Qýanarlyq jaıt, bul taqyryp sóz kúıinde qalmaı, aımaqta qazir tyń bastamalar qolǵa alynýda. Atap aıtqanda, bıylǵy maýsym aıynda Ekibastuzdyń balabaqshalarynda qanatqaqty joba − ózge ult ókilderiniń balalary úshin qazaqtildi toptar ashylǵaly otyr. − Bul jobany júzege asyrý úshin barlyq balabaqshalarda balalardyń tez beıimdelýine qajetti jaǵdaı jasalǵan. Toptar balalardy tildik ortaǵa tez beıimdeıtin zamanaýı materıaldyq-tehnıkalyq bazamen jabdyqtaldy, toptarda joǵary bilikti mamandar jumys isteıdi, − deıdi Ekibastuz qalasy ákimdigi bilim bóliminiń basshysy Nurjamal Makýmova. Aıta keterligi, Ekibastuzda ózge ult ókilderine qazaq tilinde tárbıe berý úrdisi burynnan bar. Osy kúni ózge ulttyń 110 balasy memlekettik tildegi balabaqshalarda tárbıelenip júr.
Janargúl QADYROVA
Pavlodar oblysy