Arǵy tegi bir tamyrlas jurttar, ıaǵnı túrki dúnıesi keńes dáýiri qurdymǵa qulaǵannan keıin araǵa ǵasyrlar salyp qaıta tabysty. Onyń uıytqysy Qazaq eli bolyp otyr. Elbasy Nursultan Nazarbaevtyń bastamasymen Túrkitektes memleketter keńesi, Túrkitektes memleketter parlamentiniń assosıasııasy qurylyp, Túrki akademııasy, L.N.Gýmılev atyndaǵy Eýrazııa ulttyq ýnıversıtetinde túrkitaný jáne altaıtaný ortalyqtary ashyldy. Bul altaı tekti halyqtar jáne túrki álemin zertteýge, zerdeleýge, bir kezde ortaq keńistikte ómir súrgen, salt-dástúrleri men mádenıeti uqsas halyqtyń tarıhyn júıeleýge baǵyttalǵany belgili. Osyndaı ıgi qadamǵa arnalǵan «Altaıtaný jáne túrkitaný: tarıh jáne qazirgi zaman» atty respýblıkalyq ǵylymı konferensııa jýyrda Eýrazııa ýnıversıtetinde ótken edi. Ol negizinen túbi bir túrki halyqtarynyń tarıhyn, tilderi men etnomádenıetin, jalpy, túrkilik tyıymdar men astarly sózderdi, ıaǵnı Altaıdan bastalǵan kóshtiń Amerıkaǵa baryp tirkelgennen keıingi taǵdyr táleıin zerttep kele jatqan belgili ǵalym, Parlament Senatynyń depýtaty Ádil Ahmetovtiń shyǵarmashylyǵyna arnalǵanyn aıta ketsek deımiz.
Konferensııany bilim ordasynyń rektory Baqytjan Ábdiraıym ashyp, Májilis depýtaty Ý.Qalıjan, ýnıversıtettiń teleradıojýrnalıstıka kafedra meńgerýshisi Ǵ.Shalahmetov, «Alash» ınstıtýtynyń dırektory, professor D.Qamzabekuly, «Dıalog Eýrazııa» halyqaralyq qoǵamdyq qorynyń prezıdenti, «DA» jýrnalynyń Qazaqstandaǵy úılestirýshisi S.Akchaı, «Nazarbaev ýnıversıteti» qazaq tili kafedrasynyń meńgerýshisi, professor G.Qurmanbaı, professor S.Sátenova, ózge de azamattar túrki dúnıesi týraly jan-jaqty oı tarata kelip, konferensııaǵa arqaý bolǵan ǵalymnyń eńbekterine taldaý jasady. Baıandamalardyń túıininde altaıtaný jáne túrkitaný baǵytyn odan ári jalǵastyryp, arǵy altaılyq tekpen klassıkalyq túrkologııanyń muralary molynan saqtalyp otyrǵan óńirlerge turaqty túrde ekspedısııa jasaý, oǵan qarjylyq múmkindikter týdyrý máselesine Bilim jáne ǵylym mınıstrligi uıytqy bolý qajettigi, L.N.Gýmılev atyndaǵy Eýrazııa jáne Ál-Farabı atyndaǵy ýnıversıtetter túrkologııa mamandyǵy boıynsha sońǵy jyldary ashqan bakalavrıat, magıstratýra baǵdarlamalarynyń memlekettik standartyn jańa jaǵdaıǵa sáıkes qaıta qaraý, atalǵan máseleler boıynsha Qazaq eli ǵylymyna sheteldik belgili ǵalymdardy tartý, altaıtaný jáne túrkologııa mamandyqtary boıynsha Rhd ǵylymı dáreje qorǵaıtyn shıfr belgileý, konferensııanyń materıaldaryn kitap etip shyǵarý kerektigin tıisti oryndardyń nazaryna salý qajet dep sheshti. Sóıtip, túlegen túrkilik rýhty jańǵyrta otyryp, urpaq sanasyna tek tamyrdy uǵyndyrý jaıy qozǵaldy.
Súleımen MÁMET.