaı áser alýdyń ózi zor ǵanıbet emes pe? Shymyldyqtyń ejelden qyry men syry jurtqa málim, kóp jyldar sahna tórinen túspeı kele jatqan «Abaı» operasymen ashylýy beker emes. Abaı – qaı dáýirdiń de sanasy men sahnasynda qatar ómir súretin alyp tulǵa. Ol – jasaryp, jańǵy­ryp, aqyl-oıdyń darııasyna jetken jasynda qaıta dúnıege kelip, ár ur­paq, ár dáýir óz paıymynda paraq­tap oqyp otyratyn kitap. Úzilmeı kele jatqan úrdiske úlbirep jastar kelgen saıyn óz taraptarynan tyń tynys pen saf saryn qosyp oty­ra­tyny taǵy bar. Abaı arqyly teatr­dyń talaı býyny ósip jetilýde. Tól tamyr­dan nár alǵan jerdiń shóbi shúıgin, qyrany tuıǵyn bolyp keletini sııaq­ty dástúrge berik ujymnyń únemi bıikten kóriný sebebin alys­tan izdep áýre bolýdyń qajeti joq. Ony mu­nyń repertýar shyńyna qaı­da barsa da ulttyq operany qoıý tı­n­aqty­ǵy­nan tanısyz. «Abaı» – teatr­dyń sondaı tólqujaty, bet-beınesi. Kásibı deńgeıdi osyndaǵy basty partııala­r­dy oryndaýdan ajy­ratady. Budan jo­­ǵary baǵa alyp shyqqan adam álemdik klassıkanyń qaısybir syny­nan da súrinbeı óte­ri­ne senim mol. «Abaı» – qazaq ulttyq opera óneriniń mektebi ispetti desek, elordadaǵy sahnalyq kórinisten sol baǵa aıqyn ańǵaryl­ǵan. Abaıdy sha­shaýsyz beınelegen Sha­hımardan Ábilev, Ajar­dy somda­ǵan Nurjamal Úsenbaeva, sondaı-aq, Aıdar, Jırenshe partııa­laryn múl­tiksiz oryn­daǵan Nurjan Bojakenov, Talǵat Kúzenbaev eńbek­terine qandaı maq­taý sóz aıtsa da artyqtyq etpeıdi. Qarashash TOQSANBAI.