Shyǵys Qazaqstan oblysy, Kúrshim aýdandyq mýzyka mektebiniń 30 oqýshysy men 10 muǵalimi bas qalanyń týǵan kúnine laıyqty tartý jasady. Astana toıyna dep arnaıy daıyndalǵan óner ujymynyń bul saparyna belgili mesenat, Parlament Májilisiniń depýtaty Nurtaı Sabılıanov demeýshilik jasasa, shalǵaıdaǵy aýyldan arnaıy kelgen ónerpaz jetkinshekter men ustazdar konsertin astanalyqtar asqan rızashylyqpen qabyldady.
Myń buralǵan bı men kúmbirlegen kúı, áýezdi ásem ánderdi tamyljyta oryndaǵan jastardyń talanttaryna tamsana qol soqqan jurtshylyq olarǵa degen iltıpattaryn bildirip jatty. Munymen qosa balǵyndar qoldary bosaǵan ýaqyttarda Astananyń kórikti jerlerin aralap, erekshe kóńilde boldy. О́nerpazdardyń ónerlerin baǵamdaı kele, Astana qalalyq mádenıet basqarmasynyń bastyǵy B.Majaǵulov atalǵan ujym jetekshisi, Kúrshim aýdandyq mýzyka mektebiniń dırektory Múbárak Shákirovti Alǵys hatpen marapattap, birqatar ustazdarǵa arnaıy dıplomdar tabys etti. Sondaı-aq, tamasha óner kórsetken mekteptiń «Symbat» bıshiler tobyna qazan aıynda Astanada ótetin «Balbóbek» jas daryndar konkýrsyna qatysý joldamasyn tapsyrdy.
Astana saparyn sátti aıaqtaǵan ónerpaz balalar men ustazdar 7 shilde kúni úlken qýanyshpen týǵan ólkesine attanyp ketti.