Oblys ákimi Erlan Qoshanov Jeńis kúni qarsańynda Uly Otan soǵysynyń ardagerlerin qabyldap, oǵan aımaǵymyzdyń qalalary men aýdandarynan kelgen 30 adam shaqyryldy. Aımaq basshysy aıtqandaı, soǵys jyldaryndaǵy batyrlardyń qatary sırep barady. 2010-shy jyly Jeńis kúnin Qaraǵandy oblysynda 1110 ardager qarsy alǵan bolsa, búgingi kúni olardyń sany nebary 184. Ardagerlerge arnalǵan merekelik konsertte kásibı ártister jáne balalar kórkem ónerpazdyq ujymdary óner kórsetip, aqshalaı syılyq tabys etildi.
Jalpy, Qaraǵandy qalasynyń ortalyq saıabaǵyndaǵy «Sarbazdar dostyǵy» dástúrli festıvalinen bastalǵan ıgi sharalar birneshe kúnge jalǵasty. Otan qorǵaýshylar kúnine oraı S.Seıfýllın atyndaǵy qazaq drama teatrynda «Mahabbat qyzyq mol jyldar» dramasy qoıylsa, Temirtaý qalasynyń balalar jáne jasóspirimder teatry «Eto, devýshkı, voına!» degen ataýmen soǵys jyldarynyń hronıkasyn usyndy.
Sondaı-aq, Qaraǵandyda Raqymjan Qoshqarbaevtyń erligin kórsetken áskerı-tarıhı jańǵyrtý sharasy ótti. Bir kúnge Jańa Maıqudyq Mádenıet úıi Reıhstagtyń qasbeti úlgisinde bezendirilip, ǵımarattyń aldyndaǵy alańda tarıhy sátti taǵy bir eske saldy. Shara barysynda tútin granatalar men sıgnal raketalary qoldanyldy. Jańǵyrtý sharasyna 300-ge jýyq adam qatysyp, áıgili sarbazdyń qyzy Álııa Qoshqarbaeva qurmetti qonaq boldy.
«Ákem ol ýaqytta 20 jastaǵy jas jigit edi. Osy alańda jeti saǵat boıy, basyn kótermeı borap turǵan oqtyń ortasymen eńbekteı jyljyǵandyǵyn elestetýdiń ózi qorqynyshty. Ákem maǵan óziniń erligin aıtpaıtyn, batyrlyǵyn basqalardan estidim. Onyń erligin eske alýǵa arnalǵan osy sharany uıymdastyrýshylarǵa rahmetimdi aıtamyn. Tarıhtyń osyndaı kórinisteri arqyly jastarymyz soǵystyń qandaı bolǵanyn, búgingi beıbit kún qandaı baǵamen kelgenin túsinsin», - deıdi batyrdyń qyzy.
Atalmysh erlikti kórsetý ıdeıasyn tarıh áýesqoılary klýbynyń músheleri birneshe jyl qatarynan oılastyryp keledi. Buǵan deıin qaraǵandylyq entýzıastar Baýyrjan Momyshulynyń 100 jyldyq mereıtoıyna oraılastyryp, Krıýkov aýylynyń janyndaǵy shaıqastyń jańǵyrtýyn ótkizgen bolatyn.
Jeńis kúni qarsańynda patrıottyq jobany júzege asyrýdy Qaraǵandy qalalyq máslıhatynyń depýtaty, kásipker Tólegen Áshimov usynǵan. О́zi oǵan demeýshilik kórsetken. Ideıany áskerı-patrıottyq tárbıemen aınalysatyn aýla klýbtary birden quptaǵan eken. Raqymjan Qoshqarbaev pen Grıgorıı Bolatovtyń rólderin kastıng arqyly tańdaý túsken Almas Ámire men Ilgız Alpysbaev somdady.
Al, keshe dástúrli túrde Qaraǵandyda «Máńgilik polk» sherýi sapynda myńdaǵan qala turǵyndary Otan úshin jandaryn qıǵan ata-babalaryna taǵzym etip, qala kóshelermen júrip ótti.
Jeńis kúninde ótkiziletin dástúrli mıtıng-rekvıem, jalpy jıyn «Máńgilik alaý» memorıalynyń aldynda boldy. Oǵan oblys ákimi Erlan Qoshanov arnaıy qatysyp, barsha qaraǵandylyqtardy Uly Jeńis kúnimen quttyqtady.
– Eger bizdiń babalarymyz sol soǵysta jeńiske jetpese, biz beıbit ómir súrer me edik? Otan úshin janyn qıǵan jaýyngerlerge, ardagerlerge degen qurmetimiz - myna turǵan Máńgilik alaý sııaqty. Esh ýaqytta óshpeıdi, esh ýaqytta sónbeıdi. Jeńimpazdarǵa myń taǵzym, – dedi Erlan Jaqanuly.
Mıtıngten soń oblys əkimi birqatar soǵys ardagerleriniń shańyraǵynda bolyp, olardy Jeńis kúnimen quttyqtap, baǵaly syılyqtar tabys etti.
Ary qaraı, Jeńis saıabaǵynda merekelik sharalar jalǵasyn tapty. Ol jerde de «Er esimi – el esinde» atty konserttik baǵdarlama bastalyp, qala jurtshylyǵy ortalyq saıabaqta ótken retro-avtomobılder kórmesin tamashalady. Mundaı is-sharalar, oblys ortalyǵyna jaqyn «Temirjolshylar», «Molodejnyı», «Jańa Maıqudyq» Mádenıet úılerinde de atalyp ótti.
Mıras ASAN,
«Egemen Qazaqstan»
Qaraǵandy oblysy