Kópshilikke qolaıly qoldaý

Qaraǵandyda aýyl turǵyndarynyń turmysyn túzeý qolǵa alyndy Bul alys eldi mekenderde turatyn jurtshy­lyqqa qýanyshty jańalyq bolyp otyr. Ol úsh baǵytta iske asyrylý ústinde. Atap aıtqanda, oqytý jáne qaıta oqytýǵa, nesıelik kómekke, turǵyn úımen qamtamasyz etýge negizdelgen. Onda kózdelgendeı, birinshi kezekte  jumyssyzdar men tabysy tómen otbasylarǵa qoldaý kórsetiledi. Biz bilgenimizdeı,  qazir keleshegi joq dep sana­latyn aýyldardy anyqtaý júrgizilip jatyr. Ondaı­lar­dyń qataryna jeri qunarsyz, kommýnıkasııalyq qurylymy álsiz, jol qatynasy kúrdeli aýmaqtar túkpirindegi az tútindi qonystar engizilýde. Oblys boıynsha ázirge anyqtalǵan 9 eldi mekenniń 5-ýi Ulytaý, 2-ýi Shet jáne bir-birden Aqtoǵaı men Nura aýdandarynda ornalasqan. Ekonomıka jáne bıýdjettik josparlaý basqarmasynyń bólim bas­tyǵy Gúlbadan Súleımenovanyń aıtýynsha, son­daı-aq, ekonomıkalyq kúsh-qabileti tómen 63 selo nazarǵa alynǵan. Bul tizimde Abaı, Aqtoǵaı, Qar­qa­raly, Shet aýdandaryndaǵy Iýjnyı, Torań­ǵylyq, Egindi­bulaq, Aqjal, Aqshataý, Moıy­nty kent­teri de bar. Zertteýler kórsetkenindeı, ondaǵy turǵyn­dardyń kóbi jumyssyz, baspanasyz. Olardy aýdan orta­lyq­tary men qalalarǵa qonys­tan­dyryp, eń­bekke qamtý atalǵan baǵdarlamanyń basty maqsaty. Buǵan baılanysty qarastyrylǵan is-sharalar qandaı? Solardyń birin ortaǵa salǵanda, máselen, qalalarǵa qonys aýdarýshy jumyssyzdardy qaıta oqytý arqyly jańa mamandyqtar meńgertiledi. Sol úshin eńbekke ornalastyrý ortalyqtaryna túsiril­gen ótinishter eskeriledi. Búginde Qaraǵandydaǵy Qazybek bı jáne Oktıabr aýdandarynda osyndaı 2 bólim jumys isteýde. 400-den astam azamattyń ótinishteri qabyldanyp, jas aıyrmashylyqtaryna, kásiptik beıimdilikterine qaraı birazy 6 aıdan 1 jylǵa nemese 3 aıdan 6 aıǵa deıin oqytylýda. Bitirgennen keıin údemeli ındýstrııalyq-ınnova­sııa­lyq damý baǵdarla­ma­sy aıasynda jańadan ashylǵan kásiporyndarda ju­mys isteýge jiberiledi. Sonymen birge baspanaly bolý­laryna múmkindik jasalady. Bul rette páterdi jalǵa berý qoldanylady. Al 15 jyldan soń ony jekeshelendirýge quqyq beriledi. Eger qarjylyq  jaǵdaıy jetetin bolsa, 5 jyl ishinde páter  birjola satyp alynady. Aıta ketý kerek, 2020 jylǵa deıinge arnalǵan eń­bek­pen qamtý baǵdarlamasynyń sharapaty memlekettik qol­daýǵa tileýqor basqa da jandarǵa tıedi. Sonyń ná­tı­je­sinde jumyssyzdyq pen kedeıshilik deńgeıin 6 paıyzǵa tómendetý, áleýmettik ahýaly áljýaz topta­ǵy­l­ardy tur­ǵyn úımen qamtamasyz etý máselesin sheshý kózdelgen. Elimiz óz azamattaryna jaqsylyq jasaýdan aıanbaı otyr. Osynaý ıgilikti sharalar sonyń taǵy bir jarqyn kórinisi. Kóńilderine qonǵan, turmystyq jaǵdaılaryn jaqsartýǵa qolaıly qoldaý talaıyn alǵa tartaryna qaraǵandylyqtar úmitteri úlken. Aıqyn  NESIPBAI, Qaraǵandy.