...kóshpeli ǵylymı konferensııa bastaldy
Qostanaı oblysynda el Táýelsizdiginiń 20 jyldyǵyna arnalǵan kóshpeli ǵylymı-praktıkalyq konferensııa bastaldy. Ony Qostanaı óńirlik tarıhı zertteý ınstıtýty men oblys ákimdiginiń ishki saıasat basqarmasy uıymdastyrdy.
Konferensııa aldymen Denısov jáne Qamysty aýdandarynda bastaldy. Oǵan mektep muǵalimderi, aýdandaǵy mádenıet oshaqtary men arhıv qyzmetkerleri, ózderi turǵan ólke tarıhy qyzyqtyratyn tilek bildirýshilerdiń barlyǵy da qatysty. Konferensııada oblystaǵy belgili ǵalymdar, ǵylym doktorlary men kandıdattary A.Kúzembaıuly, E.Ábil, D.Legkıı, S.Samarkın, A.Shalǵynbaev, taǵy basqalar sóz sóıledi. Ǵalymdar táýelsizdiktiń qaınar bastaýy, prezıdenttik bıliktiń damýy jáne ekonomıkalyq, saıası, áleýmettik salalardaǵy túbegeıli jańarýlardy júzege asyrýdaǵy onyń róli týraly áńgimeledi.
Názıra JÁRIMBETOVA, Qostanaı.
...Kókshetaýǵa elshi keldi
Aqmola oblysynyń ákimi Sergeı Dıachenko jumys babyndaǵy saparmen kelgen Ýkraınanyń Tótenshe jáne ókiletti elshisi Oleg Demındi qabyldady. Kezdesý barysynda ózara yntymaqtastyqtyń ózekti máseleleri talqylandy.
Sońǵy eki jylda aqmolalyqtardyń baýyrlas elmen aradaǵy taýar aınalymy 1,5 ese ósip, 3,5 mıllıon dollardy qurady. Kezdesýge qatysqan oblys kásipkerleri 46 myńdaı ýkraın ultynyń ókili turyp jatqan óńir úshin munyń jetkiliksiz ekendigine nazar aýdaryp, birlesken kásiporyndar qurý týraly jańa jospar-jobalarymen bólisti. Ýkraına elshisi mundaı usynystardyń qundylyǵyn atap ótti.
Baqbergen AMALBEK, Aqmola oblysy.
...Jıdebaıdy án terbedi
Tilshi qosyna Abaı aýdandyq mádenıet úıiniń ádiskeri Dana Sársembaeva habarlasyp, sońǵy otyz jyldan beri halqymyzdyń án ónerin tynbaı nasıhattap kele jatqan Tatıana Býrmıstrova jýyrda Jıdebaıdaǵy Abaı – Shákárim kesenesindegi amfıteatrda óziniń eseptik konsertin ótkizgenin jetkizdi. El táýelsizdiginiń 20 jyldyq merekesi qurmetine oraı ótkizilgen tamasha keshte tek bir Tatıana ǵana emes, onymen ilese kelgen basqa da orys tildi azamattar men azamatshalar Abaı ánderin, jalpy qazaq ánderin birinen keıin biri shyrqata oryndapty.
Áserli án keshinen soń aýdan ákimi Tursynǵazy Músápirbekov Tatıanaǵa hakim urpaqtary atynan rızashylyq bildire kelip, halqymyzdyń joralǵysymen onyń ıyǵyna qamzol jaýyp, bórtpe sháli ilip, Abaı kitaby men óziniń alǵys hatyn qosa tapsyrypty.
Dáýlet Seısenuly, Shyǵys Qazaqstan oblysy.