Shyǵys Qazaqstan oblysynyń turǵyndary Astana qalasynyń merekesin este qalarlyqtaı atap ótti. Bul kúni mereke ortalyq «Vostok» stadıonynda qala turǵyndarynyń qatysýymen mándi de sándi uıymdastyryldy. Ońtústik Koreıanyń baýyrlas qalasy Kannygadan jasóspirim barabanshylar kelip, óz ónerlerin ortaǵa saldy. О́nerpaz ujymdar men mektep ujymdary qalanyń kórikti jerlerinde Astana qalasy týraly tanymdyq konsert qoıdy.
Bıyl óńir basshysy B. Saparbaevtyń sheshimimen Astanaǵa qaraı baǵyt alatyn joldar kúrdeli jóndeýden ótip jatyr. Atap aıtqanda, Semeı men Pavlodar qalalary arasyndaǵy 20 shaqyrym jol jóndeýden ótse, Pavlodardan Astanaǵa deıingi 60 shaqyrymy da jóndelip jatyr. Sondaı-aq Kendi Altaıdyń iri ónerkásip oryndary Astana qurylysyna qajet qurylys materıaldaryn jáne temir-beton konstrýksııalaryn tapsyrys boıynsha shyǵarýdy júzege asyrýda.
Kendi Altaıdyń qalalary men aýdandary da Astana qalasy kúnine jan-jaqty ázirlendi. Máselen, Zaısan aýdanynyń ákimi Serik Zaınýldınniń bastamasymen aýdan ortalyǵynda óńirde birinshi bolyp eńseli «Báıterek» boı kóterdi. Ortalyq alańda balalar demalatyn oryn, gúlzarlar, túnde janatyn jaryq ornatyldy. Saıqan taýynyń eń bıik tóbesinde «Qazaqstan» degen aıshyqty jazý túnde de jarqyrap kórinip turady. Aıagóz, Úrjar, Tarbaǵataı, basqa aýdan turǵyndary da Astana kúni merekesine eńbek tartýlarymen keldi.
Ońdasyn ELÝBAI.
Shyǵys Qazaqstan oblysy.