Shymkent qalasy ákiminiń orynbasary Nuralhan Kósherovtyń aıtýynsha, munda 316 kópqabatty úı soǵylady.
Jobalaýshylardyń oıynsha, «Shymkent-sıtı»-de janǵa jaıly qajettiliktiń bári qarastyrylmaq. Áleýmettik nysandar – mektepter men balabaqshalar, emhanalar jáne shaharlyqtardyń bir sát tynyǵatyn oryndary boı kóteredi dep kútilýde.
«3,5 myń kórermenge arnalǵan kıno konsert zalyn salýdy uıǵaryp otyrmyz. Munan bólek, ázirge, biz «Shymkent-arena» dep atap otyrǵan sport kesheni boı kóteretin bolady. Munda, eń bastysy, shahar turǵyndary úshin qolaıly jaǵdaı jasaý. Jobamyzdyń ishinde aýdany 24 ga bolatyn bıznes-ortalyqtyń qurylysyn salý da kózdelgen», - deıdi Nuralhan Kósherov.
Ákim orynbasarynyń málimetinshe, qazirgi tańda «Shymkent-sıtı»-de kóshe qurylysy men 10 úıdiń (árqaısysy 54 páterden turady) ınjenerlik kommýnıkasııalyq jumystar júrgizilýde.
«Úıler beriktigi jaǵynan joǵary sanatty quramaly temirbetondy kontrýksııalardan boı kóteretin bolady. Bul – kommýnaldy úıler. Osy jyly bes kópqabatty úıdiń qurylysyn bitiremiz dep josparlaǵanymyzben, baspanalardyń paıdalanýǵa berý ýaqyty kommýnıkasııalyq qajettilikterdiń barlyǵy ornalastyrylyp bolǵannan soń ǵana, 2018 jylǵa kelisilgen», - dedi ákim orynbasary.
N.Kósherov kommýnıkasııalyq jumystardyń barysyna da toqtaldy. Aıtýynsha, bul jumystar «Nurly jer» baǵdarlamasy aıasynda iske asyrylýda. Jumystar bıyl bitse, kelesi jyly paıdalanýǵa berý josparda tur. Al joldardyń basym bóligi osy jyly tóselmek.
Al qalashyqtaǵy aıaqjoldar men velosıpedterge arnalǵan kóshelerdi salý kezegi kelesi jyldyń enshisinde. О́ıtkeni, aıaqjoldar túsetin nysandarǵa bıyl kommýnıkasııalyq qajettilikter júrgiziletin bolady.
ANYQTAMALYQ: «Shymkent-Sıtı» qalashyǵy shahardyń soltústik aımaǵynda, Báıdibek bı eskertkishine taıaý mańda ornalasqan nysan. Aýdan zamanaýı ınfraqurylymymen, turmysta, bıznesti bastaýda qolaıly jaǵdaıymen jáne eń joǵary qala qurylysy men sáýleti jóninen erekshelenedi. Atalǵan joba Shymkenttiń 2020 jylǵa deıingi damý tujyrymdamasy aıasynda iske asyrylýda.