Erteń jartylaı fınaldyq kezdesýler bastalady. Qazaqstan Ulttyq quramasy qurlyqtyq dodaǵa tolyq quramda baryp, jartylaı fınaldyq básekege tek segiz boksshymen ótti. 49 kılodaǵy Jomart Erjan men 60 kılo salmaqtaǵy Ádilet Qurmetov shırek fınaldyq básekede qarsylastaryna jol berdi. Endi eki boksshymyz Germanııada ótetin álem chempıonatyna joldama alý úshin 7 mamyr kúni qosymsha kezdesý ótkizedi. Ádilet Qurmetov taıpeılik Chý-En Laımen judyryqtassa, Jomart Erjan Indonezııa boksshysy Kornelıýs Kvangý Langýmen kezdesedi.
Sonymen, Azııa chempıonatynyń jartylaı fınalyna shyqqan Qazaq boksshylarynyń osy birinshiliktegi áleýetin, jarys jeńimpazy atanýǵa qanshalyqty múmkindikteri baryn saralap, saraptap shyǵýdy jón kórdik.
52 kılo – Azamat Isaqulov
52 kılo salmaqta mańǵystaýlyq boksshy Azamat Isaqulov byltyr el chempıony atanyp, ulttyq qurama sapyna alyndy. Ol komandadaǵy alǵashqy resmı kezdesýin Germanııanyń Galle qalasynda ótken «Kishi álem chempıonatynda» ótkizip, top jardy.
Al, Azııa birinshiligindegi alǵashqy kezdesýinde Isaqulov taı boksshysy Tanes Ongjýntti jeńse, shırek fınalda malaızııalyq Abdýla Salam Kasımnan aılasyn asyrdy. Jartylaı fınalda Azamatty ózbek boksshysy Jasýrbek Latıpov kútip tur. Latıpov ta Azııanyń úzdik boksshylarynyń biri. Qaı jeńgeni Azııa chempıony atanýy múmkin.
56 kılo – Qaırat Erálıev
Ulttyq quramadaǵy eń tájirıbeli boksshylardyń biri Qaırat Erálıev Azııa chempıonatyna bıyl qatarynan úshinshi ret qatysýda. Qaırat Sary qurlyq chempıonatyndaǵy alǵashqy kezdesýinde fılıppındik boksshy Marıo Baýtıstany jeńse, shırek fınalda japon boksshysy Rıomeıa Tanakýdy upaı sanymen utty. Endi ol jartylaı fınalda Qytaılyq Jıa Veı Chjan men judyryqtasady. Eger Erálıev fınalǵa shyǵar bolsa, onda Mýrodjon Ahmadalıev (О́zbekstan) - En Hýn Han (Ońt. Koreıa) jubynyń jeńimpazymen kezdesedi.
64 kılo – Bekdáýlet Ibragımov
Byltyr Rıo-2016 olımpıadasynda bul salmaqta Abylaıhan Júsipov el namysyn qorǵasa, bıylǵy tańdaý el chempıony Bekdáýlet Ibragımovke túsip otyr. Ázirshe jas boksshynyń nátıjesi jaman emes. Jartylaı fınalǵa deıin úsh qarsylasyn aıqyn basymdyqpen utqan ol endi jergilikti boksshy Ikboljon Holdarovpen jekpe-jekke túsip, kim myqtyny anyqtaıdy. Ekeýi de jas boksshy. Ikboljon byltyr óz eliniń chempıonatynda ekinshi oryn alǵan.
69 kılo - Abylaıhan Júsipov
Álem boıynsha qazaqtyń salmaǵy sanalatyn 69 kılo salmaq dárejesinde bıyldan bastap el namysyn talantty boksshymyz Abylaıhan Júsipov qorǵap júr. Naýryz aıynda Germanııadaǵy «Kishi álem chempıonatyna» qatysyp, kúmis medalǵa qol qetkizdi. Abylaıhan Azııa chempıonatynyń jartylaı fınalynda mońǵol boksshysy Bıamba Tývshınbatpen kezdesedi. Eger qarsylasyn jeńetin bolsa, fınalda ózbek boksshysy Shahram Gııasovpen judyryqtasýy múmkin. Al Gııasovtyń Rıo-2016 olımpıadasynyń fınalynda Danııar Eleýsinovten utylǵany esterińizde bolar. Fınaldyq kezdesýde Abylaıhanǵa Danııar aǵasynyń jolyn bersin deımiz. Júsipovten biz ǵana emes, búkil qazaq jankúıeri altyn kútetini anyq.
