Mereke qarsańyndaǵy mereıli ister

Sońǵy jyldary erke Ertis jaǵasyndaǵy ejelgi Semeıdiń kórki kirip keledi. Qalany kóg­al­dandyryp, jaryqtandyrý isinde birshama ilgerileýshilik baı­qalady. Ásirese, bıylǵy merekeli jyly qala ómirinde ózgeris, jańalyqtar barshylyq. Aıta­lyq, buryn oı-shuńqyry kóp or­talyq bazardyń mańy retke kelip qaldy. Endi ortalyq alańǵa kúrdeli jón­deý jumystary júrgizilýde. Ondaǵy tóselgenine qyryq jyl­dan asqan, áb­den eskirip, tozǵan beton, sýburqaq, erterekte osy jerde turǵan «kún kósemniń» alyp eskertkishiniń tuǵyry aly­nyp tastaldy. Abaı teatryn kó­legeılep turǵan shyrshalardyń biraz bóligi alynbaq. Sonyń bá­riniń esebinen alań aýmaǵy birshama keńeıtiledi. Munda jańa­dan tóseletin aıshyqty plıtalar, gúpzarlar, kóz tartatyn jańa sýburqaq alańnyń óńin ashyp, sánin keltirmek. Bıylǵy jyly el Táýel­siz­di­gimen birge, Elbasynyń alǵashqy Jarlyq­tary­nyń biri – Semeı atom polı­go­ny­nyń jabylǵany­na da 20 jyl tolýy keńinen atalyp ótiledi. Qazan aıynyń ortasynda Ertis aıryǵyndaǵy aralda polıgon qurbanda­ry­na arnap orna­tylǵan monýment basynda Elbasynyń qatysýy­men alqaly jıyn ótedi dep kú­tilýde. Soǵan oraı munda da ıgilikti sharalar atqarylýda. Bar­lyǵyna respýb­lıkalyq bıýdjetten 244 mıllıon teńge qarajat bólinetin bolady. Qala kórkin ajarlap qana qoımaı, onyń aby­roıyn asqaqtatatyn mundaı ıgi sharany qa­laısha quptamassyń! Qaısybir aýdan­dar­dyń da qala­ny kórkeıtýge atsaly­syp otyr­ǵany kóńil súısintedi. Qalanyń ulylar eline shyǵa berisinde de bir ıgi sharýa qolǵa alynýda. Iаǵnı, qala men áýejaı burylysynda ulylarǵa qatysty ásem panno orna­tyl­maq. Jáne bir aıta ketetin jaıt,  elimizdi damytýdyń 2020 jyldarǵa deıingi baǵdarlamasy boıynsha ja­ńadan saly­natyn bir qabatty 50 úı qury­lysy da qalanyń osy tusynan boı kóteredi. Oǵan negizinen aýyldan kelgender qonys­tanatyn bolady. Úkimet tarapy­nan osy maqsatqa  233 mıllıon teńge qarjy bólinip otyr. Jańa tur­ǵyn úı alabyn sý, jaryqpen qamta­m­a­syz etý, balalardyń oı­yn alańdaryn salyp berýdi de Úkimet óz moınyna almaq. Bul el Táýelsizdigi merekesi qar­sańyndaǵy mereıli isterdiń bir parasy ǵana. Al onyń ja­ra­symdy jalǵasyn ta­batyndy­ǵy­na esh kúmán joq. Dáýlet SEISENULY, Semeı.