Baıyrǵy fotograf Bolat Omarálıev osy sýretterdi túsirý úshin ol kisini aldaýǵa týra kelgenine áli kúnge deıin ókinetinin jasyrmaıdy. – Men úshin bul foto – soǵys salǵan jaranyń adam balasy úshin aýyrlyǵyn, qasiret shekken eldiń qalaı kúızelgenin hám urpaǵyn oılap, azap arqalaǵan qazaq analarynyń beınesin sýretpen qaldyrǵan tarıh. – Bul kisini negizinen burynnan biletin edim. On jasar oıyn balasy kezimde óz sheshemmen bir esekke mingesip, kórshi aýylǵa toıǵa bardyq. Anam sol toıda osy Qalampyr ájeımen shurqyrasyp qaldy. Ájeı omyraýyna «Otan soǵysy» ordenin taǵyp alypty. Jaltyldap kózge ottaı basylady. Anam ájeımen sóılesip bolǵannan keıin, bylaı shyqqan soń: «Anaý taǵyp alǵan ne qylǵan orden?» dep suramaımyn ba. «Soǵysta qaza tapqan ulynyń ordeni» dep jaýap berdi anam. Sodan keıin 1980 jyldan bastap «Soǵys jesirleri» degen atpen serııaly sýretter túsire bastadym. Kúnderdiń kúninde esime baıaǵy oqıǵa tústi. Sodan baıaǵy Shirkeıli aýylyna keıýanany izdep bardym. 1983 jyldyń kúzinde Qyzylorda oblysy Syrdarııa aýdany Shirkeıli aýylynda júzge kelgen Qalampyr Álimbetovamen qaıta jolyǵýdyń sáti tústi. Uldary Kenbaı men Seıdahmet Shamahanovtardy qyryq jyldan beri kútýmen kún keship jatqan jaıyn kórdim. Áli de úmitin úzbegen. Soǵystan jiberilgen bir balasynyń «Otan soǵysy» ordenin alaqanyna salyp kúbirlep sóılep otyrady. Sol baıaǵy men kórgen orden. Jylamaıdy. Jylaı-jylaı kóz jasy taýsylǵan. Aqyl-esi durys. Osy joly eki kún boıy ájeıdi sýretke túsirdim. Ádepkide sýretke túsýge kónbegen soń keıýanany aldaýǵa týra keldi. «Áje uldaryńyz tiri. Hat jazypty. Onda apamnyń sýretin salsyn depti» dep soqtym. Ǵasyr jasap, onyń jarty ǵumyryn uldary aman keledi dep kútýmen ótken qarııany aldaǵanyma áli kúnge deıin ókinem. Kásibim osy bolǵan soń, basqa amal bar ma?! Eki kún ájeıdi aınalshyqtap júrip 100 shaqty foto túsirippin. Osynshama sýretten kóńilime unaǵany tórt sýret boldy. Men sýretke túsirgennen keıin 20 kún ótkende Qalampyr áje uldaryn izdep, myna ómirden ótti, deıdi fototilshi.
Aınash ESALI, «Egemen Qazaqstan»
Sýretti túsirgen Bolat OMARÁLIEV
ALMATY