Áıelder isteri jáne otbasylyq-demografııalyq saıasat jónindegi ulttyq komıssııanyń, jalpy, elimizdegi áıelder qaýymynyń atynan ardagerge alǵys aıtyp, izgi tilekterin jetkizgen ol arnaıy alyp kelgen syılyqtaryn tartý etti.
Ardaqty ardager búginde 95 jasta. Jalǵyz qyzynan eki nemere, eki shóbere kórip otyr.
Shırvanova Raýza Ahmetovna 1922 jyly 25 tamyzda Semeı qalasynda týǵan. 1939 jyly orta mekteptiń 7 synybyn bitirip, Semeı qarjy-ekonomıkalyq tehnıkýmyna oqýǵa túsedi. Otbasylyq jaǵdaıyna baılanysty 2-kýrsta oqýyn tastaýǵa májbúr bolǵan. Keıin zerthanashy-tehnologtar kýrsyn bitirip shyǵyp, 1941 jyldyń sáýir aıynda Soltústik Qazaqstan oblysyna jiberiledi. Petropavl qalasynda 1942 jylǵy aqpanǵa deıin zerthanashy qyzmetin atqaryp, Semeıge oralady.
1942 jylǵy mamyrda Sovet Armııasynyń qataryna shaqyrylady. 1942 jyldyń mamyr aıynan 1944 jyldyń qyrkúıegine deıin 136-jeke baılanys rotasynda telegraf mamany bolyp boryshyn ótegen. Keıin Chıta qalasyndaǵy Baıkal syrty áskerı okrýginiń shtabyna aýystyrylady. Ol jerde 1945 jyldyń qarashasyna deıin telegraf mamany bolyp qyzmet atqarǵan. Morze telegraf apparattarynyń mamany 1945 jyly 2 jeltoqsanda serjant dárejesinde elge qaıtaryldy.
1946 jyly Semeı qalasynda Memlekettik eńbek jınaq kassalary jáne Memlekettik nesıe basqarmasyna jumysqa ornalasady. Ol jerden Almatydaǵy bas býhgalterler kýrsyna joldama alady. Kýrsty támamdaǵan soń, 1946 jyly Semeı oblysy Novopokrovka aýdanyndaǵy №7105 jınaq kassasyna bas býhgalter bolyp barady. Ol jerde 1954 jyldyń qyrkúıegine deıin qyzmet atqarǵan.
1948 jyly turmys qurǵan. Kúıeýi – Shırvanov Rýstem Abdýlovıch Ýkraına frontynda mınometshiler tobynyń komandıri bolǵan.
Kúıeýiniń jumyspen jıi aýystyrylýyna oraı Raýza Shırvanova ár jyldary Qazaqstannyń birneshe óńirinde qyzmet etken. Semeı oblysy Kókpekti aýdany (1955-1957 jj.), Almaty qalasy (1955-1961 jj.), Selınograd oblysy Esil aýdany (1963-1968 jj.).
1970-1980 jyldary ol Selınograd qalasynda «Qaırat» erikti sport qoǵamynyń bas býhgalteri qyzmetin atqarǵan. Jalpy eńbek ótili 36 jyl 8 aı.
Uly Otan soǵysynyń 2 dárejeli ordenimen, «Japonııany jeńgeni úshin», «Eńbek Eri» medaldarymen marapattalǵan. Sondaı-aq 7 mereıtoılyq medaldiń ıesi. I.V. Stalınniń alǵys hatyn, QR Prezıdenti N.Nazarbaevtyń qurmet gramotasyn jáne qalalyq Ardagerler keńesiniń qurmet gramotasyn alǵan.
Aıdar О́RISBAEV, Foto: Orynbaı Balmurat, «Egemen Qazaqstan».