Astana jańa vokzaly 1 maýsymda alǵashqy jolaýshylardy qabyldaıdy

Bul týraly Úkimet úıinde Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyn iske asyrý jumystarynyń qorytyndysy boıynsha ótken baspasóz konferensııasynda Investısııalar jáne damý mınıstri Jeńis Qasymbek málimdedi.  «Mamyr aıynyń ekinshi on kúndiginde, shamamen 15-i kúnderi, eki nysannyń da qurylys-montaj jumystary aıaqtalady. On shaqty kún ishinde testilik synaq jumystary júrgiziledi. Vokzalda da, áýejaıdyń jańa termınaly da alǵashqy jolaýshylardy 1 maýsym kúni qabyldaıdy dep josparlanýda, – dedi J. Qasymbek. – Bıyl biz pılottyq rejımde elordaǵa «ashyq aspan» júıesin engizdik, ıaǵnı álemniń kez-kelgen jerinen aptasyna jıiligi jeti ret, kez-kelgen áýe kompanııasy Astanaǵa qatynaı alady».  Bul EKSPO – 2017 halyqaralyq kórmesin ótkizýge oraılastyrylǵan shara, degenmen, joba sátti júzege assa, ári qaraı da jalǵasyn tappaq.  Sondaı-aq mınıstr jańa baǵyttar men qosymsha jıilikter týraly aıtyp berdi.  «Osy aıda jańa tórt baǵyt: Varshava, Helsınkı, Býdapesht, Beıjiń boıynsha reısterdi ashý týraly naqty josparlar bar», – dedi ol.  Air China alǵash ret Beıjińnen Astanaǵa qatynaıtyn bolady. Buǵan deıin tek Air Astana ushqan bolatyn.