2011 jylǵy 16 mamyr Astana, Úkimet Úıi
Ulttyq ǵylymı keńester týraly
«Ǵylym týraly» Qazaqstan Respýblıkasynyń 2011 jylǵy 18 aqpandaǵy Zańynyń 3-babynyń 6) tarmaqshasyna sáıkes Qazaqstan Respýblıkasynyń Úkimeti qaýly etedi:
1. Osy qaýlyǵa tizbege sáıkes ǵylym baǵyttary boıynsha ulttyq ǵylymı keńester qurylsyn.
2. Ǵylym baǵyttary boıynsha Ulttyq ǵylymı keńester týraly ereje bekitilsin.
3. Osy qaýly alǵashqy resmı jarııalanǵan kúninen bastap kúntizbelik on kún ótken soń qoldanysqa engiziledi.
Qazaqstan Respýblıkasynyń Premer-Mınıstri K.MÁSIMOV.
Qazaqstan Respýblıkasy Úkimetiniń
2011jylǵy «16» mamyrdaǵy
№519 qaýlysymen
bekitilgen
Ulttyq ǵylymı keńesterdiń tizbesi
Ulttyq ǵylymı keńester ǵylymnyń mynadaı baǵyttary boıynsha qurylady:
1) energetıka;
2) shıkizat pen ónimdi tereńdetip qaıta óńdeý;
3) aqparattyq jáne telekommýnıkasııalyq tehnologııalar;
4) ómir týraly ǵylym;
5) eldiń zııatkerlik áleýeti.
Qazaqstan Respýblıkasy
Úkimetiniń
2011 jylǵy «16» mamyrdaǵy
№519 qaýlysymen
bekitigen
Ulttyq ǵylymı keńester týraly ereje
1. Jalpy erejeler
1. Osy Ereje «Ǵylym týraly» Qazaqstan Respýblıkasynyń 2011 jylǵy 18 aqpandaǵy Zańyna sáıkes ázirlengen jáne ulttyq ǵylymı keńester (budan ári – Keńester) qyzmetiniń quqyqtyq jáne uıymdastyrýshylyq negizderin aıqyndaıdy.
2. Keńester ǵylymı jáne (nemese) ǵylymı-tehnıkalyq qyzmettiń damý baǵyttary boıynsha alqaly organ bolyp tabylady.
3. Keńester Qazaqstan Respýblıkasynyń áleýmettik-ekonomıkalyq damýynyń memlekettik basymdyqtaryna sáıkes ǵylym baǵyttary boıynsha qurylady.
4. Keńesterdiń jumysyn uıymdastyratyn Memlekettik ǵylymı-tehnıkalyq saraptama ulttyq ortalyǵy (budan ári – Keńesterdiń jumys organy) Keńesterdiń jumys organy bolyp tabylady.
2. Keńesterdiń mindetteri men fýnksııalary
5. Keńesterdiń negizgi mindetteri:
1) Joǵary ǵylymı-tehnıkalyq komıssııa aıqyndaǵan basymdyqtarǵa sáıkes mamandandyrylǵan ǵylymı baǵyttardy qalyptastyrý;
2) ǵylymı zertteýler júrgizý úshin bólinetin qarjylandyrýdyń nysandary men kólemderin aıqyndaý;
3) usynylatyn ǵylymı, ǵylymı-tehnıkalyq jobalar men baǵdarlamalardyń ǵylymı jańalyǵyn, ǵylymı-tehnıkalyq deńgeıin, perspektıvasyn, ázirlený dárejesin, suralyp otyrǵan qarjylandyrý kóleminiń ekonomıkalyq negizdemesin baǵalaý;
4) Qazaqstan Respýblıkasynyń jańa ǵylymı baǵyttarǵa qajettilikterin baǵalaý;
5) memlekettik bıýdjetten qarjylandyrýǵa usynylatyn irgeli jáne qoldanbaly zertteýler boıynsha ǵylymı, ǵylymı-tehnıkalyq jobalar men baǵdarlamalarǵa konkýrstyq irikteýdi júzege asyrý;
6) júrgiziletin ǵylymı zertteýlerdiń iske asyrylý barysyn, onyń ishinde jumys ornyna barý arqyly monıtorıngileý bolyp tabylady.
