Kıikterdiń kelýine oraı Torǵaı óńirinde kúzet kúsheıtildi

2015 jyly Torǵaı dalasynda 129 myńnan asa kıik qyrylyp qalǵan bolatyn, sonyń saldarynan ótken jylǵy sanaq Betpaqdala popýlıasııasynda nebári 36 myń ǵana kıik qalǵanyn kórsetti. Shet el jáne óz elimizdegi ǵalymdar men mamandar kıiktiń qyrylýyna pasterellez aýrýy sebep degen sheshimge keldi. Alaıda onyń qozdyrǵyshy týraly naqty sheshim bolǵan joq. О́tken kóktemde Torǵaı dalasyna kıik óte az keldi.  Bıyl sáýirdiń aıaq kezinen bastap kıik Torǵaıǵa kele bastady. Keńeste dala sulýynyń kelý, tóldeý jáne ońtústik óńirge ketýi kezinde olardy brakonerlerden qorǵaý isin uıymdastyrý óte ózekti bolyp tabylatyny aıtyldy.  «Kıikterge qaskóılik jasaý qazir burnaǵy jyldarǵa qaraǵanda azaıdy. Mysaly 2013 jyly 8 brakonerlik qylmys jasalyp, 74 kıik atylǵan bolatyn. Al 2014 jyly 103 kıik oqqa ushty, múıizben ustalǵandardyń 3 faktisi tirkelgen bolatyn. Al 2016 jyly kıikke qaskóılik jasaý qylmysyna jol berilgen joq, biraq 22 múıiz tárkilendi» dedi oblystyq orman sharýashylyǵy jáne janýarlar dúnıesi aýmaqtyq ınspeksııasy bastyǵynyń orynbasary Ǵılymhan Moldaǵulov.  Kıiktiń Torǵaı dalasyna aýýy bastalysymen oǵan kúzet kúsheıtildi. Qazir beketterde, rezevatta qoryqshylar, jedel ınspektorlyq toptar sany kóbeıtildi.  «Qazir Amangeldi, Jangeldın aýdandaryndaǵy kıik júretin jerlerdiń barlyǵyn ınspektorlardyń 8 jedel toby tolyq kúzetedi. Olar qarýmen, kólikpen qamtamasyz etilgen. Aqmola, Jezqazǵannan kelgen jedel ınspektorlar toptary Amangeldi aýdanynda jumys istep jatyr» dedi oblystyqtyq mamandandyrylǵan Tabıǵat qorǵaý prokýrory Narıman Qasymbekov.  Mamandardyń boljaýynsha, bıyl Torǵaı dalasyna kıik byltyrdan kóp kelýge jáne shyǵynsyz tóldeýge tıis. Olar mamyr aıynyń ortasynan bastap, Uly jylanshyqtaǵy Aıyrqum, Aqqum jáne Aqshyǵanaq aımaǵynda tóldeıtin bolady.  Názıra Járimbetova  «Egemen Qazaqstan»  Qostanaı oblysy,  Amangeldi aýdany