Totalıtarlyq rejimnen kóp japa shekken halyqtyń biri – polıaktar. Taıynsha aýdany turǵyndarynyń úshten birin quraıtyn polıak etnosynyń ata-ájeleri 1936 jyly saıası qýǵyn-súrginge ushyrap, Batys Ýkraınadan kúshpen qonys aýdarylǵan. Usharyn jel, qonaryn saı ǵana bilgen olar álem kartasynyń altydan bir bóligin alyp jatqan Keńes odaǵyn kókteı ótip, Qyzyljar óńirin turaqtaǵan. Keń qoltyq, jomart kóńil qazaqtardan pana tapqan. Sodan beri aǵaıyn-týystaı bite qaınasyp, Qazaqstannyń órkendeýine óz úlesterin qosyp keledi.
Jýyrda osy aýdandaǵy Zelenyı Gaı aýylynyń qurylǵanyna 75 jyl tolyp, bir shańyraq astynda tútin tútetip otyrǵan túrli ult ókilderi birlik, tatýlyq kúnin atap ótti. Saltanatty sharaǵa Polshanyń Qazaqstandaǵy Tótenshe jáne ókiletti elshisi Iаsek Klıýchkovskı men oblys ákimi Serik Bilálov qatysty.
Qurmetti meıman aýdannyń tynys-tirshiligimen jan-jaqty tanysyp, jaıqala ósip turǵan egin alqaptaryn aralady. Taıynsha stansasynda salynyp jatqan 280 oryndy balabaqsha jáne 60 páterli turǵyn úı qurylysynda boldy.
Zelenyı Gaı turǵyndarynyń 70 paıyzǵa jýyǵy – polıaktar. Munda negizinen saıası qýǵyn-súrgin kezinde eriksiz jer aýdarylǵan jandardyń birneshe urpaǵy ósip-óngen. Olardyń birqataryna maqtaý qaǵazdar, alǵys hattar tapsyryldy. Osy eldi mekendi bir kezderi Sıgızmýnd Bagınskıı degen azamat kóp jyldar boıy abyroımen basqaryp, úlken qurmetke bólengen eken. Bir kóshege onyń esimi berilip, murajaı úıi esigin aıqara ashty.
Jurtshylyq el Táýelsizdigi merekesi qurmetine oraı «20 ıgi is» sharasy aıasynda atqarylyp jatqan basqa da jan jadyratar sharalardyń kýási boldy.
О́mir ESQALI,
Soltústik Qazaqstan oblysy,
Taıynsha aýdany.