Júldeli oryn jetkizbeı tur

Osy kúnderi Qytaıdyń Shanhaı qalasynda sý sporty túrlerinen álem chempıonaty ótýde. Oǵan álemniń kóp­te­gen elderi qatysýda. Solardyń ara­syn­da birneshe ret Olımpııa oıyndary men álem chempıondary bolǵan Maıkl Felps, Alen Bernar, Raıen Lohte, Ýssa­ma Meloýn sııaqty ataqty sport­shylar bar. Ázirshe bul básekede Qazaqstan sport­shylary kóńil kónshiterlik nátıje kór­sete almaı keledi. Sınhrondy júzýden ótken juptyq synda Anna Kýlkına men Áıgerim Jeksembıeva 17-shi oryndy ıelendi. Al jekeleı synda (solo) óner kórsetken Anna Kýlkına 13-shi oryn alyp, fınaldyq ke­zeń­ge shyǵa almady. Oǵan tek 12-shi oryn­dy ıelengen sportshylar ǵana jiberiledi. Sý dobynan Qazaqstan quramasy al­ǵashqy oıynynda Vengrııadan 21:6 esebimen utyldy. Endi áıelder komandasynyń kelesi qarsylasy – Gollandııa quramasy. Al Gollandııa bolsa, alǵashqy oıynynda AQSh-pen 7:7 esebimen teń tústi. Elimizdiń erler komandasy Ispanııamen kezdesip, olar da 18:5 esebimen jeńildi. Erler de áıelder de óz toptaryndaǵy oıyndaryn osylaısha sátsiz bastady. Erler qu­ramasynyń bas bapkeri Sergeı Drozdov Vengrııa, Ispanııa, Chernogorııa el­deri sport­shylarymen barynsha ıyq teńestirip báse­ke­lesýge tyrysatyndaryn aıtqan. Qa­rap otyr­saq, bizdiń komandamyzǵa atalǵan azýly qu­ra­malarmen teń dárejede oınaý ońaı emes sııaqty. Áıelder komandasynyń da qar­sy­lastary ońaı shaǵylatyn jańǵaq emes ekeni kórinip tur. Gollandııa men Vengrııa álemniń birneshe dúrkin chempıon­dary. Osy jerde Tarazdyń «Aısha-bıbi» klýbynan quralǵan elimizdiń bas ko­man­da­synyń jarysta mıl­lıon­daǵan jan­kúıer­lerdiń aldynda jankeshtilik oıyny­men, jeńiske degen jigerligimen jaqsy áser qalyptastyryp ketse eken dep tileımiz. Sý dobynan oıyndar ótip jatqan kezde sınhrondy júzýden juptyq kezdesýdiń teh­nı­ka­­lyq jattyǵýlary aıaqtaldy. Bul synda bas júl­deni Reseı quramasy, kúmis medaldi Qy­taı, qola júldeni Ispanııa ıelendi. Sýǵa sekirýde Qytaı qyzdaryna teń keletin eshkim bol­ma­dy. Olar bul jarysta tórt birdeı altyn aldy. Álem chempıonatynda sý doby, sınh­rondy júzý, sýǵa sekirý, júzýden bolsyn Qazaqstan sportshylarynyń áli bir jaqsy nátıjesin kóre almaı otyrmyz. Osy rette chempıonat turmaq, bizdiń álemdik báseke­ler­diń eshqaısysynda áli juldyzymyz jan­baǵanyn aıtýǵa týra keledi. Bul jerde bir ǵana másele bar ekenin aıtý kerek. Ol – bilikti bapkerlerdiń joqtyǵy. Áıtpese, juptyq synda 17-shi oryndy, jekelegen jarysta 13-shi oryn­dy alǵan Anna Kýlkına, Áıgerim Jeksembıeva, Áıgerim Anarbaeva, Áıgerim Isaeva, Aınur Kereı, Ámına Ermekhanova, Aı­sulý Naýryzbaeva sııaqty sýda myń bu­ralǵan arýlarymyzdyń «baǵyn» asha­tyn bapkerler bolsa, olar bizge sýdan júl­deni sanap turyp alyp berer edi ǵoı deısiń. Sý sportynan bıyl 14-shi ret ja­laýyn kótergen jarys 31 shildege deıin jal­ǵasady. Osy ýaqyt ishinde sport­tyń 5 túri boıynsha 66 medal jıyntyǵy sarapqa sa­lynady. Sýǵa sekirý, júzý, vaterpol, ashyq sýda ja­rys, jáne sınhrondy júzý­den syndar ótedi. Dastan KENJALIN.