Baıqaýǵa belgili kompozıtor Keńes Dúısekeev basshylyq jasap, ózge de elderdiń belgili óner adamdary engen bedeldi qazylar alqasy tórelik etedi. Onyń qatysýshylarǵa talaby da joǵary. Qazylar ónerge talpynǵan balalardyń vokaldyq qabiletin, sahnada ózin ustaýyn, repertýar baılyǵyn – bári-bárin súzgiden ótkizedi. Úsh kún boıy ánshilerdi tyńdaǵan qazylar alqasy jıyrmaǵa jýyq daryndardy iriktedi. Baıqaýdyń sońǵy kúni olardy marapattap, júldegerler Gala-konsert berdi.
– Qazaqstan án óneriniń keleshegi úshin osy baıqaýdyń mańyzy zor dep bilemin. Biz talanttardy balapan kezinen baıqap, olardy qanattandyramyz, – dedi qazylar alqasynyń tóraǵasy Keńes Dúısekeev.
Bul joly baıqaýdyń bas júldesi Qostanaı oblysynyń ózinde qaldy. Qazylar alqasynyń qatań synynan ótken Bekbolat Jazyqbaev bas júldege laıyq dep tabyldy. Ol baıqaýǵa Áýlıekól aýdanynyń Qusmuryn aýylyndaǵy mektepten qatysty. Oblys ákimi Arhımed Muhambetov oǵan baıqaýdyń Gran-Prı júldesin jáne 300 myń teńgeniń sertıfıkatyn tapsyrdy.
– «Altyn mıkrofon» baıqaýy talantty ánshilerdiń ustahanasy sııaqty. Jas talanttardyń barlyǵy birdeı júlde almasa da, osy báıgege qatysqanynyń ózi olarǵa qanat bitiredi. Baıqaýdyń burynǵy júldegerleri arasynda qazir elimizge, odan syrt jerlerge de tanymal óner ıeleri az emes. Olardyń qatarynda qostanaılyq talanttar da bar ekenin maqtanysh tutamyz, – dedi Arhımed Begejanuly.
On bes jylda «Altyn mıkrofon» halyqaralyq án baıqaýyna 700-den asa balapan ánshi qatysypty. Olar tek Qazaqstannan ǵana emes, alys jáne jaqyn shet elderden keldi. Gala-konsertte júldeger bolǵan jas ánshilerdiń óneri kórermenderdi qýanyshqa bóledi.
Názıra JÁRIMBETOVA,
«Egemen Qazaqstan»
QOSTANAI
Sýretti túsirgen
Nıkolaı STADNIChENKO