«Táýelsizdigimizdiń 25 jyldyǵynyń jáne Qarýly Kúshterdiń 25 jyldyǵynyń qurmetine oraı men Qorǵanys mınıstrliginiń, Ulttyq qaýipsizdik qyzmetiniń, Ulttyq gvardııanyń jáne Memlekettik kúzet qyzmetiniń áskerı qyzmetshileriniń laýazymdyq jalaqylaryn birinshi shildeden bastap 25 paıyzǵa kóterý týraly sheshim qabyldadym», – dedi Prezıdent saltanatty shara barysynda. Memleket basshysy marapatqa usynylyp otyrǵan áskerı qyzmetshilerdiń azamattyq, áskerı paryzdaryn abyroımen atqaryp júrgenderin jáne olardyń ár isi men erligi keler urpaqqa úlgi-ónege ekenin basa aıtty. «Kez kelgen Táýelsiz memlekettiń Qarýly Kúshiniń, quqyq qorǵaý organdarynyń bolýy qajet ekendigin bilemiz. Sondyqtan memleket qıyndyqtarǵa qaramastan áskerı qyzmetshilerdiń materıaldyq-tehnıkalyq bazasyn kúsheıtý jáne jaǵdaılaryn jasaý úshin barlyq sharany qabyldap otyrady», – dep atap ótti Nursultan Nazarbaev.
Qazaqstanda áskerı qyzmetshilerdiń jalaqysy 1 shildeden bastap 25 paıyzǵa artady. Bul týraly búgin Aqordada birqatar áskerı qyzmetshini memlekettik nagradamen marapattaý barysynda Elbasy Nursultan Nazarbaev málimdedi, dep habarlaıdy QazAqparat.