Bul jarysta Abylaıhan Júsipovtiń shoqtyǵy bárinen de bıik. Sebebi onyń urysý stıli tym bólek. Ekinshiden, 69 kılo – Olımpıadada «qazaqtyń salmaǵy» bolǵaly qashan! Biraq, jartylaı fınaldaǵy jekpe-jegi shyny kerek, kópshilik kóńilinen shyǵa qoıǵan joq. Tóreshiden eki boksshy da eskertý aldy. Al úshinshi raýndta eki boksshy baspen soqtyǵysyp, sońy Abylaıhannyń qabaǵy jarylýymen aıaqtaldy. Osylaısha kezdesý merziminen buryn toqtatyldy. Nátıjesinde tóreshilerdiń biraýyz sheshimimen Abylaıhan mońǵol boksshysy Bıamba Tývshınbattan basym tústi. A.Júsipovtyń kelesi qarsylasy qazaq jankúıerlerine etene tanys Shahram Gııasov bolmaq. Buhara qalasynyń týmasy Gııasov 2016 jyly Rıo olımpıadasynyń fınalynda bizdiń Danııar Eleýsinovke ese jibergenin esterińizge sala keteıik. Almas MANAP, «Egemen Qazaqstan». Tashkentten