6. Keńester memlekettik bıýdjet qarajaty esebinen:
1) ǵylymı-zertteý, tájirıbelik-konstrýktorlyq jáne tehnologııalyq jumystardyń jobalary men baǵdarlamalaryn;
2) ǵylymı-zertteý, tájirıbelik-konstrýktorlyq jáne tehnologııalyq jumystar bóligindegi basqa da baǵdarlamalardy;
3) Qazaqstan Respýblıkasy ǵylymı mekemeleriniń, uıymdary men kásiporyndarynyń qatysýymen iske asyrylatyn memleketaralyq ǵylymı-tehnıkalyq baǵdarlamalardyń jobalaryn;
4) ınnovasııalyq jobalardy granttyq jáne baǵdarlamalyq-nysanaly qarjylandyrý (qarjylandyrýdy toqtatý) týraly sheshimder qabyldaıdy.
3. Keńesterdiń qyzmetin uıymdastyrý
7. Árbir Keńeste tóraǵa, tóraǵanyń orynbasary anyqtalady.
Keńestiń tóraǵasy onyń qyzmetine basshylyq etedi, Keńestiń otyrystarynda tóraǵalyq etedi, Keńestiń jumysyn josparlaıdy jáne memlekettik organdarmen, sondaı-aq óz qyzmeti sheńberinde basqa da uıymdarmen ózara is-qımyl kezinde onyń múddesin bildiredi.
Tóraǵa bolmaǵan jaǵdaıda onyń fýnksııalaryn orynbasary atqarady.
Tóraǵa Keńes músheleriniń arasynan hattamany resimdeýge jaýap beretin Keńestiń hatshysyn belgileıdi. Bul rette Keńestiń hatshysy Keńes sheshimder qabyldaǵan kezde daýys berý quqyǵyna ıe.
8. Keńes qyzmetiniń negizgi nysany ol qabyldaıtyn sheshimderdiń jarııalylyǵy men obektıvtiligin qamtamasyz etetin Keńestiń otyrysy bolyp tabylady.
9. Keńestiń otyrysy Keńestiń múshelerin tikeleı shaqyrý jolymen ne naqty ýaqyt rejımindegi Internet-konferensııany ótkizý jolymen ótkiziledi.
10. Keńestiń otyrystary qajettiligine qaraı jylyna keminde eki ret ótkiziledi.
Keńestiń otyrystary, eger oǵan Keńestiń tıisti quramy músheleriniń sanynan keminde úshpen ekisi qatyssa, zańdy dep esepteledi.
11. Keńes otyrysynyń kún tártibin Keńestiń jumys organy qalyptastyrady jáne kezekti otyrystyń materıaldarymen birge Keńestiń múshelerine otyrystyń bastalýyna deıin jeti jumys kúninen keshiktirilmeı jiberiledi.
12. Memlekettik ǵylymı-tehnıkalyq saraptama ulttyq ortalyǵy (budan ári – Saraptama ortalyǵy) Keńeske ǵylymı, ǵylymı-tehnıkalyq jáne ınnovasııalyq jobalar men baǵdarlamalar (olar boıynsha esepter), memlekettik syılyktar, memlekettik ǵylymı stıpendııalar alýǵa usynylatyn ǵylymı-zertteý jumystary (budan ári – Saraptama obektileri) boıynsha memlekettik ǵylymı-tehnıkalyq saraptama nátıjelerin Saraptama obektilerimen qosa alqaly sheshim qabyldaýǵa jiberedi.
Keńes alynǵan memlekettik ǵylymı-tehnıkalyq saraptamanyń nátıjelerin Saraptama obektisimen birge qaraıdy jáne olar kelip túsken kúnnen bastap bes jumys kúninen aspaıtyn merzimde usynylǵan materıaldardyń máni boıynsha oń nemese teris sheshim qabyldaıdy.
13. Qajet bolǵan jaǵdaılarda Keńes Saraptama obektileri boıynsha tolyq málimetter bolmaǵan kezde Saraptama ortalyǵynan memlekettik ǵilymı-tehnıkalyq saraptamanyń nátıjeleri boıynsha qosymsha túsiniktemeler, negizdemeler men aqparatty suratady, ol eki jumys kúninen aspaıtyn merzimde jaýapty jiberedi.
