Kezdesýden keıin Alvares HBO telearnasynyń júrgizýshisi Maks Kellermannyń suraqtaryna jaýap bergen bolatyn. «Kelesi qarsylasyń kim?» degen suraqqa «Golovkın! Kelesi – sensiń!» dedi. Osy sátte arenadaǵy úlken ekrannan Qazaqstannyń týy jáne Gennadıı Golovkın týraly promo-rolıkten úzindi kórsetildi. Artynsha kameralar jekpe-jekke kórermen retinde kelgen Golovkınniń ózin kórsetti. Ol ádette rıngke shaqyrylǵan boksshylar júretin jolmen júrip, rıngke kóterildi jáne ondaǵy adamdarmen, sonyń ishinde Alvarestiń ózimen jáne komanda múshelerimen amandasty. Sosyn Kellerman eki boksshydan suhbat aldy.
«Kanelony quttyqtaımyn! Ol myqty bokstasty. Biraq endi jańa tarıh bastalady» dedi Golovkın. «Seni jurt osy ýaqytqa deıin Golovkınnen qorqady dep aıyptap keldi. Endi ne aıtasyń?» degen suraqqa Alvares «Men eshkimnen qoryqpaımyn» dedi jáne qyrkúıektiń 16-sy Golovkınmen jekpe-jekke daıyn ekenin aıtty. «Sen buǵan deıin keremet boks jolymen júrip óttiń. Biraq Golovkındi jeńseń, naǵyz uly boksshy bolasyń» dedi oǵan júrgizýshi. Al Golovkın Alvarestiń óz karerasyndaǵy eń myqty qarsylas bolatynyn aıtty.
Kishi Chavespen 12 raýndyq kezdesýde Saýl Alvares taza utty. Tóreshilerdiń bári 120-108 esebimen barlyq raýndy Alvareske berdi. Muny Chavestiń ózi de moıyndady. «Ol jekpe-jek boıy meni úzdiksiz soqqylaýmen boldy» dedi ol.