Keshe Aqordada joǵary laýazymdy qyzmetke taǵaıyndalǵan bir top memlekettik qyzmetker Qazaqstan Respýblıkasynyń Konstıtýsııasyna jáne «Qazaqstan Respýblıkasynyń Memlekettik qyzmet týraly» Zańyna sáıkes el Prezıdenti men Qazaqstan halqyna saltanatty jaǵdaıda ant berdi.
Memleket basshysy Nursultan Nazarbaevtyń aldynda antty alǵashqy bolyp Bas prokýror Ashat Daýylbaev berdi. Ol «Qazaqstan Respýblıkasynyń halqy men Prezıdenti aldynda óz Otanym – Qazaqstan Respýblıkasyn ekonomıkalyq jáne rýhanı damytý isine bar kúsh-jigerim men bilimimdi jumsaýǵa, memlekettiń Konstıtýsııasy men zańdaryn qatań saqtaýǵa, ózimniń barlyq is-áreketterimde zańdylyq pen ádilettilik, azamattyq pen ultaralyq tatýlyq qaǵıdalaryn ustanýǵa, Qazaqstan halqyna adal qyzmet etýge, óz elimniń memlekettiligi men álemdik qoǵamdastyqtaǵy bedelin nyǵaıta berýge saltanatty túrde ant beremin, ant etemin», – dedi esh kidirissiz.
Odan keıin Memlekettik qyzmet isteri agenttiginiń tóraǵasy Álıhan Baımenov, Syrtqy ister mınıstri Erjan Qazyhanov, Ishki ister mınıstri Qalmuhamet Qasymov, Aýyl sharýashylyǵy mınıstri Asyljan Mamytbekov, Baılanys jáne aqparat mınıstri Asqar Jumaǵalıev, Bilim jáne ǵylym mınıstri Baqytjan Jumaǵulov, Densaýlyq saqtaý mınıstri Salıdat Qaıyrbekova, Kólik jáne kommýnıkasııalar mınıstri Berik Kamalıev, Týrızm jáne sport mınıstri Talǵat Ermegııaev, Ekonomıkalyq ıntegrasııa isteri mınıstri Janar Aıtjanova, «Syrbar» syrtqy barlaý qyzmetiniń dırektory Amanjol Janqulıev, Aqmola oblysynyń ákimi Sergeı Dıachenko, Almaty oblysynyń ákimi Ańsar Musahanov jáne Jambyl oblysynyń ákimi Qanat Bozymbaev ant berdi. Ant berý sizder úshin erekshe saltanatty kún dep esepteımin, dedi Memleket basshysy Nursultan Nazarbaev ant berý rásimi aıaqtalǵannan keıingi sózinde.
Kez kelgen azamatqa memlekettik qyzmetker bolý – óte úlken mártebe. Oǵan barlyq qazaqstandyqtardyń qoly jete bermeıdi. Al Úkimet múshesi bolý, mınıstr bolý odan da zor jaýapkershilik bolyp tabylady. Jańa ózderińiz aıtqan ant mátininiń ár sózin júrekten ótkizetindeı, jumys ústelderińniń ústine qoıyp, kún saıyn qarap otyrsańyzdar, onda meniń aıtaıyn degen sózderimniń barlyǵy bar. Budan soń Prezıdent memlekettik qyzmetkerler halyqtyń múddesine adal qyzmet etý qajettigine toqtaldy. Elbasynyń toqtalyp ótkenindeı, memlekettik qyzmetke alǵan kezde, olardy memleketke adal qyzmet etý úshin shaqyrady. Sondyqtan árbir memlekettik qyzmetker ózderin halyqtyń qyzmetshileri retinde sezinýleri tıis. Osy máseleni umytpaýlary qajet. Mansapqorlyqtan aýlaq bolý, árbir adamnyń muń-muqtajyna nazar aýdaryp, ýaqyt ozdyrmaı tıisti jaýabyn berý – memlekettik qyzmetkerdiń paryzy. Sonda ákimdikter de, memlekettik qyzmetshiler de halyqqa jaqyn bolady.
Táýelsizdik alǵannan bergi 20 jyl ishinde júzege asyrylǵan qyrýar sharýalardy júrgizgender kimder? Memlekettik qyzmetkerler, dedi Prezıdent ári qaraı. Qol jetkizgen tabystarymyzdy uıymdastyryp, basy-qasynda júrgender, taǵy sol memlekettik qyzmetkerler. Aldymyzǵa qoıylǵan ındýstrııalyq-ınnovasııalyq baǵdarlama eń úlken beles bolyp sanalady. Ony júzege asyrý úshin erekshe kúsh-qýat, birlik pen bilimdilik, jiger kerek. Sonyń barlyǵyn oryndaýǵa senim artyp otyrǵan sizder bolasyzdar. Memleket basshysy atap ótkendeı, búginde elimizdegi memlekettik qyzmetkerler arasynda tájirıbesi mol úlken býyn da, orta býyn da bar. Qazirgi kezde memlekettik qyzmetke jastar da kelip jatyr. Olardyń barlyǵy bir-birimen sabaqtasa otyryp, Táýelsiz Qazaqstannyń ósip-órkendeýi úshin aıanbaı qyzmet etýleri tıis. Elbasy sóziniń sońynda ant bergenderge qyzmetterinde tabys tiledi.
Álısultan QULANBAI.