Qamıdolla Nurtaıuly 1927 jyly 15 jeltoqsanda Alekseev aýdanynyń Qurqudyq aýylynda dúnıege keldi. Ákesi Nurtaı men anasy Átı bes jasqa qaraǵan shaǵynda qaıtys bolyp, ol jastaı jetim qaldy. Ol Soltústik Qazaqstannyń Stepnıak qalasyndaǵy orta mektepte bilim aldy. 1944 jyly orta mektepti jáne alty aılyq muǵalimder kýrsyn oıdaǵydaı támamdap, Stepnıak aýdanyna qarasty Danılovka kentindegi orta mektepte matematıka pániniń ustazy bolyp eńbek jolyn bastady. 1945-1949 jyldarda Abaı atyndaǵy pedagogıkalyq ınstıtýttyń tarıh fakýltetin úzdik bitirip, Aqmola pedagogıkalyq ýchılıshesine joldama aldy. Osy oqý ornyna muǵalim retinde jumysqa qabyldanǵan Qamıdolla Nurtaıuly 1951 jyly osy ýchılısheniń dırektory bolyp taǵaıyndalady. Al 1959 jyldan 1963 jylǵa deıin oqý-aǵartý, joǵary mektep jáne ǵylymı mekemeler qyzmetkerleri kásipodaǵynyń Aqmola oblystyq komıtetiniń tóraǵasy bolyp saılanady. Barlyq sanaly ǵumyryn egemen elimizdiń bilim salasyn damytýǵa arnaǵan Qamıdolla Nurtaıuly 1963 jyly Aqmola qurylys tehnıkýmynyń dırektorlyǵyna joǵarylatylady. On jyldan astam ýaqyt osy irgeli oqý ornyna basshylyq jasaǵan ol 1975 jyly Qazaq temir joly, keıinnen Tyń temir joly basqarmasy oqý bólimi bastyǵynyń orynbasary qyzmetin atqaryp, 1988 jyly qurmetti eńbek demalysyna shyǵady. Zeınetkerlikke shyqqanmen Q.Nurtaev óskeleń urpaqqa tálimdi tárbıe, syndarly bilim berý jolyndaǵy eńbegin odan ári jalǵastyrdy. Osy salada ol 1997 jylǵa deıin jemisti eńbek etti. Joǵary azamattyqtyń ónegesin tanytqan Qamıdolla Nurtaıuly ómirlik zaıyby Márııam Iаhııaqyzymen birge tórt bala tárbıelep, ulyn uıaǵa, qyzyn qııaǵa qondyrdy. Marqum Qamakeń óziniń uzaq ta ónegeli ǵumyrynda úlkenge qurmet, kishige iltıpat kórsetip, ejelgi Aqmola óńiriniń abzal aqsaqalyna aınaldy. Ol óz ortasynyń qadiri men qurmetine bólene bildi. Sonymen birge onyń el úshin atqarǵan eren eńbekteri de eleýsiz qalǵan joq. Q.Nurtaev «Qazaq KSR oqý isiniń úzdigi», «KSRO bilim berý isiniń úzdigi», «Qurmetti temirjolshy» qurmetti ataqtaryna ıe bolyp, «Eńbektegi erligi úshin» medalimen marapattaldy. Ardaqty azamat, aıaýly áke, asyl ata, marqum Qamıdolla Nurtaevtyń jarqyn beınesi balalarynyń, nemere-shóbereleriniń, týǵan-týysqandarynyń jadynda árdaıym saqtalady.
Eske alýshylar: balalary jáne Qamakeńdi qadirleıtin astanalyq zııaly qaýym