«Dánikkennen – qunyqqan jaman». Qulqynnyń quly bolýdan saqtandyratyn osy babalar ósıetin ustanǵannyń adaspasy anyq. Biraq, ekiniń biri osy joldy ustana ma, másele osynda. Qoǵamdy dendegen keseldiń aldyn alýǵa belsene kirisken «Nur Otan» halyqtyq-demokratııalyq partııasynyń «Bolashaqqa – jemqorlyqsyz!» sharasy Astanadan bastalsa, Jetisý óńirinde jalǵasyp, kópshilikten qoldaý tapty.
Memleket basshysynyń syndarly saıasaty men el táýelsizdiginiń 20 jyldyǵyn erekshe belsendilikpen atap ótýdiń kepili sanalǵan mańyzdy shara respýblıkalyq jelilik kestege sáıkes oblystyq partııa fılıaly janyndaǵy jemqorlyqpen kúres jónindegi qoǵamdyq keńes, oblystyq prokýratýra, sot jáne qarjy polısııasy, Memlekettik qyzmet isteri agenttigi oblystyq aýmaqtyq basqarmasy-Tártiptik keńesiniń birlesýimen ótti. Onda partııa fılıaly tóraǵasynyń orynbasary S.Ábdiqadyrov «nurotandyqtar» qoǵam damýyna kedergi bolatyn sybaılas jemqorlyqtyń jolyn kesýge batyl kiriskender jetkizdi.
Jumys nátıjesiz emes. Bıyl oblystyq partııa fılıaly men aýdan, qalalardaǵy bólimder, qoǵamdyq keńesterde jemqorlyqqa baılanysty zań talabyna sáıkes jumys júrgizilgen. Sondaı-aq partııa bedelin kóterý, uıymdy saıası saýatty, eli men jeri úshin adal qyzmet etetin qyzmetkerlermen tolyqtyrýǵa erekshe mán berilgenin de aıtyp ótti.
Jıynda oblystyq ekonomıkalyq qylmysqa jáne sybaılas jemqorlyqqa qarsy kúres departamentiniń jaýapty qyzmetkeri A.Bekbosynova ótken jyly jumysty joǵary talap turǵysynda jalǵastyrý barysynda sybaılas jemqorlqqa boı aldyrǵan 51 qylmys tirkelgenin nazarǵa usyndy. Sondaı-aq 35 qylmystyq iske qatysty tergeý amaldary aıaqtalǵan. О́ndirisi bitken qylmystyq isterdegi shyǵyn kólemi 2,7 mln.teńgeni qurasa, onyń 1,3 mln.teńgesi memleket qorjynyna qaıtarylypty.
Memlekettik qyzmetkerdiń Ar-namys kodeksine kir keltirip, para alý isi boıynsha 20 qylmys ashylǵan. Osyndaı qyzmet babyn jeke bas qamy úshin paıdalanǵandar arasynda basshy qyzmetkerlerdiń bolýy ókinishti ekeni de áńgime arqaýyna aınaldy.
«Nurotandyqtar» men qarjy polısııasy birlesip, qoǵamnyń jegi qurty jemqorlyqty boldyrmaý, qarapaıym halyqtyń senimin aqtaý jáne memlekettik saıasatqa saı jumysty jalǵastyrýǵa den qoıylyp, baıypty ister júrgizilýde.
Qazirgi kezde oblystyq ekonomıkalyq qylmysqa jáne sybaılas jemqorlyqqa qarsy kúres departamentinde «Bolashaqqa –jemqorlyqsyz» sharasyna oraı azamattardy qabyldaý, senim telefonymen habarlasýyna tolyq múmkindik jasalǵan.
О́ńirde sharaǵa baılanysty oqý oryndarynda «Taza sessııa» sharasy da keńinen etek alǵan. Bul másele jóninde I.Jansúgirov atyndaǵy Jetisý memlekettik ýnıversıtetiniń prorektory E.Dúsipov áńgimeledi. Arnaýly komıssııa jumysy kóp máselege nazar aýdarýy barysynda jeń ushynan jalǵasqan derekter kezdespepti. Kóbine jurtshylyqtyń nazaryndaǵy ishki ister salasy qyzmetkerleriniń de osy bir jat ádetten aýlaq bolýyna nazar aýdarǵandar sózi de oryndy deýge boldy.
Jaman ádet – jabysqaq. Kózdiń «qurty» – dúnıe-baılyqqa qol jetkizemin dep arynan ada bolatyn jemqorlyqty aýyzdyqtaý, boldyrmaý jaıy osylaı ótkir áńgimeniń ózegine aınaldy. Ol jaı ǵana uranmen emes, naqty jumyspen jalǵasatyny qýantady.
Kúmisjan BAIJAN.
Almaty oblysy.