Bıyl úshinshi jyl at sporty boıynsha balalar sport mektebi men Batys Qazaqstan oblystyq Ishki ister departamenti birlese otyryp saıajaılardyń aýmaǵyn atpen qorý jumystaryn uıymdastyryp otyr.
Patrýldeý jumystary sport mektebinen arnaıy bólingen úsh atpen eki ýchaskelik polısııa ınspektorynyń kómekshisi jáne atalǵan sport mektebiniń eki qyzmetkerimen júzege asyrylady. Mundaǵy negizgi maqsat – saıajaı maýsym kezeńinde quqyq buzýshylyqtar men qylmystyq áreketterdiń oryn alýyna jol bermeý. Sondaı-aq, azamattardyń jeke múlikteriniń saqtalýyn qamtamasyz etý. О́tken jyly oblys aýmaǵynda baý-baqsha ýchaskelerinde 110 qylmys tirkelip, onyń 87-i ashyldy. Máselen, Mıchýrın aýyldyq okrýginiń aýmaǵynda eki ýchaskelik polısııa ınspektory jáne úsh kómekshi qyzmet atqarady. Bul okrýgtiń turǵylyqty halqynyń sany 9809 adamdy quraıdy. 2010 jyly okrýg boıynsha 44 qylmystyq is tirkelip, onyń 43-i tez arada ashyldy.
Fatıholla MAShTAQOV, polısııa polkovnıgi.
Batys Qazaqstan oblysy.