...qaıyrymdylyq jobasy
Kókshetaý memlekettik ýnıversıteti men «BTA» banki fılıaly basshylary yntymaqtastyq jónindegi jańa kelisim-shartqa qol qoıdy.
– «BTA-dan shákirtaqy» qaıyrymdylyq jobasy banktiń bastamasy boıynsha bıylǵy mamyr aıynan bastap ázirlenip, qoldanysqa engizildi, – dedi qarjy ınstıtýty Kókshetaý fılıalynyń dırektory Baqyt Ospanov.
Áleýmettik turǵydan kómekke zárý stýdentterdi qoldaý maqsatyndaǵy shákirtaqy mólsheri – aıyna 20000 teńge nemese oqý jyly boıyna 200000 teńgeni quraıdy. Ol oqý ornynyń tańdaýy boıynsha bir nomınantqa eki semestr boıy nemese eki nomınantqa ár semestr saıyn bir-birden tólenbek. Sondaı-aq, jobaǵa qatysa almaıtyn stýdentter «Ámbebap fakýlteti» jeńildetilgen nesıe júıesin paıdalana alady.
Baqbergen AMALBEK, Kókshetaý.
...kúrish sorty tutynýshy suranysyna ıe
Qarataldyqtar dala marjany sanalǵan kúrish daqylyn ósirýde taǵylymdy tájirıbe jınaqtap, eseli eńbek etip keledi. Jyldan-jylǵa kúrish sapasyn arttyryp, ónim kólemin ulǵaıtý ústinde. Bıylǵy jyly aýdan dıqandary 4000 gektar alqapqa kúrish egip, mol ónim alý maqsatynda agrotehnıkalyq sharalardy múltiksiz jalǵastyrǵan.
Yrysty ónim kúrishti qolǵa alǵandardyń biri – «Opytnoe» óndiristik kooperatıvi. Sharýashylyq óńirge «Pak Lı», «Zarıa», «Opytnoe», «Sýak» sekildi aýdandastyrylǵan kúrish tuqymdaryn ósirýimen tanymal. Ásirese, kúrishtiń «Pak Lı», «Zarıa» tárizdi jańa sorttary bazar naryǵynda tutynýshy suranysyna ıe azyq-túlik qatarynan tabylady. Sý men ystyqty qajet etetin daqyl tynymsyz eńbekti talap etse, ónimniń shyǵymdylyǵy úshin kúrishtiń mańyna jońyshqa egiledi. Bul – jerdiń qunarlylyǵyn joǵaltpaýǵa septigin tıgizetin tásil.
«Eńbegine qaraı – ónbegi». Aýdanda kúrish orý naýqany qyrkúıek aıynan bastalady. Aýdan dıqandary byltyr ár gektardan 38,2 sentnerden aq marjan alsa, bıyl 38,5 sentnerden ónim alýdy josparlaýda. Al kúrishtiń «Pak Lı», «Zarıa» jańa tuqymdarynan budan da mol ónim alynatynyna dıqan qaýymy bek senimdi.
Kúmisjan BAIJAN,
Almaty oblysy.
...avtobýstar baǵyttarǵa shyqty
Oblys ortalyǵynda jolaýshylar tasymalymen aınalysatyn «Avtopark» jaýapkershiligi shekteýli seriktestiginiń parki taǵy da jańa 30 avtobýspen tolyqty. Árqaısysy 4318325 teńge turatyn Qytaıdyń «JAC» markaly avtobýsyna 100 jolaýshy erkin sııady. Qalada jolaýshylar tasymalyna baılanysty jańadan tender ótkizý kózdelýde. Osy maqsatta qurylǵan jumysshy top qalaishilik baǵyttar boıynsha júretin avtobýstardyń qozǵalys kestesine qosymsha ózgerister engizilmek. Qalada jańa shaǵyn aýdandar salynyp, qanatyn keńge jaıýyna, sondaı-aq avtokólikterdiń kóbeıýine, qozǵalys erejeleriniń saqtala bermeýine baılanysty jolaýshylar tasymaldaıtyn baǵyttardaǵy avtobýstardyń júrýine qıyndyq keltiretin jaǵdaılar da týyndaýda.
Jańa avtobýstar qalanyń ortalyq kóshelerinde jolaýshylarǵa qyzmet kórsetedi. Seriktestik jolaýshylar tasymaly qyzmetin kórsetý sapasyn jaqsartý maqsatynda syıymdylyǵy joǵary avtobýstar satyp alyp, baǵyttarǵa jiberip, qalalyqtardyń rızashylyǵyna bólendi. Seriktestik avtobýs parkin osyndaı qolaıly da syıymdylyǵy joǵary avtobýstarmen tolyqtyrýdy jalǵastyra beretin bolady.
Satybaldy SÁÝIRBAI,
Aqtóbe oblysy.