Ispanııanyń «Interi» ÝEFA Kýbogyn úsh ret jeńip alǵan júırik. Reseıdiń «Iýgra» komandasy – ÝEFA Kýbogynyń sońǵy jeńimpazy. Qazaq eliniń namysyn qorǵaıtyn «Qaırat» fýtzal klýby – ÝEFA Kýbogynyń eki dúrkin chempıony. Birinen biri ótken jyryndy komandalar. Jerebe sátti bolsa eken deı almaısyń, óıtkeni osaly joq.
Degenmen «Interdi» oılasań, bir qaýip búıirińnen sopań etip shyǵa keledi. Onyń sapynda ǵajaıyp fıntterimen kóz arbaıtyn álemniń eń úzdik oıynshysy Rıkardıno bar.
О́tken jumada záýlim «Almaty arena» sport saraıynda bastalǵan tórt komanda aıqasy á degennen quıyn úıire jóneldi. Alǵashqy jartylaı fınalda «Sportıng» reseılik «Iýgranyń» jolyn kesti – 2:1.
«Qaırat» pen «Inter» syralǵy qarsylastardaı, arbaspady, ańdyspady. Tike aıqasqa kóshti. Ala dopty zyryldatyp, zyr qaqtyryp qýalaǵan shabýylshylar ekpini ǵalamat. Arpalystyń 5-mınýtinde sol qanattan qalyqtaı kelip Kavrelo tepken dop esep ashty – 1:0.
«Qaırat» jıi tártip buzýda. 10 mınýt ótpeı jatyp tórt fol. Bul – jaqsylyqtyń belgisi emes.
Naızaǵaıdaı jarq-jurq etken Rıkardıno. Álemniń eń úzdik oıynshysy qorǵaýshyny qas-qaǵymda qapy qaldyryp, 13-mınýtta jarq etkizip dop soqty – 1:1.
«Inter» daýyldata bastady. «Qaırat» ta jantalasa oınaýda. 16-mınýtta Dýglas atyp shyqqan qorǵaýshy aldynan dopty bult etkizip búıirdegi Igorǵa tastady. Igor qapysyz soqty – 2:1. «Fınalda oınaıtyn boldyq» degen oı talaı sanada jalt etti.
Ekinshi kezeńde «Inter» nóser shabýylǵa kóshti. «Qaırat» qaqpasynyń aldynda tártip buzyldy, «Inter» shabýylshysy ushyp tústi. Alty metrlik aıyp doby. Rıkardıno qaqpa mańdaıshasy astyna jebedeı qadady – 2:2. Álemniń eń úzdik qaqpashysy Igıta umtylyp ta úlgermedi.
«Qaırat» tártip buzýyn qoımady, 4 fol. Ýaqyt bolsa tynysty taryltyp barady. Esep teń. Záýlim saraıdy toltyrǵan 10238 jankúıer – 20476 kóz bir sát kirpik qaqpaı, dem almaı qalǵandaı. «Shirkin-aı!» deısiń tunshyǵyp, «Shirkin-aı!» deısiń yshqynyp. Týra 1 mınýt 18 sekýnd qalǵanda Rıkardıno jalt etkizip sátti dop shyǵarǵany. Ashyq turǵan Ortıs jarq etkizip, 10238 júrekti solq etkizip dop soqty – 3:2.
О́zekti órtegen ókinish. Nesin aıtasyń, ozyp-aq tur edi ǵoı 2:1 esebimen. Aıyp alańynda tártip buzbaýǵa, saq, abaılap oınaýǵa bolmas pa edi?! Igıta besinshi oıynshy bolyp nege qosylmady? Onyń zeńbirek oǵyndaı tepken doptary Eýropa tórinde myqty qaqpashylardyń ózin talaı qapy qaldyrǵan. Qıyn sátte komandaǵa nege kómektespedi? Bas bapker Kakaý nusqaýy solaı boldy ma?
Jeksenbi. Jankúıer kirpııaz. Fınalǵa 6 myńnan astam ǵana jankúıer keldi. Lap-lap etken jankúıer kóńiline qaıaý túskendeı. «Qaırat» qola medal úshin ǵana aıqasady. Sol qomsynatyn qola medaldi de jeńip alý kerek qoı.
«Sportıngten» jeńilip, tisterin qaırap shyqqan reseılikter oıynnyń ekinshi mınýtynda-aq azý tisti aqsıtty. Vladıslav Shaıahmetov jankúıer júregin zyrq etkizip esep ashty – 1:0. Kóp uzamaı bizdiń Zoltan Drot esepti teńestirdi – 1:1. Osydan keıin-aq yrǵasyp, úzeńgi qaǵysyp uzaı berdi, esep ulǵaıa tústi. Bul aralyqta reseılik Danııl Davydovtyń óz qaqpasyna dop soǵyp, bizge kómekteskenin de aıta keteıik.
Esep – 4:4. 38-mınýtta Dıvaneı «Qaıratty» ilgeri shyǵardy – 5:4. Biraq týra 20 sekýnd qalǵanda janushyrǵan Marsenıo esepti teńestirip ketti – 5:5. Negizgi ýaqytta 10 dop soǵyldy. Qola medal qorǵasyndaı, myzǵyr emes ornynan.
Penaltı tebý bastaldy. Qalyń jankúıer júıkesi ustara júzinde. Kezek reseılikterge berildi. Kaıo múltiksiz soqty. Bizdiń Zoltan Drot ta qapysyz tepti. Al Lesko tepken dopty Igıta tizemen qaqty. Osy dop oıyn taǵdyryn sheshkendeı edi... «Qaırat» 3:2 esebimen qola medaldi arpalysty asa aýyr oıynda julyp aldy.
Al ÝEFA Kýbogy úshin aıqasta «Inter» portýgalııalyq «Sportıngtiń silikpesin shyǵardy – 7:0. «Inter» ÝEFA Kýbogynyń 4 márte jeńimpazy! Ispanııanyń ulttyq lıgasynda oınap júrgen 16 komandanyń kóshin bastap turǵan «Inter» qurlyqta da dara turǵanyn dáleldedi. Al bizge buıyrǵany – qola medal. Sol medaldiń ózi ýysymyzdan sýsyp kete jazdady.
Zeınel JEKEIULY