14. Keńestiń sheshimi Keńestiń qatysyp otyrǵan músheleriniń qarapaıym kópshilik daýsymen qabyldanady jáne barlyq músheleri men hatshysy qol qoıatyn hattamamen resimdeledi.
Daýys berýge shyǵarylǵan másele boıynsha Keńes múshesiniń erekshe pikiri bolsa, Keńes hatshysy hattamaǵa tıisti jazba engizedi.
15. Keńestiń qabyldaǵan sheshimderin Keńestiń jumys organy ǵylym salasyndaǵy ýákiletti organǵa jáne salalyq ýákiletti organǵa sheshim qabyldanǵan kúnnen bastap on jumys kúninen aspaıtyn merzimde jiberedi.
Bul rette Keńesterdiń sheshimderin ǵylym salasyndaǵy ýákiletti organ jáne salalyq ýákiletti organdar mindetti túrde oryndaýǵa tıis.
16. Keńester ǵylymı, ǵylymı-tehnıkalyq jáne ınnovasııalyq qyzmettiń tıisti baǵyttary boıynsha oryndalatyn ǵylymı zertteýler jóninde ǵylymı jáne (nemese) ǵylymı-tehnıkalyq qyzmet týraly aralyq jáne qorytyndy esepter qabyldaıdy.
17. Keńester ózderiniń qabyldaǵan sheshimderdiń oryndalýyna monıtorıngti júzege asyrady.
18. Naqty jobaǵa, baǵdarlamaǵa (olar boıynsha esepke) saraptama, ǵylymı jumystardyń oryndalý monıtorıngin júrgizgeni úshin syıaqyny, sondaı-aq qazaqstandyq jáne sheteldik ǵalymdardyń issapar shyǵystaryn qosa alǵanda, Keńesterdiń qyzmetin qamtamasyz etýdi Saraptama ortalyǵy memlekettik bıýdjet qarajatynan júrgizedi.
19. Keńester óz qyzmetin júzege asyrý kezinde:
1) óz qyzmetin Qazaqstan Respýblıkasynyń salalyq ýákiletti organdarymen, ǵylymı uıymdarymen jáne joǵary oqý oryndarymen ózara is-qımylda júzege asyrýǵa;
2) óz qyzmetin júzege asyrý úshin aqparattyq-taldamalyq jáne anyqtamalyq derekter alýǵa;
3) kadrlardy daıarlaýdy, qarjylyq qamtamasyz etý jáne ǵylymnyń materıaldyq-tehnıkalyq bazasyn damytýdy qosa alǵanda, ǵylymı-tehnıkalyq damý jónindegi usynystardy ýákiletti organǵa, salalyq ýákiletti organdarǵa, ulttyq jáne salalyq ǵylym akademııalaryna engizýge;
4) ǵylymı-tehnıkalyq áleýetti damytý máseleleri boıynsha normatıvtik quqyqtyq aktilerdi ózgertý jáne jetildirý jónindegi usynystardy ázirleýge jáne belgilengen tártippen engizýge;
5) granttyq jáne baǵdarlamalyq-nysanaly qarjylandyrýǵa jatatyn, qaralatyn jobalar men baǵdarlamalar boıynsha otyrystarǵa qosymsha túsiniktemeler berý úshin oryndaýshylardy shaqyrýǵa;
6) ǵylym salasyndaǵy ýákiletti organnyń kelisimi boıynsha keńeske usynylǵan materıaldardy jan-jaqty, tolyq jáne obektıvti qaraýdy qamtamasyz etý maqsatynda konsýltasııalar men túsiniktemeler alý úshin naqty ǵylym salasy boıynsha sarapshylar men mamandardy tartý arqyly mamandandyrylǵan seksııalardy qurýǵa quqyǵy bar.
20. Keńesterdiń músheleri Keńes qabyldaıtıı sheshimderge, olardyń obektıvtiligi men negizdiligine, qabyldanǵan sheshimderdiń Qazaqstan Respýblıkasy zańnamasynyń talaptaryna sáıkestigine derbes jaýapkershilikte bolady.
21. Ulttyq ǵylymı keńesterdiń músheleri naqty máselelerdi qaraý kezinde ózderine málim bolǵan múddeler qaqtyǵysy týraly keńesti habardar etedi jáne keńes qabyldaıtyn sheshimderdiń obektıvtiligi men negizdiligi úshin jaýapkershilikte bolady.