Qysqy shildede Qostanaıdyń aýa raıy qubylyp bersin. О́ńirde qys bıyl da kesh túsken. Qardy qostanaılyqtar jeltoqsannyń ortasy aýa kórdi. Qarmen birge aıaz keldi, synap baǵanasy 40-qa deıin tómen túsip ketkende jurt tabıǵattyń tamasha qubylysyn qyzyqtady – taıaq tastam jer kórinbes aq tuman turyp alǵan.
Jylymyq bop turyp, aldarqatyp soqqan aıazdy kúnder qurbansyz da bolmady. Aıaz Jańa jyl meıramy kúnderi qaıtalap soqty, 25-30 gradýs aıazǵa da et úırendi. Oblys ákiminiń tikeleı baqylaýda ustaýymen oblystyń tótenshe jaǵdaılar jónindegi departamenti qyzmetkerleri, jol polıseıleri turǵyndardyń alysqa jolaýshy júrmeýin, kommýnaldyq qyzmet salasy joldardyń tazalyǵyn qadaǵalady. Aýa raıynyń sýytýy qalalar men aýyl-aımaqtaǵy jurtshylyqtyń ala jazdaı jasaǵan qysqa daıyndyǵyn synaı kelgendeı eken. Rýdnyı qalasynda 25 gradýs aıaz bolyp turǵanda jylý taratatyn qubyr jarylyp, táýlik boıy turǵyndardy da, kommýnaldyq qyzmet salasyn da ábigerge saldy. Abyroı bolǵanda, qubyr jolyndaǵy aqaý jóndelip, úılerge jylý berý qalypty jaǵdaıǵa jetkizildi.
Al Lısakov qalasy kúzde jóndelgen qazandyqtyń rahatyn aıazdy kúnderi kórdi. Boran qalaı soqsa da qustyń uıasyndaı jınaqy qaladaǵy jylý qazandyqtary men qubyrlar arqyly ár úıge jetken jylý shańyraqqa bereke alyp kirdi. Al Qostanaı qalasy da qysqy shildeniń aıazyn qalypty qarsy aldy. Jergilikti aýa raıyn boljaýshylardyń baqylaǵanyndaı, synap baǵanasy 25-30 gradýs aıazdy kórsetip turdy. Biraq qalada turǵyndardy ábigerge salardaı eshqandaı qolaısyz jaǵdaı oryn alǵan joq. Páterlerde kúndelikti beriletin jylý azaımady. Jaqsy jóndeý jumystary júrgizilgen jerlerde aıaz qubyrdy qatyra almaıdy. Oblystyń basqa aýdandary men eldi mekenderinen dabyldy aqparat túsken joq.
Al oblystyń ońtústigindegi aýdandarda qańtardyń basyndaǵy 17 gradýsqa jetken aıazdyń sońy jylynyp, jańbyrǵa aınaldy degenge kim sener! Torǵaı óńirinde qańtardyń 4-inen 5-ine qaraǵan túni jańbyr tynbaı jaýdy, kúndiz qar erip, jer qaraıyp qaldy. Qar jaýsa da, boran tursa da, jańbyr jaýsa da Arqalyq qalasy birqalypty qalpynan taıǵan joq. О́ıtkeni, kúzde qala mazýtyn artyǵymen tasyp alyp, jylý qubyryn jamap-jasqap alǵan bolatyn. Irgeńdi erte qymtap almasań, Arqa qysynyń salǵan álegi qandaı bolatynyn bul qala bastan talaı ótkergen...
Názıra JÁRIMBETOVA,
Qostanaı oblysy.