75 kılo – Ábilhan Amanqul
Elimizdegi 75 kılo salmaqtyń jańa kóshbasshysy atanǵan Ábilhan Amanqul Olımpıada chempıony Baqtııar Artaevtyń bapkeri Nurlan Aqúrpekovtiń tól shákirti. Bul boksshydan da kúterimiz mol. Talantty boksshy jartylaı fınaldaǵy úshinshi qazaq-ózbek tartysynda rıng ıesi Israıl Madrımovpen judyryqtasady. Bul kezdesýde jeńiske jetse, Amanquldyń Azııa chempıony atanýyna tolyq múmkindigi bar.
81 kılo – Erik Áljanov
Bul salmaqtyń úzdikteri Ádilbek Nııazymbetov pen Jánibek Álimhanuly jaraqattaryna baılanysty Azııa chempıonatyna qatysa almady. Ulttyq qurama bapkerlerine «bas aýrý» bolǵan bul salmaqta 75 kıloda el chempıonatynyń kúmis júldegeri atanǵan Erik Áljanovty aparǵandy jón dep sanapty. Erik jartylaı fınalda Túrkimen boksshysy Nýrıagdy Nýrıadıevpen rıng tórinde kezdesedi. Fınalǵa shyǵyp jatsa, qazaq boksshylary jeńe almaı kele jatqan ózbek Bektemir Melıkýzıevpen jolyǵýy múmkin.
91 kılo – Vasılıı Levıt
Azııa chempıonaty 91 kılo salmaqtyń úzdigi Vasılıı Levıttiń Olımpıadadan keıingi birinshi iri jarysy. Ol buǵan deıin Germanııada ótken halyqaralyq týrnırge qatysyp, altyn medal ıelengen bolatyn. Jalpy aıtqanda, Levıtke álemde bolmasa, Azııadan qarsylas tabý qıyn. Sondyqtan, Vasılıı Levıtten tek Azııa chempıonatynyń altynyn kútemiz. Jarysty shırek fınaldan bastaǵan Levıt rıng ıesi Sanjar Týrsynovty ózbek jankúıerleriniń aldynda esh qıyndyqsyz jeńdi. Jartylaı fınaldyq kezdesýde Vasılıı Sırııa eliniń boksshysy Alaa Eldın Gossýnmen judyryqtasady.
+91 kılo – Qamshybek Qońqabev
Sońǵy eki Olımpıadanyń qola júldegeri Ivan Dychko kásipqoı boksqa aýysqan soń, asa aýyr salmaqta el namysyn kim qorǵaıdy degen suraq boks mamandaryn biraz oılandyrǵany anyq. Árkim ártúrli nusqalaryn usynyp jatqanda, bapkerlerdiń tańdaýy byltyr el chempıonatynda kúmis medal ıelengen Qamshybek Qońqabaevqa tústi. Bıyl ózi qatysqan barlyq jarystarda qarsylastaryn jeńip, Ulttyq quramada birinshi nómirli boksshy bolýǵa laıyq ekenin dáleldedi. Tipti, «Astana arlandary» men «О́zbek jolbarystary» arasynda ótken kezdesýde Azııa chempıonatyndaǵy negizgi qarsylasy ózbek boksshysy Bahodır Djalolovty esh qıyndyqsyz jeńgeni jankúıerlerdiń esinde shyǵar.
Qońqabaev chempıonattyń 1/2 fınalynda Iordanııa boksshysy Hýsseın Iаshaıshmen judyryqtasady. Fınalǵa shyǵyp jatsa ejelgi qarsylasy ózbek Bahodır Djalolovpen kezdesip qalýy múmkin. Jasyratyny joq, bıylǵy Azııa chempıonaty Qazaq eli men О́zbekstan boksshylarynyń arasyndaǵy tartyspen tartymdy bolǵaly tur. О́z jerinde О́z-aǵanyń balalary jeńisti ońaı bere salmaıdy. Sondyqtan, bizdiń saıypqyrandar úshin naǵyz syn saǵaty týǵandaı.
Búgin boksshylar bir kún demalyp, erteń jartylaı fınaldyq kezdesýlerin ótkizedi. Al, 6-7 mamyr kúnderi fınal men álem chempıonatyna joldama berýshi qosymsha irikteý kezdesýleri ótedi.
Álı Bıtóre,
«Egemen Qazaqstan»