– Mádiǵalı aǵa, Aıdar Bekjanovtyń quramadan ketkenin estip jatyrmyz. Sportshynyń aıtýynsha, buǵan basshylardyń onyń nátıjesine kóńili tolmaýy sebep. Osyǵan baılanysty sizdiń pikirińizdi estisek...
– Maýsym bastalǵaly onyń beli, aıaǵy aýyryp júrdi. Olımpıadaǵa daıyndalýǵa da onyń shamasy kelmeı tur. Sondyqtan komandaǵa ala almadyq. Báseke joǵary, jastar arasynda óz kezegin kútip turǵandary bar. Bastapqyda aıtqanmyn: «kim tıisti mejege jete almasa, sol ornyn bosatady» dep. О́kshe basyp kele jatqan daryndarǵa da kezek berip, solardyń múmkindigin tekserý kerek.
– Aıdardyń ornyn basýy múmkin degen sportshylardan kimderdi ataı alasyz?
– Qazirdiń ózinde 5-6 bala bar «Gollandııa quramasymen daıyndyqqa qashan baramyz» dep asyǵyp júrgen. Mysaly, Mırsaıd Jaqsybaevty aıtýǵa bolady. Odan bólek 2022 jylǵy Olımpıada oıyndaryna qatysady degen maqsatpen taǵy eki jasty qostyq – Erkebulan Shamuhanov pen Galıahmetov Ádil. Tórteýi ketti. Qazir Nıderland quramasymen birge velosıped jattyǵýlaryn júrgizip jatyr. Qalǵandaryn men mamyrdyń basynda alyp ketemin.
– О́tkende bir sózińizde short-trek mamandarynyń azdyǵyn alǵa tartyp edińiz. Aıdardyń osy salada baǵyn synaýyna múmkindik berýge bolýshy ma edi?
– Ol bapker bolamyn dep eshqashan aıtqan emes. Aslan Daýymov qyzdar quramasymen birge Ońtústik Koreıaǵa daıyndyqqa ketedi. Al Azamat Sultanálıev Gollandııaǵa barady. Aslan sporttyq karerasymen qosh aıtysqaly kómekshi retinde qasyma aldym, Azamattyń da Astanaǵa kelip jumys istep júrgenine birneshe jyl boldy. Bapker retinde bárin basynan bastaýy kerek. Al jas mamandardyń aılyǵy tym az. Kún kórý qıyn. Oǵan kelispeıdi de. Al álgi jigitter sportshy bolyp júrgende-aq bapker retinde jumys isteý týraly oılaryn aıtqan.
– Bekjanov buǵan deıin de sporttan ketip, qaıta oralypty. Taǵy da solaı bolýy múmkin be?
– Joq. Osyǵan deıin múmkindik berdik. Al qazir jasy keldi. Ýaqyt degen bir orynda turmaıdy. Densaýlyǵy jıi syr beredi. Koreı mamany kelgende de jattyǵýyna kóńili tolmady. Tipti, «ol ketpese men jumys istemeımin» dep shart qoıdy. Sondyqtan Aıdardy quramadan shettettik. Nıderland eline barǵanda da aýyrtpalyqqa shydaı almady. Ol jaqtaǵy mamandar «densaýlyǵy joq bolsa, qarjyny basqa sportshyǵa jumsaý qajet, bul jigitti de qınamańyzdar» dedi. Gollandııadaǵy aýyrtpalyq sumdyq. Olar kishkentaı kezinen velosıpedpen kádimge sportshylar sekildi zýlaıdy. Oǵan bizdikilerdiń murshasy jetpeıdi. Bizdiń qyzdarǵa bul jattyǵý múlde týra kelmeıdi. Olardy Ońtústik Koreıaǵa jiberip jatqanymyz da sondyqtan. Eger Nıderlandǵa aparsaq, oqý-jattyǵý jıyny bastalysymen-aq dárigerdiń aldynan shyǵatyny anyq. Júrek, býyn, aıaq-qol degen shydamaıdy. Dalaǵa aqsha shashý bolatyny anyq. Al erler quramasyn birtindep beıimdep jatyrmyz. Sonyń arqasynda qanshama medal aldyq, birneshe jarystarda keı qashyqtyqtarda nıderlandyqtardyń ózin basyp ozdyq. Bul eńbektiń nátıjesi. Al Aıdarǵa mundaı jattyǵý aýyr soqty.
– Onyń sizdermen, áriptesterimen qarym-qatynasy qalaı?
– О́sektiń bárine mán bere berýdiń qajeti joq. Ár balaǵa qulaq asyp, sonyń sózine ere berseń, komandalyq jumys degen qurdymǵa ketedi. Onyń bárin qaıtesiz. Quramada kimniń qashan, qalaı óner kórsetetinine men jaýaptymyn, sheshimdi de qabyldaıtyn menmin. Onyń nátıjeleri shynymen de kóńilden shyqpady. Shamasy jetpeıdi, ári qaraı qınaı bergennen ne shyǵady.
Áńgimelesken Mádına ASYLBEK,
jýrnalıst